ବରଗଡ ଅଫିସ,୭।୬- ବରଗଡ଼ ସହରର ଜଣେ ଅଷ୍ଟମ ଶ୍ରେଣୀ ଛାତ୍ର ଆୟୁଷ୍ମାନ ଦର୍ଜୀ ରବିବାର ନିଜ ସଞ୍ଚିତ ରାଶିକୁ କ୍ୟାନ୍ସର ପୀଡିତଙ୍କ ପାଇଁ ନିଜ ସଞ୍ଚିତ ରାଶି ବରଗଡ଼ର ଫାଇଟର୍ସ ଗୃପକୁ ଦାନ କରି ଅନ୍ୟମାନଙ୍କ ପାଇଁ ଦୃଷ୍ଟାନ୍ତ ସାଜିଛନ୍ତି। ସ୍ଥାନୀୟ ମିନି ଷ୍ଟାଡିୟମ ପଛପାଖରେ ରହୁଥିବା ଅନୁପ କୁମାର ଦର୍ଜୀଙ୍କ ପୁଅ ଆୟୁଷ୍ମାନ ବିକାଶ ରେସିଡେନ୍ସିଂଆଲ ସ୍କୁଲର ଛାତ୍ର ହୋଇଥିବା ବେଳେ ପିଲାଦିନରୁ ତାଙ୍କ ଏଭଳି ମହତ୍ ଉଦ୍ଦେଶ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
ଆୟୁଷ୍ମାନ କହିଛନ୍ତି, କ୍ୟାନ୍ସର ଯୋଗୁ ତାଙ୍କ ଅଜାଙ୍କ ମୃତ୍ୟୁ ଘଟିଥିବା ବେଳେ ବଡବାପା ଅଶ୍ବିନୀ କୁମାର ଦର୍ଜୀ ମଧ୍ୟ କ୍ୟାନସର ରୋଗରେ ପୀଡିତ ଅଛନ୍ତି। ଏହି ଦୁଇଜଣ ଯାକ ତାଙ୍କୁ ବହୁତ ଭଲ ପାଆନ୍ତି। ତେବେ ଟଙ୍କା ଅଭାବ ଯୋଗୁ ଆବଶ୍ୟକ ଚିକିତ୍ସାରୁ ବଞ୍ଚିତ ହୋଇ କ୍ୟାନ୍ସର ରୋଗୀଙ୍କ ମୃତ୍ୟୁ ହେଉଛି। ଏହାକୁ ନେଇ ସେ ନିଜ ସଞ୍ଚିତ ରାଶିକୁ କ୍ୟାନ୍ସର ପୀଡ଼ିତ ରୋଗୀଙ୍କୁ ଦାନ କରିବା ପାଇଁ ଇଚ୍ଛା ପ୍ରକାଶ କରିଥିବା କହିଛନ୍ତି। ଫାଇଟର୍ସ ଗୃପ ମାଧ୍ୟମରେ କ୍ୟାନ୍ସର ରୋଗୀଙ୍କୁ ପ୍ରତିବର୍ଷ ଏଭଳି ଦାନ କରିବେ ବୋଲି ସେ ସୁଚନା ଦେଇଛନ୍ତି। ସଞ୍ଚିତ ରାଶି ଦାନ କଲାବେଳେ ଆୟୁଷ୍ମାନଙ୍କ ସହିତ ତାଙ୍କ ଭଉଣୀ ଅଦ୍ବେତା ଏବଂ ବାପା ଅନୁପ ଉପସ୍ଥିତ ଥିଲେ।