ଭୁବନେଶ୍ୱର,୧୨ା୮(ବ୍ୟୁରୋ) : ସଂଘବଦ୍ଧ ଆକ୍ରମଣର ଶିକାର ହୋଇଥିବା କ୍ୟାପିଟାଲ ହସ୍ପିଟାଲ ପାଣ୍ଡିର କନଷ୍ଟେବଳ ଅଜିତ କୁମାର ସ୍ବାଇଁଙ୍କୁ ମିଳୁନି ନ୍ୟାୟ। ଘଟଣାର ୫ଦିନ ବିତିଯାଇଛି। ନ୍ୟାୟ ପାଇଁ ସେ ଥାନା ଅଧିକାରୀଙ୍କଠାରୁ ଆରମ୍ଭ କରି ଡିସିପି ଓ ପୋଲିସ କମିଶନରଙ୍କୁ ନିବେଦନ କରି ଆସୁଛନ୍ତି। ହେଲେ ଏଯାଏ ଥାନାରେ ମାମଲା ରୁଜୁ ହୋଇନାହିଁ କି ଅଭିଯୁକ୍ତଙ୍କୁ ଗିରଫ କରାଯାଉନି। ଏହି ଘଟଣାରେ ଜଣେ ଆଇନଜୀବୀ ସମ୍ପୃକ୍ତ ଥିବା ଜଣାପଡିଛି। ସେ କନଷ୍ଟେବଳ ସ୍ବାଇଁଙ୍କୁ ଧକ୍କା ସହ ମାଡ଼ ମାରୁଥିବା ସିସିଟିଭି ଫୁଟେଜ ରହିଛି। ଅଭିଯୋଗପତ୍ରରେ ମଧ୍ୟ ସମ୍ପୃକ୍ତ ଆଇନଜୀବୀଙ୍କ ସମ୍ପର୍କରେ ଉଲ୍ଲେଖ ରହିଛି। ହେଲେ ସମ୍ପୃକ୍ତ ଆଇନଜୀବୀଙ୍କ ଉପରେ କାର୍ଯ୍ୟାନୁଷ୍ଠାନ ହେଲେ କାଳେ କଟକ ଘଟଣା ପରି ଭୁବନେଶ୍ୱରରେ ଓକିଲମାନେ ଆନ୍ଦୋଳନ କରିବେ ସେହି ଭୟ ଏବେ ପୋଲିସକୁ ଘାରିଛି। କନଷ୍ଟେବଳଙ୍କ ଅଭିଯୋଗକୁ ନେଇ ପୋଲିସ ମାମଲା ରୁଜୁ କରୁ ନ ଥିବାବେଳେ ଅପରପକ୍ଷ ଦ୍ୱାରା କୋର୍ଟରେ ଏକ ଓ୍ବାନ୍ ସିସି ମାମଲା ସମ୍ପୃକ୍ତ କନଷ୍ଟେବଳଙ୍କ ବିରୋଧରେ ରୁଜୁ କରାଯାଇଛି। ଏଭଳିସ୍ଥିତିରେ କନ୍ଷ୍ଟେବଳ ସଂଘ ମାମଲା ରୁଜୁ ପାଇଁ ଥାନା ଅଧିକାରୀ ଓ ଡିସିପିଙ୍କୁ ଭେଟି ଦାବି ଜଣାଇଛନ୍ତି। ଅନ୍ୟପକ୍ଷରେ ଦୁଇଦିନ ତଳେ କେତେଜଣ ଆଇନଜୀବୀ ଡିସିପିଙ୍କୁ ଭେଟି ମାମଲାର ଆପୋସ ସମାଧାନ ପାଇଁ ଚେଷ୍ଟା କରିଥିଲେ।
ପୋଲିସ କମିଶନର ସତ୍ୟଜିତ ମହାନ୍ତି କହିଛନ୍ତି ଯେ, ମାମଲାର ତଦନ୍ତ ଡିସିପି କରୁଛନ୍ତି। ଦୁଇଦିନ ତଳେ ଓକିଲମାନେ ଭେଟି ଏ ବିଷୟରେ ଆଲୋଚନା କରିଥିଲେ। ମାମଲାର ସ୍ଥିତି କ’ଣ ସେନେଇ ମୁଁ ଜାଣି ନ ଥିବା ସେ କହିଛନ୍ତି। ଡିସିପି ଅନୁପ କୁମାର ସାହୁ କହିଛନ୍ତି, କନ୍ଷ୍ଟେବଳଙ୍କୁ ମାଡ଼ ଘଟଣାରେ ମାମଲା ରୁଜୁ ହୋଇନାହିଁ। ଆମେ ଦେଖୁଛୁ କ’ଣ ହୋଇପାରିବ।