ଭୁବନେଶ୍ୱର,୧୨।୧୦(ବ୍ୟୁରୋ): କ୍ୟାପିଟାଲ ହସ୍ପିଟାଲ ଫୁଟ୍ପାଥରେ ପ୍ରସବ କରିଛନ୍ତି ଜଣେ ମହିଳା। ଲେବର ରୁମ୍ରୁ ଫେରାଇ ଦେବାରୁ ଅସହ୍ୟ ଯନ୍ତ୍ରଣା ଭୋଗୁଥିବା ଗର୍ଭବତୀ ଜଣକ ହସ୍ପିଟାଲ ଫୁଟ୍ପାଥରେ ସନ୍ତାନ ପ୍ରସବ କରିଛନ୍ତି। ସୂଚନାଯୋଗ୍ୟ, ଶୁକ୍ରବାର ରାତି ପ୍ରାୟ ୮ଟାରେ ସାଲିଆସାହିରେ ରହୁଥିବା ପାନା ମୁର୍ମୁଙ୍କ ପ୍ରସବ ଯନ୍ତ୍ରଣା ହେବାରୁ ପରିବାର ଲୋକେ ତାଙ୍କୁ କ୍ୟାପିଟାଲ ହସ୍ପିଟାଲ ଆଣିଥିଲେ । ଏମ୍ସିଏଚ୍ରେ ଥିବା ସ୍ତ୍ରୀ ରୋଗ ଓ ପ୍ରସୂତି ବିଭାଗରେ ଦେଖାଇବା ପରେ ଲେବର ରୁମ୍କୁ ଯାଇଥିଲେ। କିନ୍ତୁ ଅବସ୍ଥା ଜଟିଳ ଅଛି, ତୁରନ୍ତ କଟକ ଯିବାକୁ ଡାକ୍ତରଖାନା ପକ୍ଷରୁ କୁହାଯାଇଥିଲା। ପାନାଙ୍କ ଯନ୍ତ୍ରଣା ଦେଖି ପରିବାର ଲୋକେ ପ୍ରସବ କରାଇବାକୁ ଡାକ୍ତରଙ୍କୁ ନେହୁରା ହୋଇଥିଲେ। ମାତ୍ର ଡାକ୍ତରଖାନା କର୍ମଚାରୀମାନେ ପାନାଙ୍କ ପ୍ରତି ସାମାନ୍ୟ ଦୃଷ୍ଟି ମଧ୍ୟ ଦେଇ ନ ଥିଲେ। ପାଖରେ ଅର୍ଥ ନ ଥିବାରୁ ପରିବାର ଲୋକେ ତାଙ୍କୁ ଅନ୍ୟତ୍ର ନେଇପାରି ନ ଥିଲେ। ତେଣୁ ପାନା ଗର୍ଭ ଯନ୍ତ୍ରଣାରେ ଫୁଟ୍ପାଥରେ ବସି ପଡ଼ିଥିଲେ। ଆଶ୍ଚର୍ଯ୍ୟର କଥା, କିଛି ସମୟ ଭିତରେ ଫୁଟ୍ପାଥରେ ସେ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ। ଆଖପାଖରେ ଥିବା ଲୋକେ ଏହା ଦେଖିବା ପରେ ହସ୍ପିଟାଲ ପରିସରରେ ଉତ୍ତେଜନା ପ୍ରକାଶ ପାଇଥିଲା।