ନବରଙ୍ଗପୁର,୧୪।୫(ବି.ପ୍ର.)- କରୋନା କେବଳ ମଣିଷ ମଣିଷ ଭିତରେ ଦୂରତା ବଢ଼ାଇନାହିଁ। ଏହି ଭୂତାଣୁ ସଂକ୍ରମଣର ଆଶଙ୍କା ଯୋଗୁ ନିଜ ମା’ର ଶେଷ ଦର୍ଶନ କରିପାରିଲାନି କ୍ୱାରାଣ୍ଟାଇନରେ ଥିବା ଏକମାତ୍ର ପୁଅ। ଏପରିକି ମା’ର ମୃତଦେହ ଉପରେ ୨ ଟୋପା ଲୁହ ଝରେଇବା ଦୂରେଥାଉ ମୁଖାଗ୍ନି ଦେବାର ଅଧିକାର ବି ଛଡ଼େଇ ନେଇଛି କୋଭିଡ୍-୧୯। ଏପରି ଏକ ଦୃଶ୍ୟ ନବରଙ୍ଗପୁର ଜିଲାରେ ଦେଖିବାକୁ ମିଳିଥିଲା।
ନବରଙ୍ଗପୁର ଜିଲା ନନ୍ଦାହାଣ୍ଡି ବ୍ଲକ ଝାଡ଼ବନ୍ଧଗୁଡ଼ା ପଞ୍ଚାୟତ ମୁର୍ଲାବାଇ ଗ୍ରାମର ଧନେଇ ଜାନୀ(୫୯)ଙ୍କ ବୁଧବାର ରାତିରେ ମୃତ୍ୟୁ ହୋଇଥିଲା। ଧନେଇଙ୍କ ଏକମାତ୍ର ପୁଅ ଶଙ୍କର ଜାନୀ (୨୦) ଗତ ୧୧ ତାରିଖରେ ହାଇଦ୍ରାବାଦରୁ ଫେରି ନନ୍ଦାହାଣ୍ଡି ବ୍ଲକର ଆଦର୍ଶ ବିଦ୍ୟାଳୟରେ ଥିବା ସଙ୍ଗରୋଧ କେନ୍ଦ୍ରରେ ରହିଛନ୍ତି। ସଙ୍ଗରୋଧର ଆବଶ୍ୟକତା ଜରୁରୀ ଥିବାରୁ ମା’ର ମୃତ୍ୟୁ ହେବା ଜାଣିବା ପରେ ମଧ୍ୟ କ୍ୱାରାଣ୍ଟାଇନରୁ ଆସି ଶୁଦ୍ଧିକ୍ରିୟା କରିପାରି ନ ଥିଲେ। ତେବେ ଜିଲା ପ୍ରଶାସନ ବଢ଼ାଇଥିଲା ସହାୟତାର ହାତ। ଧନେଇଙ୍କ ପୁତୁରା ଭଗତ ଜାନୀଙ୍କୁ ମୁଖାଗ୍ନି ଦେବା ପାଇଁ ଅନୁମତି ଦିଆଯାଇଥିଲା। ମୃତକଙ୍କ ଅନ୍ତିମ ସଂସ୍କାର ସମୟରେ ପଞ୍ଚାୟତ ସମ୍ପ୍ରସାରଣ ଅଧିକାରୀ ପ୍ରସନ୍ନ ବିଶୋୟୀ ଉପସ୍ଥିତ ଥିଲେ। ଏଥିସହ ହରିଶ୍ଚନ୍ଦ୍ର ଯୋଜନାରେ ୨ହଜାର ଟଙ୍କା,ଶୁଦ୍ଧିକ୍ରିୟା ପାଇଁ ୫୦ କେଜି ଚାଉଳ ଓ ୫ କେଜି ଡାଲି , ଜିଲା ରେଡକ୍ରସ ପାଣ୍ଠିରୁ ୧୦ ହଜାର ଟଙ୍କା ପ୍ରଦାନ କରାଯାଇଛି।