ଡେରାଡୁନ,୩୧।୫: ଉତ୍ତରାଖଣ୍ଡର କ୍ୟାବିନେଟ ମନ୍ତ୍ରୀ ସତପାଲ ମହାରାଜ ଏବେ କ୍ୱାରାଣ୍ଟାଇନରେ। ତାଙ୍କ ଧର୍ମପତ୍ନୀ ଅମ୍ରିତା ରାଓ୍ବତଙ୍କ କରୋନା ଟେଷ୍ଟ ରିପୋର୍ଟ ପଜିଟିଭ ଆସିବା ପରେ ମନ୍ତ୍ରୀ ସତପାଲ ମହାରାଜ କ୍ୱାରାଣ୍ଟାଇନରେ ରହିବା ଆରମ୍ଭ କରିଛନ୍ତି। ଏହାସହ ତାଙ୍କ ଘରେ ରହୁଥିବା ପ୍ରାୟ ୪୧ ଜଣ ସଦସ୍ୟ କ୍ୱାରାଣ୍ଟାଇନରେ ଥିବା ବେଳେ ସମସ୍ତଙ୍କର ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଛି। ମହାରାଜ ଶୁକ୍ରବାର ଏକ କ୍ୟାବିନେଟ ବୈଠକରେ ଯୋଗ ଦେଇଥିବା ବେଳେ ଏଥିରେ ମୁଖ୍ୟମନ୍ତ୍ରୀ ତ୍ରିଭେନ୍ଦ୍ର ସିଂ ରାଓ୍ବତ ମଧ୍ୟ ଯୋଗ ଦେଇଥିଲେ। ଯାହାକୁ ନେଇ ଏବେ ଚିନ୍ତା ବଢି ଯାଇଛି। ଅମ୍ରିତାଙ୍କର ଏବେ ରିଷିକେଶରେ ଥିବା ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନସେସ୍(ଏମ୍ସ)ରେ ଚିକିତ୍ସା ଚାଲିଥିବା ପ୍ରକାଶ କରିଛନ୍ତି ଜିଲାପାଳ ଆଶିଷ କୁମାର ଶ୍ରୀବାସ୍ତବ। ଉତ୍ତରାଖଣ୍ଡରେ ଏବେ ମୋଟ କରୋନା ସଂକ୍ରମିତଙ୍କ ସଂଖ୍ୟା ୭୪୯ରେ ପହଞ୍ଚିଛି। ଗତ ୨୪ ଘଣ୍ଟାରେ ୨୨ ନୂଆ ରୋଗୀ ଚିହ୍ଟ ହେବା ପରେ ଏମାନଙ୍କ ମଧ୍ୟରେ ୧୪ ଡେରାଡୁନର, ୩ ହରିଦ୍ୱାରର ଓ ୫ ନୈନିତାଲର ବୋଲି ଜଣାପଡିଛି।