ଭୁବନେଶ୍ୱର,୨୧ା୩ (ବ୍ୟୁରୋ): କରୋନା ସଂକ୍ରମଣରୁ ଲୋକଙ୍କୁ ରକ୍ଷା କରିବା ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ସହରର ୩ ହୋଟେଲକୁ କ୍ୱାରାଣ୍ଟାଇନ୍ ସେଣ୍ଟରରେ ପରିଣତ କରାଯାଇଛି। ଜୟଦେବ ବିହାର, କଳ୍ପନା ଛକ ଓ ଶହୀଦନଗରସ୍ଥିତ ଏକ ହୋଟେଲରେ ବିଏମ୍ସି ଦେୟଯୁକ୍ତ କ୍ୱାରାଣ୍ଟାଇନ୍ ସେଣ୍ଟର କରିଛନ୍ତି। ହସ୍ପିଟାଲରେ ରହିବାକୁ ରାଜି ହେଉ ନ ଥିବା ଲୋକେ ଅର୍ଥ ପୈଠକରି ହୋଟେଲ କ୍ୱାରାଣ୍ଟାଇନ୍ରେ ରହିପାରିବେ। ଏବେ ଏହି ହୋଟେଲଗୁଡ଼ିକର କର୍ମଚାରୀମାନଙ୍କୁ ନାନା ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ବିଶେଷକରି କର୍ମଚାରୀମାନେ ଭଡ଼ା ରହୁଥିବା ଘରର ମାଲିକମାନେ ସେମାନଙ୍କୁ ଘର ଛାଡ଼ିବାକୁ ବାଧ୍ୟ କରୁଥିବା ଅଭିଯୋଗ ହୋଇଛି। ଏପରି କି କେତେକ ମାଲିକ ସେମାନଙ୍କୁ ଘରେ ପଶିବାକୁ ମଧ୍ୟ ଦେଉନାହାନ୍ତି। ଏନେଇ ଶୁକ୍ରବାର ଗଣମାଧ୍ୟମ ପ୍ରତିନିଧିମାନେ କରୋନା ଭୂତାଣୁ ସଂକ୍ରମଣ ସଚେତନତା କମିଟି ମୁଖ୍ୟ ପ୍ରବକ୍ତା ସୁବ୍ରତୋ ବାଗ୍ଚୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏଭଳି ଅଭିଯୋଗ ଆସିଲେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି।