ଅନୁଗୋଳ ଅଫିସ୍, ୨୮ା୩- ବାହାରୁ ଆସିଥିବା ଲୋକଙ୍କୁ ହୋମ କ୍ୱାରାଣ୍ଟାଇନ ବା ସଙ୍ଗରୋଧରେ ରହିବାକୁ ବାରମ୍ବାର ପୋଲିସ ପ୍ରଶାସନ ପକ୍ଷରୁ କୁହାଯାଉଥିଲେ ମଧ୍ୟ ଏହାକୁ ଅନେକେ ମାନୁ ନ ଥିବା ଦେଖାଦେଇଛି । ଅନୁଗୋଳ ଜିଲାକୁ ରାଜ୍ୟ ତଥା ରାଜ୍ୟ ବାହାରୁ ଆସିଥିବା ଲୋକଙ୍କୁ ଅଲଗା ରହିବାକୁ କୁହାଯାଇଥିବାବେଳେ ସେମାନେ ଘରେ ନ ରହି ବାହାରେ ବୁଲିବା ସହ ଅନ୍ୟମାନଙ୍କ ସହ ମିଳାମିଶା କରୁଥିବାରୁ ପୋଲିସ ପୁଣି ଶନିବାର ୫ଟି ମାମଲା ରୁଜୁ କରିଛି। ୫ ଜଣଙ୍କୁ ହୋମ କ୍ୱାରାଣ୍ଟାଇନରେ ରହିବାକୁ ନିର୍ଦ୍ଦେଶ ରହିଥିଲେ ମଧ୍ୟ ସେମାନେ ଘରେ ନ ଥିବା ଜଣାପଡିଥିଲା। ପୋଲିସ ସମ୍ପୃକ୍ତ ୫ ଜଣଙ୍କୁ ସରକାରଙ୍କ ପକ୍ଷରୁ ନିର୍ମାଣ କରାଯାଇଥିବା କ୍ୱାରାଣ୍ଟାଇନ ଓ୍ବାର୍ଡରେ ଭର୍ତ୍ତି କରିଛି । ଏ ନେଇ ବଅଁରପାଳ ଥାନାରେ ୩, ଅନୁଗୋଳ ଓ ଏନଟିପିସି ଥାନାରେ ୨ ଜଣଙ୍କ ନାମରେ ମାମଲା ରୁଜୁ ହୋଇଥିବା ପୋଲିସ କହିଛି। ସେହିପରି ଜିଲାରେ ଲକଡାଉନ ନିୟମ ନ ମାନି କିଛି ଲୋକ ବହୁ ସଂଖ୍ୟାରେ ଏକାଠି ହୋଇ ତାସ ଖେଳୁଥିବା ଏବଂ ବିନା କାରଣରେ ଘରୁ ବାହାରୁ ଥିବାରୁ ପୋଲିସ ଶନିବାର ୯ ଜଣଙ୍କ ନାମରେ ମାମଲା ରୁଜୁ କରିଛି। ସେମାନଙ୍କ ନିକଟରୁ ୨ଟି ବାଇକ, ତାସ ପ୍ୟାକେଟ ଜବତ କରାଯାଇଛି । ସେମାନଙ୍କ ମଧ୍ୟରେ ବିନା କାମରେ ଘରୁ ବାହାରିବା ଅଭିଯୋଗରେ ୫ ଜଣ ଓ ଜରପଡା ଥାନା ଅଞ୍ଚଳରେ ତାସ ଖେଳୁଥିବା ୪ ଜଣ ରହିଛନ୍ତି।