ଲାଉସାନେ, ୯।୪(ଏପି)- ୨୦୨୦ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିଥିବା ଆଥଲେଟ ସେମାନଙ୍କ ସ୍ଥାନ ବଜାୟ ରଖିବେ। କୋଭିଡ୍-୧୯ ସଂକ୍ରମଣ କାରଣରୁ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଛି। ତେବେ ୨୦୨୧ରେ ଯେତେବେଳେ ଅଲିମ୍ପିକ୍ସ ନୂଆ ତାରିଖରେ ଆୟୋଜନ ହେବ ସେତେବେଳେ ଏହି ଆଥଲେଟମାନେ ସେମାନଙ୍କ ସ୍ଥାନ ବଜାୟ ରଖିବା ସହ ପ୍ରତିଯୋଗିତାରେ ଅବତୀର୍ଣ୍ଣ ହୋଇପାରିବେ ବୋଲି ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ତରଫରୁ କୁହାଯାଇଛି। ନୂଆ କାର୍ଯ୍ୟସୂଚୀ ଅନୁଯାୟୀ ଅଲିମ୍ପିକ୍ସ ଆସନ୍ତାବର୍ଷ ଜୁଲାଇ ୨୩ ତାରିଖରୁ ଆରମ୍ଭ ହୋଇ ଅଗଷ୍ଟ ୮ ତାରିଖରେ ଶେଷ ହେବ। ଏପର୍ଯ୍ୟନ୍ତ ୬, ୫୦୦ ଆଥଲେଟ୍ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିସାରିଛନ୍ତି।
ଅଲିମ୍ପିକ୍ସ ଯୋଗ୍ୟତା ହାସଲ ପାଇଁ ଆଇଓସି ପୁନଃ ଲିଖିତ ରୋଡମ୍ୟାପ୍ ଜାରି କରିଛି। ୨୦୨୧ ଜୁନ୍ ୨୯କୁ ଯୋଗ୍ୟତା ହାସଲ କରିବାର ନୂଆ ଡେଡ୍ଲାଇନ୍ ଘୋଷଣା କରାଯାଇଛି। ଇଣ୍ଡିଭିଜୁଆଲ ଅନ୍ତର୍ଜାତୀୟ ସ୍ପୋଟର୍ସ ଫେଡେରେଶନଗୁଡିକ ଯୋଗ୍ୟତା ହାସଲ ନେଇ ପୂର୍ବପରି ସେମାନଙ୍କ କାର୍ଯ୍ୟ ଜାରି ରଖିବେ ବୋଲି କୁହାଯାଇଛି। ବିଭିନ୍ନ ଇଭେଣ୍ଟରେ ଅଂଶଗ୍ରହଣ କରି ଯୋଗ୍ୟତା ହାସଲ କରିବାକୁ ବିଭିନ୍ନ ସ୍ପୋଟର୍ସ ଫେଡେରେଶନ ଏକାଧିକ ଆଥଲେଟଙ୍କୁ ସୁଯୋଗ ଦେଇଛି। ୨୦୨୦ ଡେଡ୍ଲାଇନ୍ ଅନୁସାରେ ଯୋଗ୍ୟତା ହାସଲ କରିବାର ନିକତର ହୋଇଥିବା ଆଥଲେଟଙ୍କୁ ସୁଯୋଗ ଦେବାକୁ ଫେଡେରେଶନମାନଙ୍କୁ ଆଇଓସି ନିର୍ଦ୍ଦେଶ ଦେଇଛି। ତେବେ ଏଥିପାଇଁ ଆଥଲେଟଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ମଧ୍ୟ ଗୁରୁତ୍ୱ ଦେବା ଏହି ପ୍ରକ୍ରିୟାରେ ସନ୍ତୁଳନ ରକ୍ଷା କରିବାକୁ ଆଇଓସି କହିଛି। ଅଲିମ୍ପିକ୍ସରେ ଶ୍ରେଷ୍ଠ ଆଥଲେଟମାନଙ୍କୁ ସୁଯୋଗ ଦେବା ଉପରେ ଆଇଓସି ଗୁରୁତ୍ୱ ଦେଇଛି।
ତେବେ ଯେଉଁମାନେ ଯୋଗ୍ୟତା ହାସଲ କରିସାରିଛନ୍ତି ସେମାନେ ସ୍ଥାନ ବଜାୟ ରଖିବେ ବୋଲି ଆଇଓସି ଗତ ସପ୍ତାହରେ ସ୍ପଷ୍ଟ କରିଥିଲା। ଏ ସଂକ୍ରାନ୍ତରେ କେତୋଟି ନିୟମରେ ପରିବର୍ତ୍ତନ ହୋଇଥିଲା। ଉଦାହରଣ ସ୍ବରୂପ ବକ୍ସିଂରେ ସର୍ବୋଚ୍ଚ ବୟସସୀମା ୪୦ ଥିବା ବେଳେ ଏହାକୁ କୋହଳ କରାଯିବ ବୋଲି ସ୍ପଷ୍ଟ କରାଯାଇଥିଲା। ୨୦୨୦ରେ ବୟସ କମ୍ କାରଣରୁ ସୁଯୋଗ ପାଇ ନ ଥିବା ଜିମ୍ନାଷ୍ଟମାନେ ୨୦୨୧ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବାକୁ ପ୍ରୟାସ କରିପାରିବେ।
ବାକିଥିବା ଅଲିମ୍ପିକ୍ କ୍ୱାଲିଫାଇଂ ଇଭେଣ୍ଟ ପାଇଁ ଆଥଲେଟଙ୍କ ସ୍ବାସ୍ଥ୍ୟକୁ ସବୁଠାରୁ ଅଧିକ ଗୁରୁତ୍ୱ ଦିଆଯିବ ବୋଲି ଆଇଓସି ସ୍ପଷ୍ଟ କରିଛି। କୋଭିଡ-୧୯ ସଂକ୍ରମଣ ରୋକା ନ ଯିବ ପର୍ଯ୍ୟନ୍ତ କୌଣସି କାର୍ଯ୍ୟସୂଚୀ ନିର୍ଦ୍ଧାରଣ ନ କରିବାକୁ କୁହାଯାଇଛି। ନଭେମ୍ବର ୩୦ ପର୍ଯ୍ୟନ୍ତ ସବୁ ପ୍ରକାର କ୍ୱାଲିଫାଇଂ ଇଭେଣ୍ଟକୁ ବାତିଲ କରିବା ନେଇ ଓ୍ବାଲର୍ଡ ଆଥଲେଟିକ୍ସ ଘୋଷଣା ମଧ୍ୟ କରିଛି। କ୍ୱାଲିଫାଇଂ ପାଇଁ ଡିସେମ୍ବର ୧ରୁ ୨୦୨୧ ଜୁନ୍ ୨୯ ତାରିଖ ପର୍ଯ୍ୟନ୍ତ ଓ୍ବଣ୍ଡୋ ରଖାଯାଇଛି।