ଦାରିଙ୍ଗବାଡ଼ି,୧୨ା୮(ଡି.ଏନ୍.ଏ.-ଦାରିଙ୍ଗବାଡ଼ି ବ୍ଲକର ଦୁର୍ଗମ ତାଜୁଙ୍ଗିଆ ପଞ୍ଚାୟତ ଅଞ୍ଚଳରେ ରବିବାର ଅପରାହ୍ନରେ ଜଣେ ଗର୍ଭବତୀଙ୍କୁ ଖଟିଆରେ ବୋହି ଡାକ୍ତରଖାନା ନିଆଯାଉଥିବା ବେଳେ ଜଙ୍ଗଲ ରାସ୍ତାରେ ସେ ପ୍ରସବ କରିଛନ୍ତି। ତାଜୁଙ୍ଗିଆ ପଞ୍ଚାୟତ ଦୁବୁରି ଗାଁକୁ ଗାଁକୁ ରାସ୍ତା ନାହିଁ । ବଣ ପାହାଡ଼ ଘେରା ଏହି ଗ୍ରାମବାସୀ ଚାଲିଚାଲି ଯିବାଆସିବା କରନ୍ତି। ଗ୍ରାମର ମିକନ୍ତି ମାଝି ଗର୍ଭ ଯନ୍ତ୍ରଣା ପାଇବାରୁ ପରିବାର ଲୋକେ ତାଙ୍କୁ ଖଟିଆରେ ପାହାଡ଼ ରାସ୍ତା ଦେଇ ସିକବାଡ଼ି ଗ୍ରାମକୁ ଆଣୁଥିଲେ। ସିକବାଡିରୁ ତାଙ୍କୁ ଗଦାପୁର ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥାନ୍ତା। ହେଲେ ବାଟରେ ମିକନ୍ତି ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ। ମା’ ସହ ନବଜାତକ ଗୁରୁତର ହେବାରୁ ତୁରନ୍ତ ମହିଳା ସ୍ବାସ୍ଥ୍ୟକର୍ମୀ ସୁଧାମୟୀ ମହାଲିକ, ବବିତା ସିଂ ପ୍ରମୁଖ ଚିକିତ୍ସା କରିଥିଲେ। ଆଶା କର୍ମୀ ସସ୍ମିତା ବଳିଆର ସିଂ ସହଯୋଗ କରିଥିଲେ ା ପରେ ମିକନ୍ତିଙ୍କୁ ତାଙ୍କ ଗ୍ରାମକୁ ଫେରେଇ ନିଆଯାଇଛି ା ମହିଳା ସ୍ବାସ୍ଥ୍ୟକର୍ମୀ ଏବଂ ଅନ୍ୟମାନେ ନ ଥିଲେ ମିକନ୍ତିଙ୍କ ଅବସ୍ଥା ଶୋଚନୀୟ ହୋଇପଡ଼ିଥାନ୍ତା ବୋଲି ୧୧ ନଂ ଜୋନର ଜିଲାପରିଷଦ ସଭ୍ୟା ଦିପିକା ମାଝୀ କହିଛନ୍ତି। ସବୁଦିନିଆ ରାସ୍ତା ନ ଥିବାରୁ କୌଣସି ଅଟୋ କିମ୍ବା ଆମ୍ବୁଲାନ୍ସ ଗାଁରେ ପହଞ୍ଚି ପାରୁନି ସେ କହିଛନ୍ତି।
