ଭୁବନେଶ୍ୱର,୧୦ା୭(ବ୍ୟୁରୋ)/ଖୋର୍ଦ୍ଧା ଅଫିସ: ଖୋର୍ଦ୍ଧାରେ ବ୍ରାଉନସୁଗାର ଓ ବେଆଇନ ପଥରଖଣିରେ ଗ୍ୟାଙ୍ଗ୍ଷ୍ଟର୍ଙ୍କ ସମ୍ପୃକ୍ତି ପଦାକୁ ଆସିବା ପରେ କ୍ରାଇମବ୍ରାଞ୍ଚ ଏସ୍ଟିଏଫ୍ ଆରମ୍ଭ କରିଛି ‘ଅପରେଶନ କ୍ଲିନ୍’। ଖୋଜି ଖୋଜି ଗ୍ୟାଙ୍ଗଷ୍ଟାରମାନଙ୍କୁ ଗିରଫ କରୁଛି ଏସ୍ଟିଫ୍। ଏନ୍କାଉଣ୍ଟର ପରେ ସମ୍ପୃକ୍ତ ଗ୍ୟାଙ୍ଗ୍ଷ୍ଟରମାନେ ଭୟଭୀତ ହୋଇପଡିଲେଣି। ମଙ୍ଗଳବାର ଏସ୍ଟିଏଫ୍ର ଓ୍ବାଣ୍ଟେଡ୍ ଥିବା ଖୋର୍ଦ୍ଧା ଗୁରୁଜଙ୍ଗ ଜବରଦସ୍ତପୁର ଦ୍ୱାରିକାନଗରର ଶୁଭ୍ରାଂଶୁ ପରିଡା ଓରଫ ଛୋଟା(୪୫) ଖୋର୍ଦ୍ଧା ଏସ୍ଡିଜେଏମ୍ କୋର୍ଟରେ ଆତ୍ମସମର୍ପଣ କରିଛନ୍ତି। ଜାମିନ ନାମଞ୍ଜୁର ହେବାରୁ ତାଙ୍କୁ ଖୋର୍ଦ୍ଧା ସବ୍ଜେଲକୁ ପଠାଇ ଦିଆଯାଇଛି। ଏସ୍ଟିଏଫ୍ ଜାଲ ବିଛାଇଥିବା ଜାଣିପାରି ଗିରଫରୁ ବର୍ତ୍ତିବା ପାଇଁ ଛୋଟା ଓକିଲ ଧରି ଆତ୍ମସମର୍ପଣ କରିବାକୁ ଯୋଜନା କରିଥିଲା। ଏ ସମ୍ପର୍କରେ ଆଗୁଆ ସୂଚନା ପାଇବା ପରେ କୋର୍ଟ ଆଗରେ ଏସ୍ଟିଏଫ୍ର ୫ଜଣିଆ ଟିମ୍ ସାଦାପୋଷାକରେ ଛକି ରହିଥିଲେ। ହେଲେ ଛୋଟା ଚକମା ଦେଖାଇ ଓକିଲଙ୍କ ଗହଳି ଭିତରେ କୋର୍ଟ ଭିତରକୁ ପଶି ଯାଇଥିଲେ। ଏସ୍ଟିଏଫ୍ କୋର୍ଟ ଭିତରୁ ତାଙ୍କୁ ଗିରଫ ପାଇଁ ଉଦ୍ୟମ କରିଥିଲେ ମଧ୍ୟ ଓକିଲମାନେ ବିରୋଧ କରିଥିଲେ। ଏହାକୁ ନେଇ ଏସ୍ଟିଏଫ୍ ଓ ଓକିଲଙ୍କ ମଧ୍ୟରେ କୋର୍ଟ ଆଗରେ କିଛି ସମୟ ଯୁକ୍ତତର୍କ ହୋଇଥିଲା। ଶେଷରେ ଏସ୍ଟିଏଫ୍ ଆଉ ଗିରଫ ନ କରିପାରି ଖାଲି ହାତରେ ଫେରିଥିଲା। ଏହାପରେ ଛୋଟା ବିରୋଧରେ ଅଧିକ ପ୍ରମାଣ ପାଇଁ ଏସ୍ଟିଏଫ୍ ତାଙ୍କ ଦ୍ୱାରିକାନଗର ଘର, ଅଫିସ୍ ସମେତ ଅନ୍ୟ ଦୁଇଟି ସ୍ଥାନରେ ଚଢାଉ କରିଥିଲା। ତେବେ ତାଙ୍କ ଗ୍ୟାଙ୍ଗ୍ ସମ୍ପର୍କରେ ଅଧିକ ତଥ୍ୟ ହାସଲ କରିବାକୁ ଛୋଟାଙ୍କୁ ଏସ୍ଟିଏଫ୍ ରିମାଣ୍ଡରେ ଆଣିବ। ଦୁଇଦିନ ଭିତରେ ରିମାଣ୍ଡ ପାଇଁ କୋର୍ଟରେ ଆବେଦନ କରାଯିବ ବୋଲି ଏସ୍ଟିଏଫ୍ ଇନ୍ସପେକ୍ଟର ଆଲୋକ ଜେନା କହିଛନ୍ତି।
ଅନ୍ୟପକ୍ଷରେ ନିଶା କାରବାର ଓ ବେଆଇ ପଥର ଖଣି ଚଳାଉଥିବା ଦାରୁଠେଙ୍ଗର ସୂର୍ଯ୍ୟ ହାତଖଣ୍ଡିକୁ ଏସ୍ଟିଏଫ୍ ମଙ୍ଗଳବାର ଗିରଫ କରିଛି। ତାଙ୍କ ବିରୋଧରେ ଏସ୍ଟିଏଫ୍ କେସ୍ ନଂ-୭/୧୯, ଦଫା ୩୭୯, ୪୧୧, ୪୬୭, ୪୬୮, ୪୭୧, ୧୨୦(ବି) ଓ ୨୫/୨୭ ଆର୍ମସ ଆକ୍ଟ ଲଗାଇ ଖୋର୍ଦ୍ଧା ଏସ୍ଡିଜେଏମ୍ କୋର୍ଟରେ ହାଜର କରାଯାଇଥିଲା। ଜାମିନ ନ ମିଳିବାରୁ ତାଙ୍କୁ ଖୋର୍ଦ୍ଧା ସବ୍ଜେଲକୁ ପଠାଇ ଦିଆଯାଇଛି। ସେ ମଧ୍ୟ ଖୋର୍ଦ୍ଧାରେ ବ୍ରାଉନସୁଗାର ବ୍ୟବସାୟ କରିବା ସହ ବେଆଇନ ପଥର ଉତ୍ତୋଳନ ଓ ଚୋରା ଚାଲାଣ କରୁଥିଲେ। ସେ ପ୍ରଥମେ ଛୋଟା ଓ ଲେଡି ଡନ୍ ଗ୍ୟାଙ୍ଗରେ କାମ କରୁଥିଲେ। ପରେ ସୂର୍ଯ୍ୟ ନିଜେ ଏକ ଗ୍ୟାଙ୍ଗ ଗଢି ଖୋର୍ଦ୍ଧା ଅଞ୍ଚଳରେ ଥିବା ଏକାଧିକ ପଥର ଖାଦାନରୁ ପଥର ଚାଲାଣ କରୁଥିଲେ।
ତେବେ ନିଶା ଓ ପଥର କାରବାରରେ ଗ୍ୟାଙ୍ଗ୍ଷ୍ଟର୍ଙ୍କ ସମ୍ପୃକ୍ତିକୁ ଗୁରୁତ୍ୱର ସହ ନେଇଛି ଏସ୍ଟିଏଫ୍। ସେମାନଙ୍କ ଆକାଉଣ୍ଟରେ କୋଟି କୋଟି ଟଙ୍କା ରହିଥିବା ଜାଣିବା ପରେ ସେମାନଙ୍କ ସମ୍ପତ୍ତିର ଖୋଳତାଡ ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)କୁ ଏସ୍ଟିଏଫ୍ ଚିଠି ଲେଖିବ ବୋଲି ଜଣାପଡିଛି।
ବ୍ରାଉନସୁଗାରରୁ ପଥର ମାଫିଆ ଓ ଲେଡି ଡନ୍ ଗ୍ୟାଙ୍ଗ୍
ଖୋର୍ଦ୍ଧାରେ ବ୍ରାଉନସୁଗାର ବ୍ୟବସାୟର ମାଷ୍ଟରମାଇଣ୍ଡ୍ ଥିଲେ ଛୋଟା। ସେ ବାଲେଶ୍ୱର ଓ ବାଂଲାଦେଶରୁ ବ୍ରାଉନସୁଗାର ଆଣି ଖୋର୍ଦ୍ଧାରେ ବିକ୍ରି କରୁଥିଲେ। ଖୋର୍ଦ୍ଧା ଅଞ୍ଚଳରେ ନିଶା ସାମ୍ରାଜ୍ୟ ବିସ୍ତାର କରିସାରିବା ପରେ ବେଆଇନ ପଥର ଖନନ ଓ ଚୋରା ଚାଲାଣ ଆରମ୍ଭ କରିଥିଲେ। ପରବର୍ତ୍ତୀ ସମୟରେ ସ୍ଥାନୀୟ ଅଞ୍ଚଳର ଲେଡି ଡନ୍ଙ୍କୁ ଗ୍ୟାଙ୍ଗ୍ରେ ସାମିଲ୍ କରିଥିଲେ। ତାଙ୍କୁ ବେଆଇନ ପଥର ଉତ୍ତୋଳନ ଓ ଚାଲାଣ ଦାୟିତ୍ୱ ଦେଇଥିଲେ। ଲେଡି ଡନ୍ ବନ୍ଧୁକ ଧରି ପଥର ଖଣି ଇଲାକାରେ ରାଜ୍ କରିବା ସହ ଆତଙ୍କ ଖେଳାଇଥିଲେ। ପୋଲିସ ଲେଡି ଡନ୍ ଓ ଛୋଟାଙ୍କୁ ଗିରଫ କରିବାକୁ ସାହସ କରୁ ନ ଥିଲେ। ଏପରିକି ଗ୍ରାମବାସୀ ଓ ସ୍ଥାନୀୟ ନେତାଙ୍କୁ ଲେଡିଡନ୍ ମାସିକ ବଟି ଦେଉଥିଲେ। ଏନେଇ ସମସ୍ତେ ଜାଣୁଥିଲେ ମଧ୍ୟ ଚୁପ୍ ରହୁଥିଲେ। ଏସ୍ଟିଏଫ୍ ଖୋଳତାଡ଼ କରିବା ପରେ ଛୋଟାର ନଁା ଆସିଥିଲା। ତାଙ୍କୁ ଧରିବା ପାଇଁ ମାସେ ହେବ ଏସ୍ଟିଏଫ୍ ଜାଲ ବିଛାଇଥିଲା। ହେଲେ ସେ ଏସ୍ଟିଏଫ୍କୁ ଚକ୍ମା ଦେଇ ଖସିଯାଉଥିଲା।