ସିଂହପୁର,୧୪।୮(ଡି.ଏନ୍.ଏ.): ଯାଜପୁର ଜିଲା ବିଞ୍ଝାରପୁର ଥାନା ଅନ୍ତର୍ଗତ ଜରୀଗ୍ରାମ ନଦୀ ଅପରପାର୍ଶ୍ୱ ମଧୁବନଠାରେ ଖରସ୍ରୋତାରେ ବୁଧବାର ଡଙ୍ଗା ବୁଡ଼ିଯାଇଥିଲା। ମାତ୍ର ସ୍ଥାନୀୟ ଲୋକଙ୍କ ଉପସ୍ଥିତି ବୁଦ୍ଧି ଯୋଗୁ ସେଥିରେ ଥିବା ଛାତ୍ରୀଛାତ୍ରଙ୍କ ସମେତ କିଛି ଯାତ୍ରୀ ନିଶ୍ଚିତ ମୃତ୍ୟୁ ମୁଖରୁ ବର୍ତ୍ତି ଯାଇଛନ୍ତି। ପ୍ରକାଶ ଯେ, ବୁଧବାର ପୂର୍ବାହ୍ନରେ ଏକ ଡଙ୍ଗା ମଧୁବନ ଘାଟଛନ୍ଦାରୁ ୨୫ ଜଣ ଛାତ୍ରୀଛାତ୍ର ଓ ୧୦ ଜଣ ଯାତ୍ରୀଙ୍କୁ ନେଇ ନଦୀ ପାର ହେଉଥିବା ବେଳେ ମଧୁବନ ଛନ୍ଦା ନିକଟରେ ଭାରସାମ୍ୟ ହରାଇ ନଦୀଛନ୍ଦା ନିକଟରେ ବୁଡିଯାଇଥିଲା। ସେହି ସମୟରେ କୂଳରେ ଥିବା ସ୍ଥାନୀୟ ବାସିନ୍ଦା ଲକ୍ଷ୍ମୀଧର ମଲିକ, ଅକ୍ଷୟ ବିଶ୍ୱାଳ, ରାଜକିଶୋର ରାଉତ, ଭିକାରୀ ସାମଲ, ମଣିରାମ ମଲିକଙ୍କ ସମେତ କିଛି ଲୋକ ପହଁରି ଛାତ୍ରୀଛାତ୍ରଙ୍କୁ ଉଦ୍ଧାର କରିଥିଲେ। ଫଳରେ ନିଶ୍ଚିତ ଦୁର୍ଘଟଣାରୁ ବର୍ତ୍ତିଯାଇଛନ୍ତି। ସୂଚନାଯୋଗ୍ୟ, ମଧୁବନ ଗ୍ରାମରେ ଉପ୍ରା ବିଦ୍ୟାଳୟ ଓ ହାଇସ୍କୁଲ ନ ଥିବାରୁ ଏହି ଗ୍ରାମର ପିଲା ବିପଦପୂର୍ଣ୍ଣ ଭାବେ ନଦୀ ପାର ହୋଇ ଜରୀ ଗ୍ରାମର ସ୍କୁଲକୁ ଯିବାକୁ ବାଧ୍ୟ ହେଉଛନ୍ତି।