କେନ୍ଦୁଝର, ୧୫ା୫(ଡି.ଏନ୍.ଏ.)-ଖରାଦିନ ଆସିଗଲେ କେନ୍ଦୁଝରରେ ପ୍ରତିବର୍ଷ ପରି ବାହାର ବ୍ୟବସାୟୀମାନେ ଆସି ରାସ୍ତାକଡରେ ତାଳସଜର ପସରା ମେଲି ବ୍ୟବସାୟ କରି ବେଶ କିଛି ରୋଜଗାର କରିଥାନ୍ତି। ଖରାଦିନ ଫଳ ତରଭୂଜ, ପଇଡ, ଆମ୍ବର ଚାହିଦା ସହିତ ତାଳସଜର ଚାହିଦା ମଧ୍ୟ ଅଧିକ ରହିଛି। ତାଳସଜର ସ୍ବାଦ ନିଆରା। ଲୋକମାନେ ତାଳସଜ କିଣିବା ନିମନ୍ତେ ବେଶ ଭିଡ ଜମାନ୍ତି। ଜଣେ ବ୍ୟବସାୟୀ ଗୋଲକ ବେହେରାଙ୍କୁ ବ୍ୟବସାୟ ବାବଦରେ ପଚାରିବାରୁ ସେମାନେ ଯାଜପୁର ଜିଲ୍ଲା ହରିପୁରରୁ ଖରାଦିନେ ପ୍ରତିବର୍ଷ କେନ୍ଦୁଝରକୁ ଆସନ୍ତି। କେନ୍ଦୁଝରରେ ତାଳସଜର ଗ୍ରାହକ ଅନ୍ୟ ସ୍ଥାନ ଅପେକ୍ଷା ଅଧିକ। ପ୍ରତି ଦୁଇ ତିନିଦିନ ଅନ୍ତରରେ ସେମାନେ ଛୋଟ ଟ୍ରକରେ ତାଳ ଆଣନ୍ତି। ଏଠାରେ ବ୍ୟବସାୟ କରି ଭଲ ଦୁଇପଇସା ରୋଜଗାର କରି ପରିବାର ଚଳାନ୍ତି ବୋଲି ଅନ୍ୟ ଜଣେ ବ୍ୟବସାୟୀ ଶଙ୍କର ବେହେରା କହିଛନ୍ତି। କେନ୍ଦୁଝରର ଗ୍ରାହକ ବହୁତ ଶାନ୍ତ ଓ ସରଳ। ୧୦ଟଙ୍କା ବଦଳରେ ୨ରୁ ୩ଟି ତାଳ ସେମାନେ ବିକ୍ରୟ କରୁଥିବା ଜଣାପଡିଛି। ତେବେ ମଝିରେ ମଝିରେ ସେମାନେ ରାସ୍ତାକଡରେ ବ୍ୟବସାୟ କରୁଥିବାରୁ ମ୍ୟୁନିସିପାଲିଟି ପକ୍ଷରୁ ସେମାନଙ୍କୁ ଉଠାଇ ଦିଆଯାଉଥିବା ବ୍ୟବସାୟୀମାନେ ଅଭିଯୋଗ କରିଛନ୍ତି।