ସମ୍ବଲପୁର, ୭।୬ (ବ୍ୟୁରୋ)- ଅଦିନିଆ ବର୍ଷା ସହ କୁଆପଥର ମାଡରେ ରବି ଧାନ ସହିତ ପନିପରିବା, ଡାଲି, ଫଳ ଜାତୀୟ ଫସଲ ନଷ୍ଟ ହୋଇଥିଲା। ଏଥିଯୋଗୁ ଚାଷୀ ବହୁ କ୍ଷତି ସହିଥିଲେ । କୃଷି ଓ ରାଜସ୍ବ ବିଭାଗ ପକ୍ଷରୁ କ୍ଷୟକ୍ଷତି ଆକଳନ ହୋଇଛି। ହେଲେ ଆଜି ପର୍ଯ୍ୟନ୍ତ କ୍ଷତିପୂରଣ ମିଳିନାହିଁ। ଋଣ ପରିଶୋଧ ଚିନ୍ତାରେ ଚାଷୀ ସରକାରୀ ସହାୟତାକୁ ଅପେକ୍ଷା କରିଛି। ତଥାପି ହାରି ନାହିଁ । ପୁଣି ସେ ତା କାମରେ ଲାଗି ପଡିଛି । ରବି ଫସଲରେ ଭାଙ୍ଗି ପଡିଥିବା ଆର୍ଥିକ ମେରୁଦଣ୍ଡକୁ ସଳଖିବା ପାଇଁ ପୁଣି ଥରେ ସେ ଜମିକୁ ଓହ୍ଲାଇଛି।
ଚଳିତ ବର୍ଷ ଜୁନ ୧୦ରୁ ମୌସୁମୀ ବର୍ଷା ଆରମ୍ଭ ହେବାର ସମ୍ଭାବନା ରହିଛି ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ଏଥିପାଇଁ ଚାଷୀ ତା’ର ପ୍ରସ୍ତୁତି ଆରମ୍ଭ କରିଛି। ଚଳିତ ଖରିଫରେ ପାଣିପାଗ, ଦଇବ ସାହା ହେଲେ ଅମଳ ଭଲ ହେବ ବୋଲି ଚାଷୀ ଆଶା ରଖିଛି। ପ୍ରାୟ ଏକମାସ ହେବ ଜିଲାର ବିଭିନ୍ନ ଅଞ୍ଚଳରେ ଅଦିନିଆ ବର୍ଷା ଲାଗିରହିଛି । ଏହା ବୁଣା ଧାନ ପାଇଁ ଚାଷୀଙ୍କୁ ସୁହାଇଛି । ଅଣଜଳସେଚିତ ଅଞ୍ଚଳରେ ଚାଷୀ ଚାଷ କାମ ଆରମ୍ଭ କରିଛି । ଜିଲାର ଯୁଯୁମୁରା, ରେଢାଖୋଲ, ନାକଟିଦେଉଳ, ଜମନକିରା, କୁଚିଣ୍ଡା ଆଦି ବ୍ଲକ ଅଞ୍ଚଳର ଚାଷୀ ବୁଣା ଧାନ କରୁଛନ୍ତି । ଏପଟେ ଜଳସେଚନ ଅଞ୍ଚଳର ଜମିରେ ସୁଖା ଯୋତ କରାଯାଉଛି । ଏ ସମ୍ପର୍କରେ ଜିଲା ମୁଖ୍ୟ କୃଷି ଅଧିକାରୀ ସନ୍ତୋଷ କୁମାର ରାୟ କହିଛନ୍ତି, ମୌସୁମୀ ବର୍ଷା ହେଲେ ଚାଷୀ ବୁଣା ଧାନ କରି ପାରିବେ ନାହିଁ । ତେଣୁ ବୁଣାଧାନ ପାଇଁ ଏହା ଉପଯୁକ୍ତ ସମୟ । ଧାନ ବୁଣିଲା ପରେ ତାପମାତ୍ରା ଓ ବର୍ଷା ଠିକ ରହିଲେ ଭଲ ଗଜା ହୋଇ ପାରିବ । ନିୟମିତ ବର୍ଷା ହେଲେ କ୍ଷେତରେ ହଳ ଓ ଟ୍ରାକ୍ଟରରେ ନଙ୍ଗଳ କରିବା ହୋଇ ପାରିବ ନାହିଁ । ଏବେ ଚାଷୀମାନଙ୍କ ପାଇଁ ଆଉ ଏକ ବଡ ସୁଯୋଗ ରହିଛି । ସେମାନେ ଧଣିଚା ଚାଷ କରି ପାରିବେ । ଧଣିଚା ଚାଷ କଲେ କ୍ଷେତରେ ଉର୍ବରତା ଆସିବ । ଜୈବିକ ପଦ୍ଧତିରେ ତାହା ସାର ପରି କାମ ଦେବ । ଏବେ ଧଣିଚା ବୁଣିଲେ ପ୍ରାୟ ଏକମାସ ଭିତରେ ସେହି ଗଛ ମରିଯିବ । ପୁଣି ଚାଷୀ କ୍ଷେତରେ ଧାନ ଫସଲ କରି ପାରିବ । ଗୋଟିଏ ଏକର ପିଛା ୧୦ କେଜି ଧଣିଚା ମଞ୍ଜି ଚାଷୀ ବୁଣି ପାରିବେ । ସେହି ମଞ୍ଜି ଦର କେଜି ପିଛା ୩୫ରୁ ୪୦ ଟଙ୍କା ରହିଛି । ଏଥିରେ ଚାଷୀ ଲାଭବାନ ହୋଇପାରିବ ବୋଲି ସେ କହିଛନ୍ତି।
ଖରିଫ ପାଇଁ ଜିଲାରେ ମୋଟ ୧ ଲକ୍ଷ ୬ ହଜାର ହେକ୍ଟର ଜମିରେ ଧାନ ଚାଷ କରିବାର ଲକ୍ଷ୍ୟ ରହିଛି । ସେଥି ମଧ୍ୟରୁ ୨୦ ହଜାର ହେକ୍ଟର ଜମିରେ ବୁଣା ଧାନ ହୋଇଥାଏ । ଜଳ ସେଚନ ଅଞ୍ଚଳରେ ମଧ୍ୟ ଚାଷୀମାନେ ପୋଖରୀରୁ ପାଣି ନେଇ ପଲ୍ଲା କିଆରି ପ୍ରସ୍ତୁତ କରି ସାରିଛନ୍ତି । ଜୁନ୍ ୧୦ ପରେ କେନାଲରେ ପାଣି ଛଡାଯିବା ପାଇଁ ଆଶା କରାଯାଉଛି । ତେଣୁ ଜଳସେଚନ ଅଞ୍ଚଳରେ ମଧ୍ୟ ଶୀଘ୍ର ଚାଷ କାମ ଆରମ୍ଭ ହୋଇଯିବ । ଚଳିତ ବର୍ଷ ବର୍ଷା ସ୍ବାଭାବିକ ହେବ ବୋଲି ପାଣିପାଗ ବିଭାଗ ସୂଚନା ଦେଇଛି । ତେଣୁ ମରୁଡି, ଗଜା ମରୁଡି ଭଳି ପରିସ୍ଥିତି ଉପୁଜିବ ନାହିଁ ବୋଲି ମୁଖ୍ୟ କୃଷି ଅଧିକାରୀ ରାୟ କହିଛନ୍ତି ।