ନୂଆଦିଲ୍ଲୀ,୨୧।୫: ୟୁଟ୍ୟୁବ୍ ଇନ୍ଫ୍ୟୁଏନ୍ସର ଏବଂ ଟିକ୍ଟିକ୍ କ୍ରିଏଟରଙ୍କ ମଧ୍ୟରେ ଇଣ୍ଟରନେଟ ଓ୍ବାର ନିକଟରେ ଦେଖିବାକୁ ମିଳିଛି। ଏଥି ଯୋଗୁ ଶଟ୍ ଭିଡିଓ ପ୍ଲାଟ୍ଫର୍ମ ଟିକ୍ଟକ୍ର ରେଟିଂ ୪.୬ ଷ୍ଟାରରୁ ୨କୁ ଖସିଯାଇଛି। ଗୁଗଲ ଆପ୍ ଷ୍ଟୋରରେ ଗତ ଗୋଟିଏ ସପ୍ତାହ ମଧ୍ୟରେ ଏଭଳି ଘଟଣା ସାମ୍ନାକୁ ଆସିଛି। ଘଟଣାଟି ଆରମ୍ଭ ହୋଇଥିଲା ଟିକ୍ଟକ୍ କ୍ରିଏଟର ଅମିର ସିଦ୍ଦିକଙ୍କଠାରୁ । ଇନ୍ଷ୍ଟାଗ୍ରାମରେ ୟୁଟ୍ୟୁବରଙ୍କୁ ଚିଡ଼ାଇବା ଭଳି ଏକ ଭିଡିଓ ସେ ପୋଷ୍ଟ କରିଥିଲେ। ୟୁଟ୍ୟୁବରମାନେ ଟିକ୍ଟକ୍ର କଣ୍ଟେଣ୍ଟ ଚୋରି କରୁଥିବା ସେହି ଭିଡିଓରେ ସିଦ୍ଦିକି ଅଭିଯୋଗ ଆଣିଥିଲେ। ବ୍ରାଣ୍ଡ ଭାଲ୍ୟୁ ହରାଇବା ଭୟରେ ୟୁଟ୍ୟୁବର ଏଭଳି କରୁଥିବା ସେ କହିଥିଲେ। କ୍ୟାରିମିନତି ଭାବେ ପରିଚିତ ଲୋକପ୍ରିୟ ରୋଷ୍ଟର ଅଜୟ ନାଗର ସିଦ୍ଦିକିଙ୍କୁ ଏହାର ଜବାବ ଏକ ଭିଡିଓ ମାଧ୍ୟମରେ ଦେଇଥିଲେ। ୟୁଟ୍ୟୁବର ନିୟମ ଏବଂ ସେବା ଉଲ୍ଲଂଘନ କରୁଥିବା ଦର୍ଶାଇ ଏହି ଭିଡିଓଟିକୁ ଏବେ ପ୍ଲାଟ୍ଫର୍ମରୁ ହଟାଯାଇଛି। ଭିଡିଓଟି ଖୁବ୍ କମ୍ ସମୟରେ ମଧ୍ୟରେ ଭଲ ଭିୟୁ ମଧ୍ୟ ହାସଲ କରିଥିଲା। କ୍ୟାରିମିନତିଙ୍କ ଉକ୍ତ ଭିଡିଓଟି ବ୍ୟାନ୍ ହେବା ପରେ ତାଙ୍କ ପ୍ରଶଂସକ ଟିକ୍ଟକ୍ ବିରୋଧରେ ଟ୍ରେଣ୍ଡ କ୍ୟାମ୍ପେନ ଦେଖିବାକୁ ମିଳିଥିଲା। ଟିକ୍ଟକ୍ କ୍ରିଏଟରମାନେ ହିଂସା,ଘୃଣା, ଅଶ୍ଳୀଳତା ଏବଂ ବିଭିନ୍ନ ଆଟାକ ପ୍ରୋତ୍ସାହିତ କରୁଥିବା ଟିକ୍ଟକ୍ର ସମାଲୋଚକ ମଧ୍ୟ ଅଭିଯୋଗ କରିଛନ୍ତି। ଏଭଳି ବିଭିନ୍ନ କାରଣ ଲାଗି ଟିକ୍ଟକ୍ର ରେଟିଂ ଖସିଥିବା ଜଣାପଡିଛି। ଉକ୍ତ ଆପ୍ର ବର୍ତ୍ତମାନ ୨୦୦ ନିୟୁତ ୟୁଜର ଭାରତରେ ଅଛନ୍ତି। ସବୁଠାରୁ ଲୋକପ୍ରିୟ ଆପ୍ ଭାବେ ଏହା ଉଭାହୋଇଛି। ସାରା ବିଶ୍ୱରେ ଏହି ଆପ୍କୁ ୨୦୦ କୋଟି ଡାଉନ୍ଲୋଡ କରାଯାଇଛି।