ନବରଙ୍ଗପୁର ଜିଲାରେ ଖାଉଟି ଠକାମିର ଶିକାର ହେଉଛନ୍ତି। ଏବେ ବି ଜିଲାରେ ମାଣ ଓ ଅଡା କାରବାର ହାଟ ବଜାରରେ ଦେଖିବାକୁ ମିଳୁଛି। ଆଦିବାସୀ ଅଧ୍ୟୁଷିତ ଏହି ଅଞ୍ଚଳରେ ଲୋକଙ୍କ ମଧ୍ୟରେ ଖାଉଟି ସଚେତନତା ଏଯାଏ ଆସି ନାହିଁ। ଫଳରେ ଚାଉଳ ଠାରୁ ଆରମ୍ଭ କରି ନିତ୍ୟ ବ୍ୟବହାର୍ଯ୍ୟ ସାମଗ୍ରୀ କିଣିବା ବେଳେ ଲୋକମାନେ ଠକାମିର ଶିକାର ହେଉଛନ୍ତି। ବିଶେଷକରି ଚାଷୀ ଅଧିକ ଠକାମିର ଶିକାର ହେଉଛନ୍ତି। ଚାଷୀ ଧାନ ଚାଷ କରୁଛନ୍ତି। କିନ୍ତୁ ଅଭାବ ଯୋଗୁ ଅଧିକାଂଶ ଚାଷୀ ନିଜ ପାଇଁ ଆବଶ୍ୟକ ଧାନ ନ ରଖି ବିକ୍ରି କରି ଦେଉଛନ୍ତି। ପରବର୍ତ୍ତୀ ସମୟରେ ବଜାରରୁ ଚାଉଳ ପ୍ୟାକେଟ କିଣି ଘରକୁ ନେଉଛନ୍ତି। ୨୫ କିଲୋ ଚାଉଳ ପ୍ୟାକେଟରେ ରହିଛି ବୋଲି ଭାବି ଘରକୁ ନେଉଛନ୍ତିି। ଓଜନ କରୁନାହାନ୍ତି। ବ୍ୟବସାୟୀ ଏହାର ଭରପୂର ଫାଇଦା ଉଠାଉଛନ୍ତିି। କାରଣ ବାସ୍ତବରେ ପ୍ୟାକେଟରେ ୨୫ କିଲୋ ଓଜନର ଚାଉଳ ରହୁ ନାହିଁ। ଏବେ ନବରଙ୍ଗପୁର ସହରକୁ ୨୨ କିଲୋ ଓଜନର ଚାଉଳ ପ୍ୟାକେଟ ଆସୁଛି। ସୁନ୍ଦର ବସ୍ତାରେ ବିଭିନ୍ନ ଚାକଚକ୍ୟ ବ୍ରାଣ୍ଡ ନାଁ ଦେଇ ଏହାକୁ ବିକ୍ରି କରାଯାଉଛି। ପଡୋଶୀ ରାଜ୍ୟରୁ ନବରଙ୍ଗପୁର ବଜାରକୁ ଏହାର ଚେର ଲମ୍ବିଛି। କେବଳ ଚାଉଳ ନୁହେଁ, ପ୍ୟାକିଂ ହୋଇ ଆସୁଥିବା ଡାଲି, ଅନ୍ୟାନ୍ୟ ସାମଗ୍ରୀରେ ଏଭଳି ଠକାମି କରାଯାଉଛି। ଅନ୍ୟପକ୍ଷେ ମୁଗ, ହରଡ ଡାଲିରେ ଏକା ଭଳି ଲାଗୁଥିବା ଅନ୍ୟ ଏକ ପ୍ରକାର ଡାଲି ମିଶ୍ରିତ କରି ବିକ୍ରି କରାଯାଉଛି। ସେହିଭଳି ପରିବା, ମାଛ ଓ ମାଂସ ବଜାର ଉପରେ ମଧ୍ୟ ପ୍ରଶାସନର ନଜର ରହୁନାହିଁ। ଦର ଉପରେ ନିୟନ୍ତ୍ରଣ ନାହିଁ। ବ୍ୟବସାୟୀ ନିଜର ଇଚ୍ଛା ମୁତାବକ ଦର ବଢାଇ ଚାଲିଛନ୍ତି। ଚାଷୀ ଉପତ୍ାଦିତ ପରିବା ନିଜେ ବଜାରକୁ ଆଣି ବିକ୍ରି କରିବାକୁ ସୁଯୋଗ ପାଉ ନାହିଁ। ବଜାର ଓ ହାଟକୁ ଚାଷୀ ଆସି ବିକ୍ରି କରି ଦି ପଇସା ରୋଜଗାର କରିବା ପୂର୍ବରୁ ରାସ୍ତା ଘାଟରେ ବ୍ୟବସାୟୀ ଜଗି ସେମାନଙ୍କ ଠାରୁ ବିଭିନ୍ନ ଆଳରେ କମ୍ ଦରରେ ପରିବା କିଣି ବଜାରରେ ଚଢା ଦରରେ ବିକ୍ରି କରୁଛନ୍ତିି। ଏଭଳି ପରିସ୍ଥିତିରେ ଖାଉଟି ଓ ଚାଷୀ କିଭଳି ଗତି କରୁଛନ୍ତିି ତାହା ସାଧାରଣରେ ଅନୁମେୟ। ଜିଲାରେ ମାପ ଏବଂ ଓଜନ ବିଭାଗ ରହିଛି, କେବେ ମଧ୍ୟ ଏଦିଗ ପ୍ରତି ଦୃଷ୍ଟି ଦେଉ ନାହାନ୍ତି। ଏନେଇ ଜିଲା ପ୍ରଶାସନ ଏକ ସ୍କ୍ବାଡ ଗଠନ କରି ଖାଉଟି ପ୍ରତି ଗୁରୁତ୍ୱ ଦେବା ସହ ବିଭିନ୍ନ ପ୍ୟାକେଟ ସାମଗ୍ରୀ ଉପରେ ଲେଖାଯାଇଥିବା ଓଜନର ଯାଞ୍ଚ କରିବା ସହ ପରିବା, ମାଛ, ମାଂସ ଦର ନିର୍ଦ୍ଧାରଣ ଉପରେ ଗୁରୁତ୍ୱ ଦେବାକୁ ଦାବି ହେଉଛି।
– ସଦାଶିବ ପ୍ରହରାଜ