ପର୍ଲା, ୫।୩ (ଡି.ଏନ୍.ଏ.)- ସରକାର ଗରିବ୍ ଦୁଖି, ଦିବ୍ୟାଙ୍ଗମାନକର ଲାଗି ମାଲମାଲ ଯୋଜନା କାଯ୍କାରୀ କରୁଛନ୍। ହେଲେ ଅନେକ ଜାଗାରେ ପରଶାସନିକ ଅଧ୍କାରୀ, କରମ୍ଚାରୀକଁର ଅନ୍ଦେଖା ଲାଗି ହକ୍ଦାର ହିତାଧିକାରୀ ନିଜର ହକ୍ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ବୋଡ଼େନ ପଁଚେତ୍ ବାରିକପଡ଼ା ଗାଁରେ। ଇ ଗାଁର ଦୁଇ ଦିବ୍ୟାଙ୍ଗ ଭାଇବହେନ୍ ସରକାରୀ ଯୋଜନାରୁ ବଁଚିତ୍ ହେଇଥିବାର ତାକର ପରିବାର ଲୋକ ଅଭିଯୋଗ କରିଛନ୍।
ସୂଚନା ଅନ୍ସାରେ ବାରିକପଡ଼ାର ପିତାମ୍ବର ବାରିକ(୪୫)। ପରିବାର କହେଲେ ମାଏକିନା ରମଣି(୩୮) ପୁଓ କାରଣ(୨୪), ମଣ୍ଟୁ(୧୮) ଆର ଝି’ ଚୁମକି(୨୨)କୁଁ ନେଇ ସଁସାର। ପୁଓ କାରଣ ଆର ଝି’ ଚୁମକି ଦୁହେଁ ଜନ୍ମୁ ମାନ୍ସିକ ଭିନ୍ନକ୍ଷମ। ଏନ୍ତା କି ଦୁହେଁ ଭଲଭାବେ ଦେଖି ନାଇଁପାରବାର। ସ୍ବାସ୍ଥ୍ୟ ବିଭାଗ ତରଫୁ ଦୁଇ ଭାଇବହେନ୍କେ ୯୦ ପରତିଶତ ଦିବ୍ୟାଙ୍ଗ ପରମାନପତର ବି ମିଲିଛେ। କାରଣ ୫ଶହ ଆର ଚୁମକି ୭ଶହ ଟଁକା ଭତା ପାଉଛନ୍ ସତ୍। ହେଲେ ଭତା ଟଁକାକେ ଛାଡ଼ିଦେଲେ ଦୁଇ ଭାଇବହେନ୍ ବାକି ସବୁ ସରକାରୀ ସୁବିଧା ସୁଯୋଗରୁ ବଁଚିତ୍ ହେଇ ରହିଛନ୍। କାରଣ ଆର ଚୁମକି ଜନମ ବେଲେ ଠିକ୍ଠାକ୍ ଥିଲେ। ହେଲେ ଅଭାବ ଅନାଟନ, ଭୁଖମରି କାରନ୍ରୁ ଦୁହେଁ ପୁଷ୍ଟିହୀନତାର ଶିକାର ହେଇଥିଲେ। ବଏସ୍ ବଢ଼ବାର ସଂଗେ ଦୁହେଁ ମାନ୍ସିକ ଭିନ୍ନକ୍ଷମ ପାଲଟିଗଲେ ବଲି ପରିବାର ଲୋକ୍ କହିଛନ୍। ଇଆଡ଼େ ଘର ଅଭାବୁ ପିତାମ୍ବର ପରହର କଁାଥିକେ ଲଗେଇ ଝାଟିମାଟି କୁରିଆଟେ କରି ଉପରେ ପଲିଥିନ୍ ଢାପି କୁଟୁମବସିଆ ମୁଡ଼ ଗୁଁଜିଛନ୍। ପିତାମ୍ବର ଝନେ ନିହାତି ଗରିବ୍ ଲୋକ, ଜମିବାଡ଼ି ସଁପତି ବଲି କିଛି ନାଇଁ। ଫିଦିନ ସଖାଲ ପାଏଲେ କୁଲିମଜୁରି କଲେଯାଇ ଘରର ଚୁଲି ଜଲୁଛେ। ସେ ଯାହା କମଉଛନ୍ ସେଟା ପରିବାରର ପେଟ୍କେ ଅଁଟ୍ଲେ ଦିହିକେ ନାଇଁ। ଏନ୍ତାଥି ଟଁକା ପଏସା ଅଭାବୁ ଝି’ପୁଓକର ଚିକିଛା କରେଇ ନାଇଁ ପାରୁଥିବାର ପିତାମ୍ବର କହିଛନ୍। ସେନ୍ତା ସରକାରୀ ନିୟମ ହିସାବେ ଦୁଇ ଭାଇବହେନ୍ ଖାଏଦ୍ ସୁରକ୍ଷା ଆର ଆବାସ ଯୋଜନାରେ ସାମିଲ ହେବାର କଥା। ପିତାମ୍ବର ଝି’ପୁଓକର ନଁାରେ ରାଶନକାର୍ଡ, ଆବାସ ଯୋଜନାରେ ଘରଖଁଡ଼େ ମିଲବା ବଲି କାଗଜପତର ଦେଇ ପଁଚେତ୍ରୁ ବ୍ଲକ ତକ୍ ଲିଖିତ ଆବେଦନ କରି ନିରାଶ ହେଇଥିବାର କହିଛନ୍। ଇ ଦିବ୍ୟାଙ୍ଗ ଭାଇବହେନ୍ ଉପରେ ଜିଲା ଆର ବ୍ଲକ ପରଶାସନ ଦୁରୁଷ୍ଟି ଦେଇ ସବୁ ପରକାର ସରକାରୀ ସାହାଯ୍ ଯୁଗେଇ ଦେବାକେ ଗାଁବାସୀ ଦାବି କରିଛନ୍। ଇ ବାବ୍ଦେ ଧର୍ମଗଡ଼ ଉପଜିଲାପାଳ ପଦ୍ମନାଭ ବେହେରାକୁଁ ପଚ୍ରାଲାରୁ ଘଟନାର ତଦଁତ୍ କରାଯାଇ ଦୁହିଁକୁ ସରକାରୀ ସାହାଯ୍ ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ।