ଅନୁଗୋଳ ଅଫିସ,୨୩।୧ – ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ରୋଗୀ କଲ୍ୟାଣ ସମିତିର କାର୍ଯ୍ୟନିର୍ବାହୀ କମିଟି ବୈଠକ ବୁଧବାର ଅନୁଷ୍ଠିତ ହୋଇଯାଇଛି। ଜିଲାପାଳ ମନୋଜ କୁମାର ମହାନ୍ତି ଏଥିରେ ଅଧ୍ୟକ୍ଷତା କରିଥିଲେ। ବୈଠକରେ ମୁଖ୍ୟ ଚିକିତ୍ସାଳୟର ଶଯ୍ୟା ସଂଖ୍ୟା ୧୯୨ ରୁ ୩୦୦କୁ ବୃଦ୍ଧି କରିବା ପାଇଁ ଆବଶ୍ୟକ ଜାଗା ସମ୍ପର୍କରେ ଆଲୋଚନା କରାଯାଇଥିଲା। ଚିକିତ୍ସାଳୟରେ ଲାଗିଥିବା ୫ ଶହ କେଭି ବିଦ୍ୟୁତ୍ ଟ୍ରାନ୍ସଫର୍ମରକୁ ଆସନ୍ତା ୭ ଦିନ ମଧ୍ୟରେ କାର୍ଯ୍ୟକ୍ଷମ କରିବା, ପରିସର ପରିସ୍କାର ରଖିବା ସହ ବର୍ଜ୍ୟବସ୍ତୁ ନିୟମିତ ସଫା କରିବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ।
ସେହିପରି ଜରୁରୀସେବାର ନିୟୋଜିତ କର୍ମଚାରୀମାନଙ୍କୁ ଚିକିତ୍ସାଳୟ ପରିସରରେ ରହିବାକୁ ଗୃହ ଯୋଗାଇ ଦେବା, ଅଲଟ୍ରାସାଉଣ୍ଡ ମେଶିନ ଚଲାଇବା ପାଇଁ ବିଶେଷଜ୍ଞ ଡାକ୍ତର ନିୟୋଜିତ କରିବା, ଡିଜିଟାଲ ଜେରକ୍ସ କାର୍ଯ୍ୟକ୍ଷମ ଉପରେ ଗୁରୁତ୍ୱାରୋପ କରାଯାଇଥିଲା। ରୋଗୀମାନଙ୍କୁ ଉତ୍ତମମାନର ଖାଦ୍ୟ ଦିଆଯାଉଛି କି ନାହିଁ ତାର ତଦାରଖ କରାଯିବ। ଏଥିପାଇଁ ଜଣେ ଡାକ୍ତରଙ୍କ ଅଧ୍ୟକ୍ଷତାରେ ଏକ କମିଟି ରୋଷେଇ ଶାଳକୁ ଅଚାନକ ପରିଦର୍ଶନ କରି ଖାଦ୍ୟରମାନ ପରଖିବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ। ଟ୍ରକ୍ ମାଲିକ ସଂଘ ଦ୍ୱାରା ଚିକିତ୍ସାଳୟ ପରିସରରେ ଥିବା କ୍ୟାବିନ୍ଗୁଡ଼ିକୁ ଠିକ୍ ଭାବେ ମରାମତି କରିବା, ମୃତଦେହ ବ୍ୟବଚ୍ଛେଦ ଗୃହ ପାଇଁ ଏକ ପାଚେରି ନିର୍ମାଣ, ଡ୍ରେସିଂ ରୁମ୍ର ସମ୍ପ୍ରସାରଣ କରିବା ଓ ପ୍ରତୀକ୍ଷାଳୟରେ ଅଧିକ ଚେୟାର ବ୍ୟବସ୍ଥା କରିବାକୁ ସଦସ୍ୟମାନେ ପ୍ରସ୍ତାବ କରିଥିଲେ। ଡାକ୍ତରଖାନା ପରିସରରେ ରୋଗୀ ଓ ସେମାନଙ୍କ ସମ୍ପର୍କୀୟଙ୍କ ପାଇଁ ଦୁଗ୍ଧ ଯୋଗାଇଦେବା ସହ ଅନ୍ୟାନ୍ୟ ଆବଶ୍ୟକ ସାମଗ୍ରୀର ବିକ୍ରୟ ନିମନ୍ତେ ଜିଲା ଖଣିଜ ପାଣ୍ଠିରୁ ଏକ ପାର୍ଲର ପ୍ରତିଷ୍ଠା କରାଯିବ। ଚିକିତ୍ସାଳୟରେ ଚାଲୁଥିବା ଡାଏଲିସିସ୍ରେ ୟୁନିଟ୍କୁ ଜେନେରେଟର ଯୋଗାଇ ଦିଆଯିବ ବୋଲି ସ୍ଥିର ହୋଇଥିଲା। ଖୁବ୍ଶୀଘ୍ର ଆଉ ୨ଟି ଡାଏଲିସିସ୍ ୟୁନିଟ୍ ପ୍ରତିଷ୍ଠା କରାଯିବା ସହିତ ଚିକିତ୍ସାଳୟ ପରିସରରେ କୌଣସି ହୋଟେଲ କିମ୍ବା କ୍ୟାଣ୍ଟିନ ରହିବ ନାହିଁ ବୋଲି ନିଷ୍ପତ୍ତ ନିଆଯାଇଥିଲା। ଅନ୍ୟମାନଙ୍କ ମଧ୍ୟରେ ଜିଲା ପରିଷଦ ସଭାପତି ବାସନ୍ତୀ କିଷାନ, ଅତିରିକ୍ତ ଜିଲାପାଳ ତପନ କୁମାର ଶତପଥୀ, ଆଇନଜୀବୀ ଭବାନୀପ୍ରସାଦ ମିଶ୍ର, ସାମାଜିକ କର୍ମୀ କୁଞ୍ଜ ବିହାରୀ ଦାସ, ଜନସ୍ବାସ୍ଥ୍ୟ ବିଭାଗ ନିର୍ବାହୀ ଯନ୍ତ୍ରୀ ମୃତ୍ୟୁଞ୍ଜୟ ପାଣି, ଏଡିଏମ୍ଓ (ମେଡିକାଲ) ଡାକ୍ତର ପ୍ରତାପ ଚନ୍ଦ୍ର ବେହେରା, ଲାଉଚନ୍ଦ୍ର ତନ୍ତି, ପତଞ୍ଜଳି ଯୋଗ ସମିତିର ଅଭୟ ରାୟ, ସଦସ୍ୟ ପ୍ରିୟଦର୍ଶୀ ପଟ୍ଟନାୟକ, ମେଡିକାଲ ମ୍ୟାନେଜର ଦେବାଶିଷ ଦାସ ପ୍ରମୁଖ ଯୋଗ ଦେଇଥିଲେ। ଜନସ୍ବାସ୍ଥ୍ୟ ଅଧିକାରୀ ଡାକ୍ତର ଅମରେନ୍ଦ୍ରନାଥ ମହାନ୍ତି ସ୍ବାଗତ ଭାଷଣ ଦେଇଥିଲେ।