ପାରାଦୀପ,୨୧ା୨(ସ୍ବ.ପ୍ର.):ଦେଶ, ରାଜ୍ୟ ଏବେ ବିକାଶ ଅଭିମୁଖେ ଗତି କରୁଛି ବୋଲି ସରକାରୀ ଭାବେ ପ୍ରଚାର ପ୍ରସାର ଚାଲିଛି। ମନ୍ଦିର, ଷ୍ଟାଡିୟମ, ରାସ୍ତା, କାନ୍ଥ ବାଡରେ ସୌନ୍ଦର୍ଯ୍ୟକରଣ କରାଯାଉଛି। କିନ୍ତୁ ସାଧାରଣ ଲୋକଙ୍କ ସ୍ବାର୍ଥ, ସୁରକ୍ଷା, ନିରାପତ୍ତା ଜଡ଼ିତ ଥିବା ସରକାରୀ କାର୍ଯ୍ୟାଳୟ ପ୍ରତି ଅଣଦେଖା କରାଯାଉଛି। ସେମିତି ଏକ ବିଭାଗ ଓ ବିଭାଗୀୟ ଅଧିକାରୀଙ୍କ କାର୍ଯ୍ୟାଳୟ ଜଗତ୍ସିଂହପୁର ଜିଲା ପାରାଦୀପରେ ଦେଖିବାକୁ ମିଳିଛି। ତାହା ହେଲା ଖାଦ୍ୟ ସୁରକ୍ଷା ଅଧିକାରୀଙ୍କ କାର୍ଯ୍ୟାଳୟ। ଗୋଟିଏ ଛୋଟ ଏୟାର ବ୍ୟାଗ ମଧ୍ୟରେ ଅଫିସର ସମସ୍ତ ଆସବାବପତ୍ର। ସ୍ବତନ୍ତ୍ର କାର୍ଯ୍ୟାଳୟ ଗୃହ ନାହିଁ। ଅଧିକାରୀ ଜଣକ ବିଜୁ ମେମୋରିଆଲ ହସ୍ପିଟାଲର ଉପର ମହଲାରେ ଥିବା ଇଞ୍ଜେକସନ୍ ହଲ ଭିତରେ ବସୁଛନ୍ତି। କାର୍ଯ୍ୟାଳୟ ନ ଥିବାରୁ ବସିବା ପାଇଁ ଚୌକି, ଟେବୁଲ, ନାହିଁ। ଫାଇଲ ନାହିଁ କି ଫାଇଲ ରଖିବା ପାଇଁ ଆଲମାରୀ ନାହିଁ। ଇଞ୍ଜେକସନ୍ ହଲ ମଧ୍ୟରେ ଯେଉଁଦିନ ଟିକାକରଣ ଥାଏ ସେଦିନ ଅଫିସର ବାହାର ବାରଣ୍ଡାରେ ସେମାନଙ୍କ ପାଇଁ ଥିବା ଚୌକି ଆଣି ପକାଇ ବସିଥାନ୍ତି। ଏପରି ଏକ ଅଫିସ ପାରାଦୀପରେ ଅଛି ବୋଲି ଊଣା ଅଧିକ ଲୋକଙ୍କ ପାଖରେ ସୂଚନା ନ ଥିବା କହିଲେ ଚଳେ।
ଜଗତ୍ସିଂହପୁର ଜିଲାରେ ପୂର୍ବରୁ ମାତ୍ର ଜଣେ ଖାଦ୍ୟ ସୁରକ୍ଷା ନିରୀକ୍ଷା ଅଧିକାରୀ ଥିଲେ। ତାଙ୍କ ଅଫିସ ଜଗତ୍ସିଂହପୁର ଜିଲା ମୁଖ୍ୟ ଚିକିତ୍ସାଳୟ ପରିସର ମଧ୍ୟରେ ଚାଲିଛି। ୨୦୨୨ ଜୁଲାଇରେ ଓଡ଼ିଶାର ଅନେକ ସ୍ଥାନରେ ନୂଆ ଅଧିକାରୀ ନିଯୁକ୍ତି ପାଇଛନ୍ତି। ଏବେ ସମଗ୍ର ରାଜ୍ୟରେ ୫୩ ଜଣ ଅଧିକାରୀ ଥିବା ପାରାଦୀପ ଖାଦ୍ୟ ସୁରକ୍ଷା ନିରୀକ୍ଷା ଅଧିକାରୀ ପ୍ରୀତିଶ ଦାସ କହିଛନ୍ତି। ଏହା ଏବେ ଡିପିଏଚଓ (ଡିଷ୍ଟ୍ରିଟ ପବ୍ଲିକ ହେଲଥ୍ ଅଫିସର)ଙ୍କ ନିୟନ୍ତ୍ରଣରେ ଅଛି। ପରୋକ୍ଷ ଭାବେ ଜିଲା ମୁଖ୍ୟ ଚିକିତ୍ସାଧିକାରୀ ଦେଖୁଛନ୍ତି। ପାରାଦୀପ ପାଇଁ ମୋତେ ପୋଷ୍ଟିଂ କରାଯାଇଛି, କିନ୍ତୁ କୌଣସି ଆନୁଷଙ୍ଗିକ ଆସବାବପତ୍ର ଦିଆଯାଇନାହିଁ ବୋଲି ଦାସ କୁହନ୍ତି। ନିଜର ଲ୍ୟାପଟପ୍ ବ୍ୟାଗ ଧରି କାମ କରୁଛି। ଏଥିରେ କିପରି ସହରାଞ୍ଚଳରେ ଥିବା ହୋଟେଲଗୁଡିକରେ ବିକ୍ରି ହେଉଥିବା ଖାଦ୍ୟର ମାନ ଯାଞ୍ଚ କରିବି ବୋଲି ସେ ନିରାଶ ବ୍ୟକ୍ତ କରିଥିଲେ।