ଖୁଣ୍ଟୁଣୀ,୪।୫(ଡି.ଏନ.ଏ.): ଖୁଣ୍ଟୁଣୀ ବନାଞ୍ଚଳରେ ସୋମବାର ସକାଳେ ବନ ବିଭାଗ ପକ୍ଷରୁ ପାଟ୍ରୋଲିଂ କରୁଥିବାବେଳେ ଶିକାରୀ ପାଇଁ ଆସିଥିବା ୩ଜଣଙ୍କୁ ଗିରଫ କରିଛି। ସେମାନେ ହେଲେ ଏହି ଥାନା ଅଞ୍ଚଳର ଡାଳୁଆ ଗ୍ରାମର ନରେନ୍ଦ୍ର ବେହେରା, ସୁଶା ଦେହୁରୀ ଓ ପାର୍ବତୀପୁର ଗ୍ରାମର କାହ୍ନୁ ମୂର୍ତ୍ତି। ଏମାନଙ୍କଠାରୁ ୨୫ଟି ଫାସ, ଧୁନତୀର, ହେଡ ଲାଇଟ ଜବତ କରାଯାଇଛି। ଏମାନଙ୍କୁ ଧରି କାର୍ଯ୍ୟାଳୟକୁ ଅଣାଯାଉଥିବା ବେଳେ ପୂର୍ବାହ୍ନ ୧୧ଟାବେଳେ ସୁବାଷୀ ରିଜର୍ଭ ଜଙ୍ଗଲ ମଧ୍ୟରେ ସନ୍ଦେହଜନକ ଭାବେ ବନ୍ଧୁକ ଧରି ବୁଲୁଥିବା ୫ଜଣଙ୍କୁ ଗିରଫ କରାଯାଇଥିଲା। ସେମାନଙ୍କୁ ପଚରାଉଚୁରା ପରେ ଶିକାର କଥା ଜଣାପଡ଼ିଥିଲା। ସେମାନେ ହେଲେ ପାନିଆ ଗ୍ରାମର ପ୍ରଶାନ୍ତ ଦାସ, ନନ୍ଦିଆ ହେଁସା, ଡାବର ପୂର୍ତ୍ତି, ନନ୍ଦିଆ କୁଜାଣ ଓ କପୁର ସିଂ ଗ୍ରାମର ପ୍ରତାପ ନାଏକଙ୍କୁ ବିଭାଗକୁ ନିଆଯାଇଛି। ଏମାନଙ୍କଠାରୁ ମଧ୍ୟ ହରିଣ ଚମଡ଼ା, ୨ଟି ହରିଣ ସିଂଘ ଓ ଗୋଟିଏ ବନ୍ଧୁକ ଜବତ କରାଯାଇଛି। ପାଟ୍ରୋଲିଂରେ ରେଞ୍ଜର ମାଗୁଣୀ ଚରଣ ବେହେରା, ବନପାଳ, ଅକ୍ଷୟ ପ୍ରଧାନ, ଦିବ୍ୟସିଂହ ପରିଡ଼ା, ବନରକ୍ଷୀ ରମାକାନ୍ତ ବଳବନ୍ତରାୟ, ଆଶିଷ ନାୟକ, ରାକେଶ ଦଳେଇ, ବିଜୟ ମଙ୍ଗରାଜ, କାବେରୀ ନାଏକ, ସଙ୍ଗୀତା ପ୍ରଧାନ ଓ ଚନ୍ଦନ ବେହେରା ପ୍ରମୁଖ ଚଢ଼ାଉ କରିଥିଲେ। ଏହି ୮ ଶିକାରୀଙ୍କୁ ମଙ୍ଗଳବାର କୋର୍ଟଚାଲାଣ କରାଯିବ ବୋଲି ରେଞ୍ଜର ବେହେରା କହିଛନ୍ତି। ସୂଚନାଯୋଗ୍ୟ, ପ୍ରାୟ ସମୟରେ ଏହି ବନାଞ୍ଚଳରେ ବିଭାଗ ଅଧିକାରୀ ଗୁରୁତ୍ୱ ଦେଉ ନ ଥିବାରୁ ଶିକାରୀମାନେ ବେଆଇନ ଭାବେ ବନ୍ୟଜନ୍ତୁଙ୍କୁ ଶିକାର କରି ମାଂସ ବିକ୍ରି କରୁଛନ୍ତି।