ଦଶପଲ୍ଲା,୧୭ା୮(ଡି.ଏନ.ଏ.): ସମସ୍ତଙ୍କୁ ବିଦ୍ୟୁତ୍ ଆଲୋକ ଯୋଗାଣ ନିମନ୍ତେ ସରକାର ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି। ହେଲେ କେତେଜଣ କର୍ମଚାରୀଙ୍କ ଅବହେଳା ଯୋଗୁ ଜନସାଧାରଣ ବିଦ୍ୟୁତ୍ ଆଲୋକରୁ ବଞ୍ଚତ୍ତ ହେଉଛନ୍ତି। ଏହାର ଏକ ନମୁନା ଦେଖିବାକୁ ମିଳିଛି ଦଶପଲ୍ଲା ବ୍ଲକର ଆଦିବାସୀ ବହୁଳ ନୂଆଗଁା ପଞ୍ଚାୟତରେ। ଏହି ପଞ୍ଚାୟତର ୪ ଗ୍ରାମକୁ ବିଦ୍ୟୁତ୍ସେବା ପ୍ରଦାନ ନିମନ୍ତେ ଗ୍ରାମମୁଣ୍ଡରେ ଟ୍ରାନ୍ସଫର୍ମର ବସିବା ସହ ବିଦ୍ୟୁତ୍ ଖୁଣ୍ଟ ପୋତାଯାଇଥିଲେ ମଧ୍ୟ ବିଦ୍ୟୁତ୍ ଯୋଗାଣ ହୋଇପାରୁ ନାହିଁ। ଗ୍ରାମଗୁଡ଼ିକ ହେଲା ସଲଡଝୋଲା, ବାଙ୍କସାହି, ଦୁଆରୀସାହି ଓ ଭୋଗବାଡ଼ି। ଏସବୁ ଗ୍ରାମର ପ୍ରାୟ ୫୦ ପରିବାର ବିଦ୍ୟୁତ୍ ସଂଯୋଗ ଅପେକ୍ଷାରେ ଅଛନ୍ତି। କେତେଜଣଙ୍କ ଘରେ ବୋର୍ଡ ମଧ୍ୟ ବସାଯାଇଛି। ଗ୍ରାମବାସୀଙ୍କ କହିବା କଥା, ପ୍ରାୟ ୭ମାସ ହେଲା ଖୁଣ୍ଟ ପଡ଼ିଥିଲେ ସୁଦ୍ଧା ବିଦ୍ୟୁତ୍ ସଂଯୋଗ କରାଯାଇ ନାହିଁ। ଏ ସମ୍ପର୍କରେ ବିଭାଗୀୟ କାର୍ଯ୍ୟାଳୟରେ ବାରମ୍ବାର ଅଭିଯୋଗ କଲେ ବି କୌଣସି ପ୍ରତିକାର ହେଉନାହିଁ ବୋଲି ପୂର୍ବତନ ଜିଲାପରିଷଦ ସଭ୍ୟ କିଶୋର ଦଳବେହେରା ଅଭିଯୋଗ କରିଛନ୍ତି। ଉକ୍ତ ଅଞ୍ଚଳ ନୂଆଗଁା ବ୍ଲକ ବିଦ୍ୟୁତ୍ ବିଭାଗ ଅଧୀନରେ ଥିବାରୁ ବିଭାଗୀୟ କନିଷ୍ଠ ଯନ୍ତ୍ରୀ ଏନ୍ ଶ୍ରୀନିବାସ ରାୟଙ୍କୁ ଯୋଗାଯୋଗ କରିବାରୁ ସେ ଏନ୍ଟିପିସି କର୍ମଚାରୀଙ୍କ ସହ ଆଲୋଚନା କରି ଉକ୍ତ ଗ୍ରାମଗୁଡିକୁ ଶୀଘ୍ର ବିଦ୍ୟୁତ୍ ଯୋଗାଣ ବ୍ୟବସ୍ଥା କରିବେ ବୋଲି ମତପ୍ରକାଶ କରିଥିଲେ।