ବିନିକା,୧୦।୯(ଡି.ଏନ୍.ଏ.):
ଆମର ରାଏଜେ ବାରବାସେ ୧୩ ପରବ୍ ପାଲନ୍ ହେଉଛେ। ସେ ଭିତ୍ରୁ ଖୁଦୁରୁକୁଣୀ ଓଷା ଅଲଗ୍ ଆଏ। ଇ ଓଷା ଫିବଛର ଭୁଦୋମାସର ୪ ପାଲି ରଏବାର ପାଲନ୍ କରାଯାଏସି। ମା’ବହେନ୍ମାନେ ଇ ଉଷାକେ ନିଷ୍ଠାର ସହିତ ପାଲନ୍ କରସନ୍। ସେନ୍ତା ସୁବର୍ଣ୍ଣପୁର ଜିଲା ବିନିକା ବ୍ଲକର ଅନେକ ଗଁାଗଁଡ଼ାରେ ଗଲା ରଏବାର ଧୁମ୍ଧାମ୍ରେ ଖୁଦୁରୁକୁଣୀ ଉଷା ଉଦ୍ଯାପିତ ହେଇଛେ। ଗଲା ୧୮ା୮ା୨୦୧୯ ତାରିଖ ରଏବାରନୁ ଆରମ୍ ହେଇଥିବାର ଇ ଓଷା ୮ା୯ା୨୦୧୯ ରଏବାର ଉଦ୍ଯାପିତ ହେଇଛେ।
ଇ ପୂଜାରେ ମା’ ବହେନ୍ମାନେ ନିଜର ଭାଇ, ପରିବାରର ମଂଗଲକାମନା କରି ଉପାସ ରହେବାର ସଂଗେ ସଖାଲୁ ଗଧାବୁଡ଼ା ସାରି ସଫା ଲୁଗା ପିଁଧି ଶିବକଁର ପୂଜାପାଠ୍ କରସନ୍। ସେନ୍ତା ବେଲବୁଡ଼େ ମା’ମଙ୍ଗଳାକଁର ପୂଜାପାଠ୍ କରସନ୍। ଇ ପୂଜାରେ ମା’ମଙ୍ଗଳାକଁର ପାସେ ୧୨ ପରକାରର ଫଲମୂଲ ଲାଗ୍ସି। ପୂଜା ଉତାରୁ ଝନେ ବାମ୍ହନ ଓଷେଇତିମାନକୁ ବ୍ରତ କଥା ପଢ଼ି ଶୁନାସନ୍। ରାତିରେ ପୂଜା ସଏଲା ଉତାରୁ ମା’ମାନେ ପରସାଦ ପାଏସନ୍। ଏନ୍ଥେଇ ମା’ମାନେ ଭୁଦୋର ୪ ପାଲି ରଏବାର ପୂଜା କରବାର ରିକ୍ମା କେନ୍କାଲୁ ଚଲିଆସୁଛେ। ଶେଷ୍ ରଏବାର ଓଷେଇତିମାନେ ପିଠାମଡା, ନାନା ଜାତିର ମିଠା ମା’ମଙ୍ଗଳାକଁର ପାସେ ଭୋଗ୍ ଲଗାସନ୍। ସବୁପାଲି ଝନେ ବାମ୍ହନ ଇଷେଇତିମାନକୁ ବ୍ରତ କଥା ପଢ଼ି ଶୁନାବାର ସଂଗେ ପୂଜାପାଠ୍ କରସନ୍। ଏନ୍ଥେଇ ଗଲା ରଏବାର ବିନିକା ବ୍ଲକର ଭିନେ ଭିନେ ଗଁାରେ ଓଷେଇତିମାନେ ଖୁଦୁରୁକୁଣୀ ଓଷା ପାଲନ କରିଥିଲାବେଲେ ସିଂଘିଯୁବା ଗଁାରେ ବିପ୍ଲବରଂଜନ ଦାଶ, କଦଳୀପାଲି ଆର ଖଇରମାଲ ଗଁାରେ ବଳରାମ ପାଢ଼ୀ ବ୍ୟାସ ହିସାବେ ଖୁଦୁରୁକୁଣୀ ବ୍ରତ କଥା ପଢ଼ି ଓଷେଇତିମାନକୁ ଶୁନେଇଥିଲେ। ସୋମବାର ପହପହନୁ ଓଷେଇତିମାନେ ବିନିକା ପାପକ୍ଷୟ ଘାଟେ ମା’ମଙ୍ଗଳାକଁର ମୂର୍ତ୍ତି ବିସରଜନ କରିଥିଲେ।