ନୂଆଦିଲ୍ଲୀ, ୨୫ା୫ (ପି.ଟି.)-ସ୍ପୋଟର୍ସ ଅଥରିଟି ଅପ୍ ଇଣ୍ଡିଆ (ସାଇ) ୨୭୪୯ଜଣ ଖେଲୋ ଇଣ୍ଡିଆ ଆଥଲେଟ୍ଙ୍କ ପକେଟ ଭତ୍ତା ବାବଦରେ ମୋଟ ୮.୨୫କୋଟି ଟଙ୍କା ମଞ୍ଜୁର କରିଛି। ପ୍ରତ୍ୟେକ ଆଥଲେଟ ଜଣ ପିଛା ୩୦,୦୦୦ ଟଙ୍କା ଲେଖାଏଁ ପାଇବେ। ସେମାନଙ୍କ ବ୍ୟାଙ୍କ ଆକାଉଣ୍ଟକୁ ଏହି ରାଶି ଟ୍ରାନ୍ସଫର କରାଯାଇଛି। ଆଥଲେଟ୍ମାନେ ନିଜ ଘରକୁ ଫେରିବା ଓ ସେଠାରେ ଖାଦ୍ୟପେୟ ଏବଂ ଅନ୍ୟାନ୍ୟ ବାବଦରେ ଏହାକୁ ଖର୍ଚ୍ଚ କରିପାରିବେ। ଏହା ୨୦୨୦-୨୧ ବର୍ଷର ପ୍ରଥମ ୩ ମାସ ପାଇଁ ପକେଟ ଭତ୍ତା। ୩୫ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ୨୧ଟି ଖେଳର ଆଥଲେଟଙ୍କ ପାଇଁ ଏହି ସୁବିଧା ରହିଛି। ମହାରାଷ୍ଟ୍ର (୩୮୬), ହରିୟାଣା (୩୮୧), ଦିଲ୍ଲୀ (୨୨୫), ପଞ୍ଜାବ (୨୦୨)ଏବଂ ତାମିଲନାଡୁ (୧୬୫)ରୁ ଅଧିକ ସଂଖ୍ୟାରେ ଆଥଲେଟ୍ ପକେଟ ଭତ୍ତା ପାଇଛନ୍ତି। ଖେଲୋ ଇଣ୍ଡିଆ ସ୍କଲାରଶିପ୍ ପାଇବା ପାଇଁ ବିବେଚିତ ଆଥଲେଟମାନେ ବାର୍ଷିକ ୧.୨୦ ଲକ୍ଷ ଏବଂ ମୋଟ ୬.୨୮ ଲକ୍ଷ ଟଙ୍କା ପକେଟ ଭତ୍ତା ପାଇଥାନ୍ତି।