ଭୁବନ ୧୭।୯(ଡି.ଏନ.ଏ.)
ଭୁବନ ଏନ୍ଏସି ଅଧୀନ ୩ନଂ. ଓ୍ବାର୍ଡ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟ ଆଖପାଖ ଅଞ୍ଚଳକୁ ଜବରଦଖଲ ମୁକ୍ତ କରିବାକୁ ଦାବି କରିଛି ପରିଚାଳନା କମିଟି। ଏ ନେଇ କମିଟି ସଦସ୍ୟମାନେ ସୋମବାର ତହସିଲଦାରଙ୍କୁ ଭେଟି ସ୍ମାରକପତ୍ର ପ୍ରଦାନ କରିଛନ୍ତି।
ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟ ସମ୍ପୃକ୍ତ ଅଞ୍ଚଳବାସୀଙ୍କ ଶିକ୍ଷାର ପ୍ରାଣକେନ୍ଦ୍ର। ଏହି ପୁରାତନ ଶିକ୍ଷାନୁଷ୍ଠାନରେ ଛାତ୍ରୀଛାତ୍ରଙ୍କ ପାଇଁ ଖେଳପଡ଼ିଆ ନାହିଁ। ସ୍କୁଲ ପାରିପାର୍ଶ୍ୱିକ ଅଞ୍ଚଳରେ ଥିବା ସରକାରୀ ଜମିକୁ ଜବରଦଖଲକାରୀ କବ୍ଜା କରି ରଖିଛନ୍ତି। ଜବରଦଖଲ ହଟିଲେ ଉକ୍ତ ଜମିକୁ ଖେଳପଡ଼ିଆ ଭାବେ ବ୍ୟବହାର କରାଯାଇପାରିବ। ଏ ନେଇ ସୋମବାର ସ୍କୁଲରେ ଏକ ବୈଠକ କରାଯାଇ ଆଲୋଚନା ହୋଇଥିଲା। ଏଥିସହ ଜବରଦଖଲକାରୀଙ୍କ ସହ କମିଟି ସଦସ୍ୟ ଆଲୋଚନା କରିଥିଲେ। ପିଲାମାନଙ୍କ ବୃହତ୍ତର ସ୍ବାର୍ଥ ପାଇଁ ଜମି ଛାଡ଼ିଦେବାକୁ ନିବେଦନ କରାଯାଇଥିଲା। ହେଲେ ଏହାକୁ ସେମାନେ ଭ୍ରୂକ୍ଷେପ କରି ନ ଥିଲେ। ଏହାପରେ କମିଟି କର୍ମକର୍ତ୍ତା ତହସିଲଦାର ଶକ୍ତିକାନ୍ତ ରାୟଙ୍କୁ ଫେରାଦ ହୋଇଛନ୍ତି। ଦାବିପତ୍ର ପ୍ରଦାନ ବେଳେ ସଭାପତି ସୁଧୀର କୁମାର ସାହୁ, ଚୈତନ୍ୟ ପୃଷ୍ଟି, ମଧୁସ୍ମିତା ସାହୁ, ସୁଧାକର ସାହୁ, ରାନୁଶ୍ରୀ ପାତ୍ର, ରବୀନ୍ଦ୍ର କୁମାର ଦାଶ ପ୍ରମୁଖ ଉପସ୍ଥିତ ଥିଲେ।
ଏ ନେଇ ତହସିଲଦାର କୁହନ୍ତି, ଅଭିଯୋଗ ପାଇବାପରେ ଘଟଣାର ତଦନ୍ତ କରିବାକୁ ଆର୍ଆଇ ଶ୍ରୀକାନ୍ତ କୁମାର ପରିଡ଼ାଙ୍କୁ ନିର୍ଦ୍ଦେଶ ଦିଆଯାଇଛି। ରିପୋର୍ଟ ମିଳିବା ପରେ ପରବର୍ତ୍ତୀ ପଦକ୍ଷେପ ନିଆଯିବ।