ନୂଆଦିଲ୍ଲୀ, ୧୦।୪ (ପି.ଟି.)- କୋଭିଡ୍-୧୯ ମହାମାରୀର ଆତଙ୍କ ଜାରି ରହିଥିବା ବେଳେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କିନ୍ତୁ ଦାୟିତ୍ୱରେ ହେଳା କରିନାହିଁ। କେନ୍ଦ୍ରୀୟ ଚୁକ୍ତିଭୁକ୍ତ ସବୁ ଖେଳାଳିଙ୍କୁ ବିସିସିଆଇ କ୍ୱାର୍ଟର୍ଲି ବା ତ୍ରୟମାସିକ ପାଉଣା ପ୍ରଦାନ କରିଛି। କେବଳ ସେତିକି ନୁହଁ, କଷ୍ଟକର ସମୟରେ କୌଣସି ଖେଳାଳିଙ୍କୁ ଅଣଦେଖା କରିହେବ ନାହିଁ ବୋଲି ବୋର୍ଡ ତରଫରୁ ସ୍ପଷ୍ଟ କରାଯାଇଛି।
କରୋନା ଭାଇରସ କାରଣରୁ ସାରା ବିଶ୍ୱର ଅର୍ଥନୀତି ଗୁରୁତର ଭାବେ ପ୍ରଭାବିତ ହୋଇଛି। ଇଂଲଣ୍ଡ ଓ ଅଷ୍ଟ୍ରେଲିଆ କ୍ରିକେଟ ବୋର୍ଡ ଖେଳାଳିମାନଙ୍କ ପାଉଣା କାଟିବା ନେଇ ସୂଚନା ଦେଇଥିବା ବେଳେ ବିସିସିଆଇ କିନ୍ତୁ ଖେଳାଳିମାନଙ୍କୁ ସେମାନଙ୍କର ସମ୍ପୂର୍ଣ୍ଣ ପାଉଣା ପ୍ରଦାନ କରିଛି। ମାର୍ଚ୍ଚ ୨୪ ତାରିଖରୁ ସାରା ଦେଶରେ ଲକ୍ଡାଉନ୍ ଜାରି କରାଯାଇଛି। ତଥାପି ସବୁ ପ୍ରକାର ପରିସ୍ଥିତିକୁ ସାମ୍ନା କରିବାକୁ ଆମେ ପ୍ରସ୍ତୁତ ଅଛୁ ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି।
ଏହି ସମୟରେ ଯେଉଁ ଖେଳାଳିମାନେ ଭାରତ ପାଇଁ ଓ ଭାରତ ଏ ପାଇଁ ଖେଳିଛନ୍ତି ସେମାନଙ୍କ ପାଉଣା ମଧ୍ୟ ପ୍ରଦାନ କରାଯାଇଛି। ଆର୍ଥିକବର୍ଷ ଶେଷରେ ସମସ୍ତଙ୍କୁ ପାଉଣା ପ୍ରଦାନ କରାଯାଇଛି ବୋଲି ଅଧିକାରୀ ଜଣକ କହିଛନ୍ତି। ଇଂଲଣ୍ଡ ଓ ଅଷ୍ଟ୍ରେଲିଆ କ୍ରିକେଟରମାନେ ସେମାନଙ୍କ ପାଉଣା କଟାଯିବା ନେଇ ସୂଚନା ପାଇଛନ୍ତି ବୋଲି କହିଛନ୍ତି।
ଅଷ୍ଟ୍ରେଲିଆରେ କେନ୍ଦ୍ରୀୟ ଚୁକ୍ତି ନେଇ ଘୋଷଣାକୁ ସ୍ଥଗିତ ରଖାଯାଇଛି। ସେହିପରି ଇଂଲଣ୍ଡ ଅଧିନାୟକ ଜୋ ରୁଟ୍ ତାଙ୍କ ୟର୍କସାୟର ଦଳୀୟ ସାଥୀମାନଙ୍କ ସହ କିଛି ଦିନର ଛୁଟି ପାଇଁ ଆବେଦନ କରିଛନ୍ତି। ଅନ୍ୟ ଦେଶର ବୋର୍ଡମାନେ ଏହି ପରିସ୍ଥିତିରେ ସଂଘର୍ଷ କରୁଥିବା ବେଳେ ବିସିସିଆଇ ତା’ର ଆର୍ଥିକ ସ୍ଥିରତା ପାଇଁ ନିଜ ଖେଳାଳିଙ୍କ କଷ୍ଟକର ପରିସ୍ଥିତିରେ ମଧ୍ୟ ସାହାଯ୍ୟ କରିବାର କ୍ଷମତା ରଖୁଛି ବୋଲି ବୋର୍ଡର ଜଣେ ଅଧିକାରୀ କହିଛନ୍ତି। ସବୁଆଡେ ଏବେ ପାଉଣା କାଟିବା ନେଇ ଆଲୋଚନା ଚାଲିଥିବା ବେଳେ ବିସିସିଆଇ କିନ୍ତୁ ନିଜ ଖେଳାଳିଙ୍କୁ ଉଚିତ ପ୍ରାପ୍ୟ ଦେବାକୁ ସକ୍ଷମ। ଅନ୍ତର୍ଜାତୀୟ ଖେଳାଳିଙ୍କ ସମେତ ଘରୋଇ ଖେଳାଳି ମଧ୍ୟ ଯେପରି ସମସ୍ୟାରେ ନ ପଡିବେ ସେ ନେଇ ଧ୍ୟାନ ଦିଆଯିବ ବୋଲି ସେ ସ୍ପଷ୍ଟ କରିଛନ୍ତି। କରୋନା ଭାଇରସ ସଂକ୍ରମଣ କାରଣରୁ ଆର୍ଥତ୍କ କ୍ଷତି ହୋଇଛି। ଏହାର ଭରଣା ପାଇଁ ଚଳିତବର୍ଷ ଶେଷ ଆଡକୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ଆୟୋଜନ ହେବା ଜରୁରୀ ହୋଇପଡିଛି ବୋଲି ସେ ସ୍ବୀକାର କରିଛନ୍ତି। ଏସିଆ କପ୍ ଓ ଇଂଲଣ୍ଡ ବିପକ୍ଷ ସିରିଜ ଅକ୍ଟୋବରରେ ଓ ଆଗକୁ ଟି୨୦ ବିଶ୍ୱକପ୍ ଆୟୋଜନ ହେବାକୁ ଯାଉଥିବାରୁ ଆଇପିଏଲ କେବେ ଆୟୋଜନ ହେବ ସେ ନେଇ କହିବା କଷ୍ଟକର ବୋଲି ସେ କହିଛନ୍ତି। ପରିସ୍ଥିତି କେବେ ସ୍ବାଭାବିକ ହେବ ସେ ନେଇ କହିହେବ ନାହିଁ। ତେଣୁ ଆଇପିଏଲର କାର୍ଯ୍ୟସୂଚୀ ନେଇ କହିବା ମଧ୍ୟ ଅସମ୍ଭବ ବୋଲି ସେ ସ୍ପଷ୍ଟ କରିଛନ୍ତି।
ପୁଣି ଘରୋଇ କାର୍ଯ୍ୟସୂଚୀ ନେଇ ମଧ୍ୟ ବୋର୍ଡ ଚିନ୍ତିତ ଅଛି। କାରଣ ନିୟମ ଅନୁସାରେ ଘରୋଇ କ୍ରିକେଟ ଓ ଆଇପିଏଲ ଏକା ସମୟରେ ଆୟୋଜିତ ହେବ ନାହିଁ। ଯଦି ଆଇପିଏଲ ଅକ୍ଟୋବର ଓ ନଭେମ୍ବରରେ ଆୟୋଜନ ହୁଏ, ତେବେ ଘରୋଇ କ୍ରିକେଟର କାର୍ଯ୍ୟସୂଚୀରେ ପରିବର୍ତ୍ତନ ହେବା ନିଶ୍ଚିତ। ବିସିସିଆଇର ଘରୋଇ କ୍ରିକେଟ ସାଧାରଣତଃ ଅଗଷ୍ଟରେ ଆରମ୍ଭ ହୋଇଥାଏ। ତେବେ ଆଇପିଏଲ୍ କାର୍ଯ୍ୟସୂଚୀ ଉପରେ ସବୁ କିଛି ନିର୍ଭର କରୁଛି ବୋଲି ବିସିସିଆଇ ତରଫରୁ କୁହାଯାଇଛି।