ଢାକା, ୨୩ା୧୦ (ପି.ଟି.)-ଜାତୀୟ ଖେଳାଳିଙ୍କ ଅଦ୍ଭୁତପୂର୍ବ ଧର୍ମଘଟ ପଛରେ ଷଡ଼ଯନ୍ତ୍ର ରହିଥିବା ବାଂଲାଦେଶ କ୍ରିକେଟ ବୋର୍ଡ(ବିସିବି) ସଭାପତି ନାଜିବୁଲ ହସନ ମଙ୍ଗଳବାର କହିିଛନ୍ତି। ଅନ୍ୟପକ୍ଷରେ ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମ ଅନୁସାରେ ଭାରତ ଟୁର୍ରେ ବାଂଲାଦେଶ ଯିବ ବୋଲି ସେ ଆଶା ପ୍ରକାଶ କରିଛନ୍ତି। ସୋମବାର ଟେଷ୍ଟ ଓ ଟି୨୦ ଅଧିନାୟକ ଶକିବ ଅଲ୍ ହସନ, ମହମୁଦୁଲ୍ଲା ଏବଂ ମୁସ୍ଫିକର ରହିମଙ୍କ ଭଳି ଦେଶର କେତେଜଣ ଟପ୍ ଖେଳାଳି ସେମାନଙ୍କ ଦାବି ପୂରଣ ନ ହେଲା ପର୍ଯ୍ୟନ୍ତ କ୍ରିକେଟ କାର୍ଯ୍ୟକଳାପକୁ ବର୍ଜନ କରିବେ ବୋଲି ଏକ ଖବରଦାତା ସମ୍ମିଳନୀରେ ଧମକ ଦେଇଛନ୍ତି। ଦାବିଗୁଡ଼ିକ ମଧ୍ୟରେ ପ୍ରଥମ ଶ୍ରେଣୀ ଖେଳାଳିଙ୍କ ବେତନ ବୃଦ୍ଧି ଅନ୍ୟତମ। ଧର୍ମଘଟ ଯୋଗୁ ବାଂଲାଦେଶ କ୍ରିକେଟ ଦଳର ନଭେମ୍ବର ୩ରୁ ହେବାକୁଥିବା ଭାରତ ଟୁର୍ ଅନିଶ୍ଚିତ ମଧ୍ୟକୁ ଠେଲି ହୋଇଯାଇଛି। ଏହି ପ୍ରସଙ୍ଗ ଉପରେ ଆଲୋଚନା ପାଇଁ ବିସିବି ପକ୍ଷରୁ ଡାଇରେକ୍ଟରମାନଙ୍କର ଏକ ଜରୁରୀ ବୈଠକ ଡକାଯାଇଥିଲା। ଏହି ଷଡ଼ଯନ୍ତ୍ର ପଛରେ କାହାର ହାତ ରହିଛି ତାଙ୍କୁ ଆମେ ଖୋଜି ବାହାର କରିବୁ ବୋଲି ହସନ କହିଛନ୍ତି। ଖେଳାଳିମାନେ ସେମାନଙ୍କର ଦାବି ସମ୍ପର୍କରେ ବୋର୍ଡ ସହିତ ଆଲୋଚନା ନ କରି ସର୍ବସାଧାରଣରେ ବିକ୍ଷୋଭ ପ୍ରଦର୍ଶନ କରିବା ଦ୍ୱାରା ଦେଶରେ ଖେଳର ଭାବମୂର୍ତ୍ତି ନଷ୍ଟ ହୋଇଥିବା ସେ କହିଛନ୍ତି। ଖେଳାଳିମାନେ ଏତେ ପରିମାଣରେ ଉତ୍ତ୍ୟକ୍ତ ହୋଇପଡ଼ିବେ ଏହା ଆମ କଳ୍ପନା ବାହାରେ ଥିଲା। ଏହା ଆମକୁ ଖୁବ୍ ବାଧିଛି ବୋଲି ବିସିବି ନିର୍ଦ୍ଦେଶକ ଜାଲା ୟୁନୁସ କହିଛନ୍ତି। ଖେଳାଳିମାନେ ସମସ୍ତ ପ୍ରକାର କ୍ରିକେଟ କାର୍ଯ୍ୟକଳାପକୁ ବର୍ଜନ କରିବା ଲାଗି ଯେଉଁ ଧମକ ଦେଇଛନ୍ତି,ତାହା ବ୍ଲାକ୍ମେଲ୍ ଛଡ଼ା ଆଉ କିଛି ନୁହେଁ।