ଲଣ୍ଡନ, ୨୩।୬- ମହାମାରୀ କରୋନା ଭାଇରସ୍ର ଭୟାବହତା ମଧ୍ୟରେ ବିଶ୍ୱର ଏକ ନମ୍ବର ଟେନିସ ଖେଳାଳି ନୋଭାକ ଜୋକୋଭିଚ୍ ନିକଟରେ ବେଲ୍ଗ୍ରାଡେରେ ଏକ ପ୍ରଦର୍ଶନୀ ଚ୍ୟାରିଟି ଟେନିସ ଟୁର୍ନାମେଣ୍ଟ ଆୟୋଜନ କରିଥିଲେ। ଏଥିରେ ସାମିଲ ହୋଇଥିବା ବୁଲ୍ଗେରିଆର ଗ୍ରିଗୋର ଦିମିତ୍ରୋଭା, କ୍ରୋଏସିଆର ବୋର୍ନା କୋରିକ୍ ପ୍ରଥମେ କରୋନା ଆକ୍ରାନ୍ତ ହୋଇଥିବା ଜଣାପଡ଼ିବା ପରେ ଏହି ଟୁର୍ନାମେଣ୍ଟକୁ ବାତିଲ୍ କରିଦିଆଯାଇଥିଲା। ସଦ୍ୟତମ ରିପୋର୍ଟ ଅନୁଯାୟୀ ଏହି ଟୁର୍ନାମେଣ୍ଟରେ ଅନ୍ୟତମ ଅଂଶଗ୍ରହଣକାରୀ ସର୍ବିୟାର ଭିକ୍ଟର ତ୍ରୋଇକ ଓ ତାଙ୍କ ସ୍ତ୍ରୀ ମଧ୍ୟ କରୋନା ଦ୍ୱାରା ଆକ୍ରାନ୍ତ ହୋଇଛନ୍ତି। ସେହିଭଳି ଟୁର୍ନାମେଣ୍ଟକୁ ଆୟୋଜନ କରିଥିବା ନିଜେ ଜୋକୋଭିଚ୍ ଓ ତାଙ୍କ ସ୍ତ୍ରୀଙ୍କ କରୋନା ରିପୋର୍ଟ ମଧ୍ୟ ଇତିମଧ୍ୟରେ ପଜିଟିଭ ବାହାରିଛି। ଫଳରେ ଏହାକୁ ନେଇ ବ୍ରିଟେନର ଏକ ନମ୍ବର ପୁରୁଷ ଟେନିସ ଖେଳାଳି ଡାନ୍ ଇଭାନ୍ସ ଜୋକୋଭିଚ୍ଙ୍କୁ ଦାୟୀ କରିଛନ୍ତି। ଇଭାନ୍ସ କହିଛନ୍ତି, ‘ଚ୍ୟାରିଟି ଟୁର୍ନାମେଣ୍ଟ କରିବା ଭଲ କଥା। କିନ୍ତୁ ୨ ମିଟର ଦୂରତା ଅବଲମ୍ବନ କରିବା ନେଇ ରହିଥିବା ସାମାଜିକ ଦୂରତା ଗାଇଡ୍ଲାଇନ୍କୁ ଟୁର୍ନାମେଣ୍ଟରରେ ପାଳନ କରିବା ଉଚିତ୍ ଥିଲା। ଏହା ଏକ ହାସ୍ୟାସ୍ପଦ ଘଟଣା ନୁହେଁ। ସେହିଭଳି ଏଭଳି ଏକ ଘଡ଼ିସନ୍ଧି ମୁହୂର୍ତ୍ତରେ ଖେଳାଳିମାନେ ପ୍ରତିଯୋଗିତାରେ ପାର୍ଟି ଓ ଏକାଠି ନାଚିବା ସବୁଠାରୁ ଖରାପ ଉଦାହରଣ। ଟୁର୍ନାମେଣ୍ଟ ଆୟୋଜନ କରୁଥିବା ହେତୁ ସେ (ଜୋକୋଭିଚ୍) ନିଜେ ଦାୟିତ୍ୱବାନ ହେବାର ଥିଲା’ ବୋଲି ଇଭାନ୍ସ ଏକ ସାକ୍ଷାତ୍କାର ଅବସରରେ କହିଛନ୍ତି।