ଭୁବନେଶ୍ୱର, ୨୮।୮(ବ୍ୟୁରୋ): ଓଡ଼ିଶାର ଉପାନ୍ତ ତଥା ପଡ଼ୋଶୀ ରାଜ୍ୟରେ ବସବାସ କରୁଥିବା ସଂଖ୍ୟାଲଘୁ ଓଡ଼ିଆ ଭାଷାଭାଷୀ ଲୋକଙ୍କ ସମସ୍ୟା ଅନୁଧ୍ୟାନ କରିବ ଗୃହ କମିଟି। ଏଥିଲାଗି ୭ ସବ୍ କମିଟି ଗଠିତ ହୋଇଛି। କମିଟି ସଦସ୍ୟ ପଡ଼ୋଶୀ ରାଜ୍ୟ ଗସ୍ତ କରି ସଂଖ୍ୟାଲଘୁ ଓଡ଼ିଆଙ୍କ ସମସ୍ୟା ବୁଝିବେ ଏବଂ ଏହାର ପ୍ରତିକାର କରିବାକୁ ସୁପାରିସ କରିବେ। ବାଚସ୍ପତି ସୂର୍ଯ୍ୟନାରାୟଣ ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଂଖ୍ୟାଲଘୁ ଭାଷାଭାଷୀ ଗୃହ କମିଟି ବୈଠକରେ ଏହି ନିଷ୍ପତ୍ତି ହୋଇଛି।
ବିଧାନସଭାର ପ୍ରକୋଷ୍ଠ ନମ୍ବର ୫୯ରେ ଭିଡିଓ କନ୍ଫରେନ୍ସରେ ଆୟୋଜିତ ଉକ୍ତ ବୈଠକରେ ସୀମାନ୍ତରେ ବସବାସ କରୁଥିବା ସଂଖ୍ୟାଲଘୁ ଓଡ଼ିଆଙ୍କ ଭାଷା, ସାହିତ୍ୟ, ସଂସ୍କୃତିର ସୁରକ୍ଷା ଉପରେ ବ୍ୟାପକ ଆଲୋଚନା ହୋଇଛି। ବିଧାନସଭା ଅଧିବେଶନ ପରେ କୋଭିଡ୍ ସ୍ଥିତି ସ୍ବାଭାବିକ ହେଲେ ଏଥିଲାଗି ଗଠିତ ୭ ସବ୍-କମିଟି ସଦସ୍ୟ ବିଭିନ୍ନ ରାଜ୍ୟ ଗସ୍ତ କରି ବାସ୍ତବ ସ୍ଥିତି ଅନୁଧ୍ୟାନ କରିବେ। ଓଡ଼ିଆଙ୍କ ସ୍ବାର୍ଥରକ୍ଷା ପାଇଁ ସମ୍ପୃକ୍ତ ରାଜ୍ୟର ମୁଖ୍ୟମନ୍ତ୍ରୀ ଏବଂ ବାଚସ୍ପତିଙ୍କ ସହ ଆଲୋଚନା କରାଯିବ। ସୀମାନ୍ତ ଆନ୍ଧ୍ର ପାଇଁ ସରକାରୀ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ, ତେଲଙ୍ଗାନା ପାଇଁ ବିଧାୟକ ଦେବୀ ପ୍ରସାଦ ମିଶ୍ର, ଛତିଶଗଡ଼ ପାଇଁ ବିଧାୟକ ଅମର ପ୍ରସାଦ ଶତପଥୀ, ଝାଡ଼ଖଣ୍ଡ ପାଇଁ ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ, ପଶ୍ଚିମବଙ୍ଗ ପାଇଁ ବିଧାୟକ ଅନନ୍ତ ଦାସ, ଗୁଜରାଟ ଓ ମହାରାଷ୍ଟ୍ର ପାଇଁ ଉପବାଚସ୍ପତି ରଜନୀକାନ୍ତ ସିଂ, କର୍ନାଟକ ପାଇଁ କୃଷିମନ୍ତ୍ରୀ ଅରୁଣ କୁମାର ସାହୁଙ୍କ ଅଧ୍ୟକ୍ଷତାରେ ଗଠିତ ସବ୍-କମିଟି ସମ୍ପୃକ୍ତ ରାଜ୍ୟ ଗସ୍ତରେ ଯିବେ। ରାଜ୍ୟର ସୀମାନ୍ତ ଜିଲାରୁ ନିର୍ବାଚିତ ବିଧାୟକଙ୍କୁ ସବ୍କମିଟିରେ ସଭ୍ୟ ଭାବେ ସାମିଲ କରିବାକୁ ନିଷ୍ପତ୍ତି ହୋଇଛି। ପୂର୍ବରୁ ରାଜ୍ୟର ଉପାନ୍ତ ଜିଲାର ପିଲାଙ୍କୁ ପଡ଼ୋଶୀ ରାଜ୍ୟରେ ସିଟି, ବି.ଏଡ୍ ଏବଂ ପଡ଼ୋଶୀ ରାଜ୍ୟର ପିଲାଙ୍କୁ ଓଡ଼ିଶାରେ ସମାନ ତାଲିମ ଦେବାକୁ ଅନୁମତି ପ୍ରଦାନ କରାଯାଉଥିଲା। ଭାଷା ସୁରକ୍ଷା ଲାଗି ଏହି ବ୍ୟବସ୍ଥା ପୁନଃ ପ୍ରଚଳନ କରାଯିବ। ଏ ନେଇ ସରକାରଙ୍କୁ କମିଟି ସୁପାରିସ କରିବ ବୋଲି ଆଲୋଚନା ହୋଇଛି।
ପଡ଼ୋଶୀ ରାଜ୍ୟର ସୀମାକୁ ଲାଗି ରହିଥିବା ଜିଲାର ଜିଲାପାଳଙ୍କ ସହ ଆଗାମୀ ବୈଠକରେ ଆଲୋଚନା କରାଯିବ। ରାଜ୍ୟ ସରକାର ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତିର ବିକାଶ ପାଇଁ ପଦକ୍ଷେପ ନେଉଛନ୍ତି। ଉପାନ୍ତ ଅଞ୍ଚଳରେ ଓଡ଼ିଆ ଭାଷାର ସୁରକ୍ଷା ପାଇଁ ସମସ୍ତ ପ୍ରକାର ପଦକ୍ଷେପ ଗ୍ରହଣ କରାଯିବ ବୋଲି ସଂସ୍କୃତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ କହିଛନ୍ତି।