ପଦ୍ମପୁର, ୨୦।୫(ଡି.ଏନ.ଏ.)- ଜଣେ ଗୃହିଣୀ ହୋଇଥିଲେ ବି ତାଙ୍କ ଇଚ୍ଛାଶକ୍ତି ଓ ଅଧ୍ୟବସାୟ ଆଗରେ ହାର୍ ମାନିଛି ଦାରିଦ୍ର୍ୟ। ପରିଶ୍ରମ ଓ ଚେଷ୍ଟା ତାଙ୍କୁ କରିଛି ସ୍ବାବଲମ୍ବୀ। ଧୂପକାଠି ପ୍ରସ୍ତୁତ କରି ସେ ଜଣେ ଗୃହିଣୀରୁ ସଫଳ ଉଦ୍ୟୋଗୀ ହୋଇପାରିଛନ୍ତି। ଅନ୍ୟ ଅଭାବୀ ମହିଳାଙ୍କୁ ରୋଜଗାର ପନ୍ଥା ଯୋଗାଇ ସେ ସମସ୍ତଙ୍କ ପାଇଁ ପାଲଟିଯାଇଛନ୍ତି ଏକ ଉଦାହରଣ।
ଏହି ମହିଳା ହେଲେ ସାବିତ୍ରୀ ବେହେରା(୪୦)। ଘର ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ ଗୋପବନ୍ଧୁନଗର ପଞ୍ଚାୟତ ଗଦି ଗ୍ରାମରେ। ସ୍ବାମୀ ଓ ଏକମାତ୍ର ପୁଅଙ୍କୁ ନେଇ ତାଙ୍କ ପରିବାର। ଜମିବାଡ଼ି ବିଶେଷ ନ ଥିବାରୁ ନିଜେ ସ୍ବାବଲମ୍ବୀ ହେବା ପାଇଁ ସାବିତ୍ରୀ ୨୦୧୩ରେ ପ୍ରଥମେ ପ୍ରୟାସ ଆରମ୍ଭ କରିଥିଲେ। ଧୂପକାଠି ବ୍ୟବସାୟ କରିବାକୁ ସ୍ଥିର କରି ଅଳ୍ପ ପୁଞ୍ଜିରେ ସେ କାମ ଆରମ୍ଭ କରିଥିଲେ।
ସେବେଠାରୁ ନିଜ ଘରେ ସେ ଧୂପକାଠି ତିଆରି କରିଆସୁଛନ୍ତି। ଏଥିପାଇଁ ଆବଶ୍ୟକ ପଡୁଥିବା କଞ୍ଚାମାଲ ଅଙ୍ଗାର, ଜିନ୍କେଡ୍, କାଠି ବାଲେଶ୍ୱର ଜିଲାର ସୋର ଅଞ୍ଚଳରୁ ସଂଗ୍ରହ କରିଥାନ୍ତି। ଗ୍ରାମର ଆଉ ଦୁଇ ମହିଳାଙ୍କ ସହଯୋଗରେ ସେ ଦୈନିକ ପ୍ରାୟ ୧୦୦ ପ୍ୟାକେଟ୍ ଧୂପକାଠି ତିଆରି କରିପାରୁଛନ୍ତି। ସ୍ଥାନୀୟ ବଜାରରେ ଧୂପ ପ୍ୟାକେଟର ମୂଲ୍ୟ ୮୫ରୁ ୯୦ ଟଙ୍କା। ସାବିତ୍ରୀ ତିଆରି କରୁଥିବା ଧୂପ ପ୍ୟାକେଟ୍ଗୁଡ଼ିକୁ ଅଣ୍ଡରାଇ, ସାବରଙ୍ଗ, ବାସୁଦେବପୁର, ଚାନ୍ଦବାଲି ଅଞ୍ଚଳକୁ ପଠାଇ ବିକ୍ରି କରିଥାନ୍ତି। ତାଙ୍କ ହାତ ତିଆରି ଧୂପର ଚାହିଦା ବଢ଼ିବା ଦେଖି କେତେକ ବେପାରୀ ଗଦିସ୍ଥିତ ତାଙ୍କ ଘରକୁ ଆସି ଏହାକୁ କିଣି ନେଇଯାଉଛନ୍ତି। କଞ୍ଚାମାଲ୍ର ମୂଲ୍ୟ ଓ ଦୁଇ ମହିଳା କର୍ମଚାରୀଙ୍କୁ ପ୍ରାପ୍ୟ ପ୍ରଦାନ ପରେ ମାସିକ ୮ରୁ ୧୦ ହଜାର ଟଙ୍କା ରୋଜଗାର ହେଉଛି। ଏଥିରେ ପରିବାର ପ୍ରତିପୋଷଣ କରି ନିଜ ପୁଅକୁ ପାଠ ପଢ଼ାଇ ମଣିଷ କରିବାକୁ ସେ ଲକ୍ଷ୍ୟ ରଖିଛନ୍ତି। ଧୂପ ପ୍ରସ୍ତୁତି ବ୍ୟବସାୟ ବଢ଼ାଇବା ଲାଗି ‘ସାବିତ୍ରୀ ଟ୍ରେଡର୍ସ’ ନାମରେ ଏକ ସଂସ୍ଥା ଖୋଲି ଏହାକୁ ପଞ୍ଜୀକରଣ କରାଇଛନ୍ତି। ନିଜେ ରୋଜଗାର କରିବା ସହ ଅନ୍ୟକୁ ରୋଜଗାର ଦେବାରେ ଆନନ୍ଦ ନିଆରା ବୋଲି ସାବିତ୍ରୀ କହିଛନ୍ତି। ବର୍ତ୍ତମାନ ସମାଜରେ ବେକାରି ସମସ୍ୟା ବୃଦ୍ଧି ପାଉଛି। ଚାକିରି ପ୍ରତି ନିର୍ଭରଶୀଳ ନ ହୋଇ ଆତ୍ମନିର୍ଭରଶୀଳ ହେବା ସକାଶେ ବାଟ ଖୋଜିଲେ ଅବଶ୍ୟ ଏହା ମିଳିଯିବ। ଗ୍ରାମାଞ୍ଚଳ ହେଉ କି ସହର ଉଦ୍ୟମ କଲେ ସମସ୍ତେ ସ୍ବାବଲମ୍ବୀ ହୋଇପାରିବେ ବୋଲି ସାବିତ୍ରୀ କହିଛନ୍ତି।