ଖୋର୍ଦ୍ଧା ଅଫିସ, ୨୫ ।୧୨: ଖୋର୍ଦ୍ଧା ଆଦର୍ଶ ଥାନା ବ୍ୟାଙ୍କ ଛକରେ ଜଣେ ଟ୍ରାଫିକ ପୋଲିସ ଓ ଆଦର୍ଶ ଥାନା ଏଏସ୍ଆଇଙ୍କର ଦାଦାଗିରି ଯୋଗୁ ବୁଧବାର ଖୋର୍ଦ୍ଧା ସହରରେ ଉତ୍ତେଜନା ଦେଖା ଦେଇଛି। ଏପରିକି ଏହାକୁ କେନ୍ଦ୍ରକରି ବ୍ୟାଙ୍କ ଛକ ନିକଟରେ ରାସ୍ତା ଅବରୋଧ କରାଯାଇଥିବା ଜଣାପଡ଼ିଛି।
ସୂଚନାନୁଯାୟୀ, ଟ୍ରାଫିକ୍ ପୋଲିସ ଏକ ଟ୍ରକ୍କୁ ତ୍ରୁଟିପୂର୍ଣ୍ଣ ରାସ୍ତାରେ ଯାଉଥିବା ଦର୍ଶାଇ ବ୍ୟାଙ୍କ ଛକରେ ଅଟକାଇ ୫୦୦ ଟଙ୍କା ଛଡ଼ାଇ ନେଇଥିଲେ। ପରେ ଅଧିକ ଟଙ୍କା ଲାଞ୍ଚ ଦାବି କରି ମାରପିଟ୍ ମଧ୍ୟ କରିଥିଲେ। ଏ ନେଇ ଟ୍ରାଫିକ୍ ପୋଲିସ ଥାନା ଏଏସ୍ଆଇଙ୍କୁ ସହଯୋଗ କଲେ। ଚାଲାଣ ନ କାଟି ସମ୍ପୃକ୍ତ ଟ୍ରକ୍ ଡ୍ରାଇଭରଙ୍କ ଫୋନ୍ ଛଡାଇ ନେଇଥିଲେ। ଲାଞ୍ଚ ନ ଦେଲେ କୌଣସି କାମ ହେବନି ବୋଲି କହିଥିଲେ। ଟ୍ରାଫିକ ପୋଲିସ ଓ ଏଏସ୍ଆଇଙ୍କର ଏଭଳି ଦାଦାଗିରି ଦେଖି ଘଟଣାସ୍ଥଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଟ୍ରାଫିକ ପୋଲିସ ଓ ଏଏସ୍ଆଇଙ୍କୁ ନିଲମ୍ବନ ଦାବି କରି ସ୍ଥାନୀୟ ଲୋକ ଘଟଣାସ୍ଥଳରେ ରାସ୍ତାରୋକୋ କରି ଧାରଣା ଦେଇଥିଲେ। ଉତ୍ତେଜନା ବଢ଼ିବା ଦେଖି ଆଦର୍ଶ ଥାନାର ୨ୟ ଆଇଆଇସି ଭୁଲ ମାଗି ଆନ୍ଦୋଳନକୁ ପ୍ରତ୍ୟାହୃତ କରିବାକୁ ଅନୁରୋଧ କରିଥିଲେ। ପ୍ରାୟ ୧ଘଣ୍ଟା ପରେ ସାଢ଼େ ୧୨ଟାରେ ଆନ୍ଦୋଳନ ହଟିଥିଲା ।