ଜଟଣୀ,୨।୫(ଡି.ଏନ୍.ଏ.): କେରଳରୁ ଆସୁଥିବା ପ୍ରବାସୀ ଓଡ଼ିଆ ସ୍ବତନ୍ତ୍ର ଟ୍ରେନରେ ଶନିବାର ରାତିରେ ଖୋର୍ଦ୍ଧା ରୋଡ୍ ଷ୍ଟେଶନରେ ପହଞ୍ଚିବେ। ଗଞ୍ଜାମ ଓ କୋରାପୁଟ ଜିଲାକୁ ଛାଡ଼ି ଅନ୍ୟ ଜିଲାର ୫ ଶହ ପ୍ରବାସୀ ଓଡ଼ିଆ ଏହି ଷ୍ଟେଶନରେ ଓହ୍ଲାଇ ବସ୍ ଯୋଗେ ବିଭିନ୍ନ ଜିଲା ଅନ୍ତର୍ଗତ ନିଜ ଗ୍ରାମକୁ ଫେରିବେ। ଏଥିପାଇଁ ଜଟଣୀସ୍ଥିତ ଖୋର୍ଦ୍ଧାରୋଡ୍ ରେଳ ଡିଭିଜନ ମୁଖ୍ୟ ଦପ୍ତର ପରିସରରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ଏଥିରେ ରାଜ୍ୟ ଓ ରେଲୱେର ବରିଷ୍ଠ ଅଧିକାରୀ ଉପସ୍ଥିତ ରହି ଆଲୋଚନା କରିଥିଲେ। କେନ୍ଦ୍ରାଞ୍ଚଳ ଆର୍ଡିସି, ଖୋର୍ଦ୍ଧା ଜିଲ୍ଲାପାଳ, ଖୋର୍ଦ୍ଧାରୋଡ଼ ଡିଭିଜନର ଡିଆର୍ଏମ୍ଙ୍କ ସମେତ ରାଜ୍ୟ ଓ ରେଲୱେର ବରିଷ୍ଠ ପ୍ରଶାସନିକ ଏବଂ ପୋଲିସ ଅଧିକାରୀ ଉପସ୍ଥିତ ରହିଥିଲେ। ଟ୍ରେନ ଏଠାରେ ପହଞ୍ଚିବା ପରେ ଲକ୍ଡାଉନ୍ର ସମସ୍ତ ନିୟମକୁ ପାଳନ କରି ଫେରିଥିବା ପ୍ରବାସୀ ଓଡିଆଙ୍କୁ କିପରି ସେମାନଙ୍କ ଘରେ ପହଞ୍ଚାଯିବ ସେନେଇ ଆଲୋଚନାରେ ସ୍ଥାନ ପାଇଥିଲା। ଟ୍ରେନରୁ ଓହ୍ଲାଇବା ପରେ ଆଶ୍ରୟ ନେବା ସ୍ଥାନ, ଅଲିଭା କାଳୀ ମରାଯିବା, ବସ ରହିବା ସ୍ଥାନ ଆଦି ବୁଲି ଅନୁଧ୍ୟାନ କରିବା ସହ ପ୍ରସ୍ତୁତି ଉପରେ ସମୀକ୍ଷା କରାଯାଇଥିବା ସୂଚନା ମିଳିଛି।