ଖୋର୍ଦ୍ଧା ଅଫିସ, ୨୯ା୩: ରାଜ୍ୟରେ ତୃତୀୟ କରୋନା ଆକ୍ରାନ୍ତ ଚିହ୍ନଟ ହେବା ପରେ ପୋଲିସ ପକ୍ଷରୁ ସତର୍କତାମୂଳକ ପଦକ୍ଷେପ ସ୍ବରୂପ ଖୋର୍ଦ୍ଧା ସହରର ୩ ପ୍ରମୁଖ ପ୍ରବେଶପଥ ଯଥା ନୂଆ ବସ୍ଷ୍ଟାଣ୍ଡ, ଚଣ୍ଡିଚୁଆ ଛକ ଏବଂ ମୁକୁନ୍ଦପ୍ରସାଦ ଛକକୁ ସିଲ କରାଯାଇଛି। ସେହିପରି ମୁଖ୍ୟରାସ୍ତାକୁ ବାଦ୍ ଦେଇ ସମସ୍ତ ଗଳିରାସ୍ତାକୁ ବ୍ଲକିଂ କରାଯାଇଛି। ୫୭ନମ୍ବର ଜାତୀୟ ରାଜପଥ, ବାଇପାସ୍ ଏବଂ ନୂଆ ବସଷ୍ଟାଣ୍ଡ ରୋଡ୍କୁ ବାଦ ଦେଇ ୨୫ଟି ଛକରେ ବ୍ୟାରିକେଡ ଦେଇ ବନ୍ଦ କରାଯାଇଛି ବୋଲି ଏସ୍ପି ଅଜୟ ପ୍ରତାପ ସ୍ବାଇଁ ସୂଚନା ଦେଇଛନ୍ତି। ଏସ୍ପି କହିଛନ୍ତି, ଲକ୍ଡାଉନ ସମୟରେ ଘରେ ରହିବା ଏବଂ ବିନା କାରଣରେ ବାହାରେ ନ ବୁଲିବା ଲାଗି ନିର୍ଦ୍ଦେଶନାମା ରହିଛି। ପ୍ରଶାସନ ବାରମ୍ବାର ଜନସାଧାରଣଙ୍କୁ ଅନୁରୋଧ କରି ବିଫଳ ହେବା ପରେ ସହରର ସମସ୍ତ ରାସ୍ତାକୁ ବନ୍ଦ କରାଯାଇଛି। ସହରରେ ଦୁଇଚକିଆ ଓ ଚାରିଚକିଆ ଯାନ ଚଳାଚଳ ଉପରେ କଟକଣା ଜାରି ହୋଇଛି। କୌଣସି କାମ ଥିଲେ ଚାଲି ଚାଲି ଆସିବାକୁ କୁହାଯାଇଛି। ଏଣିକି କେହି ବାଇକରେ ଆସିଲେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଲକ୍ଡାଉନ ଉଲ୍ଲଂଘନ ନେଇ ୫୦ରୁ ଊର୍ଦ୍ଧ୍ୱ ମାମଲା ରୁଜୁ ହୋଇଛି। ଜନସାଧାରଣଙ୍କୁ ସହଯୋଗ କରିବା ପାଇଁ କଣ୍ଟ୍ରୋଲ ରୁମ୍ ଖୋଲାଯିବା ସହ ସେବା ଯୋଗାଇ ଦିଆଯିବ। ଲୋକେ କୌଣସି ଅଭିଯୋଗ ଲାଗି ନିକଟସ୍ଥ ଥାନାକୁ ଯୋଗାଯୋଗ କରିପାରିବେ। ସେଥିପାଇଁ ସମସ୍ତ ଥାନାଧିକାରୀଙ୍କ ମୋବାଇଲ ଫୋନ୍ ନମ୍ବର ଜାରି କରାଯାଇଛି।
