ଗୋପ,୨୫ା୫(ଡି.ଏନ୍.ଏ.): ଗୋପ ବ୍ଲକ ମହଲପଡ଼ା ପଞ୍ଚାୟତର କେତେକ ସରକାରୀ ଜମିକୁ ବେଆଇନ ଭାବେ ଜବରଦଖଲ କରି ମାଛ ପୋଖରୀ ଖୋଳିବା ନେଇ ଅଭିଯୋଗ ହୋଇଥିଲା। ଏହି ଅଭିଯୋଗର ବିଚାରକୁ ନେଇ ଜିଲାପାଳ ତଦନ୍ତ ନିର୍ଦ୍ଦେଶ ଦେଇଛନ୍ତି। ଜିଲାପାଳଙ୍କ ନିର୍ଦ୍ଦେଶ ଅନୁସାରେ ଗୋପ ତହସିଲଦାର ଏସ୍.କେ. ସାର୍ଗି ତୁରନ୍ତ ଏହି ବେଆଇନ ମାଛ ପୋଖରୀ ଖୋଳାଯାଉଥିବା ସ୍ଥାନକୁ ମାପଚୁପ କରିବାକୁ ନିର୍ଦ୍ଦେଶ ଦେଇଛନ୍ତି। ମାତ୍ର ଏହି ସବୁ ସରକାରୀ ଜମି ମହଲପଡା ଓ ଶୋରଭା ପଞ୍ଚାୟତର ମୌଜାରେ ଥିବାରୁ ଦୁଇ ମୌଜାର ରାଜସ୍ବ ନିରୀକ୍ଷକ ସର୍କଲକୁ ଜଣାଇ ଦିଆଯାଇଛି। ପ୍ରକାଶ ଯେ, କିଛି ଦିନ ଧରି ଭୁବନେଶ୍ୱର ଅଞ୍ଚଳର ଜଣେ ପ୍ରଭାବଶାଳୀ ବ୍ୟକ୍ତି ଏକ କମ୍ପାନୀ ନାମରେ ଅଳ୍ପ କିଛି ଜମି କିଣିବା ପରେ ନିକଟରେ ଥିବା ପ୍ରାୟ ୫୦ ଏକରରୁ ଅଧିକ ସରକାରୀ ଜମିରେ ଡୋଜର ଲଗାଇ ଗଡିଆ ଖୋଳିବା ଆରମ୍ଭ କରିଥିଲା। ସରକାରୀ ଜମି ଜବରଦଖଲ କରି ଗଡିଆ ଖୋଳିବା ସହିତ ବେଆଇନ ଭାବେ ନିକଟରେ ଥିବା କାଦୁଆ ନଦୀକୁ ପୋତି ଦେବା ଭଳି ଅଭିଯୋଗ କରି ନିକଟସ୍ଥ ୩/୪ ଗ୍ରାମର ଲୋକମାନେ ଏହାକୁ ବିରୋଧ କରିଥିଲେ। ଅଭିଯୋଗସତ୍ତ୍ୱେ ସମ୍ପୃକ୍ତ କମ୍ପାନୀ ଏହାକୁ ମାନି ନ ଥିଲା। ଫଳରେ ସମ୍ପୃକ୍ତ ଗ୍ରାମବାସୀ ଖୋଳା ଯାଉଥିବା ସ୍ଥାନରେ ପହଞ୍ଚତ୍ ବେଆଇନ ମାଛ ପୋଖରୀ ଖୋଳା ବନ୍ଦ କରିଥିଲେ। ମହଲପଡା ସରପଞ୍ଚ ଶୀର୍ଷ ରଞ୍ଜନ ନାୟକ ସରକାରୀ ଜମିରେ ବେଆଇନ ମାଛ ପୋଖରୀ ଖୋଳିବା ସହିତ କାଦୁଆ ନଦୀକୁ ପୋତି ଯିବାକୁ ନେଇ ମୁଖ୍ୟମନ୍ତ୍ରୀ, ୫ଟି ସଚିବ, ରାଜସ୍ବ ବିଭାଗ ସହିତ ପୁରୀ ଜିଲାପାଳଙ୍କୁ ଟୁଇଟର ମାଧ୍ୟମରେ ଜଣାଇଥିଲେ।
ଏହି ଅଭିଯୋଗକୁ ନେଇ ଜିଲାପାଳ ବେଆଇନ ମାଛ ପୋଖରୀ ଖୋଳାକୁ ବନ୍ଦ କରିବା ସହିତ ସରକାରୀ ଜମି କେତେ ଜବରଦଖଲ କରାଯାଇଛି ତା’ଉପରେ ସବିଶେଷ ତଥ୍ୟ ତହସିଲଦାର ଏସ୍.କେ. ସାର୍ଗିଙ୍କୁ ମାଗିଥିଲେ। କିନ୍ତୁ ତହସିଲଦାରଙ୍କ ନିକଟରେ ଏହାର ତଥ୍ୟ ନ ଥିବାରୁ ତୁରନ୍ତ ଏହି ଦୁଇଟି ମୌଜାର ରାଜସ୍ବ ନିରୀକ୍ଷକ ସର୍କଲକୁ ତଥ୍ୟ ମାଗିବା ସହ ସରକାରୀ ସ୍ତରରେ ମାପଚୁପ କରିବାକୁ ନିର୍ଦ୍ଦେଶ ଦେଇଛନ୍ତି। ମହଲପଡା ସରପଞ୍ଚ ଓ ଶୋରଭା ସରପଞ୍ଚଙ୍କୁ ତହସିଲଦାର ଡାକି ଏହି ସରକାରୀ ମାପଚୁପ ସମୟରେ ଉପସ୍ଥିତ ରହିବାକୁ କହିିଥିବା ବେଳେ ଏପର୍ଯ୍ୟନ୍ତ କୌଣସି ମାପଚୁପ ହୋଇ ନାହିଁ। ଅନ୍ୟପଟେ ବେଆଇନ ଭାବେ ପୋଖରୀ ଖୋଳୁଥିବା କମ୍ପାନୀର କେତେଜଣ କର୍ମଚାରୀ ଏବେ ବିରୋଧ କରୁଥିବା ଗାଁରେ ପହଞ୍ଚି ଆପୋସ ସମାଧାନ କରିବାକୁ ଉଦ୍ୟମ କରୁଥିବା ଜଣାପଡ଼ିଛି। ଯଦି ବେଆଇନ ମାଛ ପୋଖରୀ ଖୋଳିବା ବନ୍ଦ କରା ନ ଯାଏ, ତା’ହେଲେ ଆଗାମୀ ବର୍ଷାଦିନରେ ଗୋପ ବ୍ଲକର ୬ଟି ପଞ୍ଚାୟତର କେତେକ ଗାଁ ଓ ଶହ ଶହ ହେକ୍ଟର ଚାଷଜମି ବୁଡିବ ବୋଲି ସରପଞ୍ଚ ଶୀର୍ଷରଞ୍ଜନ ନାୟକ କହିଛନ୍ତି। ଏ ସମ୍ପର୍କରେ ତହସିଲଦାର ଏସ୍.କେ. ସାର୍ଗି କହିଛନ୍ତି, ରାଜ୍ୟ ସରକାର ଓ ଜିଲାପାଳଙ୍କ ନିର୍ଦ୍ଦେଶରେ କାର୍ଯ୍ୟ ଆରମ୍ଭ ହୋଇଛି। ତଦନ୍ତ ପରେ ସମ୍ପୃକ୍ତ କମ୍ପାନୀ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।