ଓ୍ବାଶିଂଟନ,୫।୧୦: ଖାଲିସ୍ତାନୀ ନେତା ହରଦୀପ ସିଂ ନିଜାରଙ୍କ ହତ୍ୟାକୁ ନେଇ ଭାରତ ଏବଂ କାନାଡା ମଧ୍ୟରେ ବିବାଦ ଲାଗି ରହିଛି। ଏହି ସମୟରେ ଆମେରିକା ଦୂତାବାସ ଗୁରୁବାର କାନାଡା ସହ କୂଟନୈତିକ ବିବାଦରେ ଭାରତ-ଆମେରିକା ସମ୍ପର୍କ ଉପରେ ପ୍ରଭାବ ପକାଇପାରେ ବୋଲି ଖବରକୁ ପ୍ରତ୍ୟାଖ୍ୟାନ କରିଛି। ରିପୋର୍ଟରେ କୁହାଯାଇଥିଲା ଯେ, ଏହି ଆଶଙ୍କା କରି ଆମେରିକାର ରାଷ୍ଟ୍ରଦୂତ ଏରିକ ଗାର୍ସଟି ତାଙ୍କ ଦଳକୁ ସତର୍କ କରାଇଥିଲେ।
ଆମେରିକୀୟ ମିଡିଆ ସଂଗଠନ ଦି ପଲିଟିକ ରିପୋର୍ଟ କରିଛି ଯେ, ଗାର୍ସଟି ଏହା ମଧ୍ୟ କହିଥିଲେ, ଏକ ନିର୍ଦ୍ଧିଷ୍ଟ ସମୟ ପାଇଁ ଆମେରିକା ଭାରତୀୟ ଅଧିକାରୀଙ୍କ ସହ ସମ୍ପର୍କ ହ୍ରାସ କରିବା ଆବଶ୍ୟକ। ଯେତେବେଳେ ଏହି ରିପୋର୍ଟ ବିଷୟରେ ପଚରାଗଲା, ଆମେରିକାର ଦୂତାବାସ ମୁଖପାତ୍ର କହିଛନ୍ତି, ଆମେରିକା ଦୂତାବାସ ଏହି ରିପୋର୍ଟକୁ ପ୍ରତ୍ୟାଖ୍ୟାନ କରୁଛି। ଆମେରିକା ଏବଂ ଭାରତର ଲୋକ ଏବଂ ସରକାର ମଧ୍ୟରେ ଭାଗିଦାରୀକୁ ଆହୁରି ଗଭୀର କରିବା ପାଇଁ ରାଷ୍ଟ୍ରଦୂତ ଗାର୍ସଟି ପ୍ରତିଦିନ କଠିନ ପରିଶ୍ରମ କରୁଛନ୍ତି।