ଭଞ୍ଜନଗର,୧୧।୧(ଡି.ଏନ.ଏ)-ଭଞ୍ଜନଗର ଉତ୍ତର ଘୁମୁସର ବନଖଣ୍ଡର ଜଙ୍ଗଲ ନିକଟବର୍ତ୍ତୀ କେତେକ ଗ୍ରାମରେ ହାତୀ, ବାର୍ହା ଆତଙ୍କ ଦେଖାଦେଇଛି। ହାତୀ ଜଙ୍ଗଲରୁ ବାହାରି ଖଳାରେ ଥିବା ଚାଷୀଙ୍କ ଧାନ ଫସଲ ନଷ୍ଟ କରୁଛି। ଶନିବାର ସୁଦ୍ଧା ଜଗନ୍ନାଥପ୍ରସାଦ ରେଞ୍ଜରେ ୧୭ ହାତୀ ଥିବାବେଳେ ଗାଲେରୀ ରେଞ୍ଜରେ ୧ ଓ ତାରସିଂ ରେଞ୍ଜରେ ୪ଟି ହାତୀ ଥିବା ଜଣାପଡ଼ିଛି। କେନ୍ଦ୍ରୀୟ ବନାଞ୍ଚଳ ଓ ମୁଜାଗଡ଼ ରେଞ୍ଜରେ ଶୁକ୍ରବାର ହାତୀ ଚଳପ୍ରଚଳ ନଥିବା ଜଣାପଡ଼ିଛି। ୨ଦିନ ପୂର୍ବେ ଏକୁଟିଆ ବୁଲୁଥିବା ମାଖନା ହାତୀଟି ଲୁଣ୍ଡୁରିପଦରର ଚାଷୀମାନଙ୍କ ଖଳାରେ ଥିବା ଧାନ ନଷ୍ଟ କରିଛି। ବନ୍ୟଜନ୍ତୁ ଆତଙ୍କ ଲାଗି ରହିଥିବାବେଳେ କେତେଜଣ କର୍ମଚାରୀ କର୍ମସ୍ଥଳ ଛାଡ଼ି ବେନିୟମ ଭାବେସହରରେ ରହୁଛନ୍ତି। ଏନେଇ କିଛିଦିନ ପୂର୍ବେ ଜଣେ ଉପରିସ୍ଥ ଅଧିକାରୀ ଅଧସ୍ତନ କର୍ମଚାରୀଙ୍କୁ କାହିଁକି କର୍ମସ୍ଥଳୀରେ ରହୁନାହଁ ବୋଲି ପଚାରିଥିଲେ। ଏଣିକି ନରହିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ। ଓଲଟା ସମ୍ପୃକ୍ତ କର୍ମଚାରୀ ଉପରିସ୍ଥ ଅଧିକାରୀଙ୍କୁ ମଧ୍ୟ ଆଇନର ନାଲି ଆଖି ଦେଖାଇଥିଲେ। କର୍ମଚାରୀମାନଙ୍କ ମଧ୍ୟରେ ସମନ୍ବୟ ଅଭାବ ଯୋଗୁ ଏଭଳି ସମସ୍ୟା ଉପୁଜିଛି। ଯେଉଁ ଅଞ୍ଚଳର କର୍ମଚାରୀମାନେ କର୍ମସ୍ଥଳ ଛାଡ଼ି ଅନ୍ୟତ୍ର ରହୁଛନ୍ତି ସେଠି ବନ୍ୟଜନ୍ତୁ ଉପଦ୍ରବ ଘଟିଲେ ଲୋକେ ବନ ବିଭାଗକୁ ତୁରନ୍ତ ଖବର ଦେଇପାରୁନାହାନ୍ତି। ଅନ୍ୟପଟେ ଜଙ୍ଗଲରୁ କାଠ ଚୋରିକୁ ନେଇ ମଧ୍ୟ ବିଭିନ୍ନ ସମୟରେ କର୍ମଚାରୀ ଓ ଅଭିଯୁକ୍ତମାନଙ୍କ ମଧ୍ୟରେ ବିବାଦ ଦେଖାଦେଉଛି। କିଛିଦିନ ପୂର୍ବେ ମୁଜାଗଡ଼ ରେଞ୍ଜରେ ଜଣେ କର୍ମଚାରୀଙ୍କୁ ଅଭିଯୁକ୍ତମାନେ ଆକ୍ରମଣ କରିଥିବା ନେଇ ଅଭିଯୋଗ ହୋଇଥିଲା। ଶୁକ୍ରବାର ଏହି ବନଖଣ୍ଡରେ ଜଣେ ମହିଳା ଜଙ୍ଗଲକୁ ଯାଇଥିବାବେଳେ ଜଣେ ମହିଳା କର୍ମଚାରୀଙ୍କ ସହ ତାଙ୍କର ଝଗଡ଼ା ହୋଇଥିଲା। ଅନ୍ୟପକ୍ଷରେ ଜଙ୍ଗଲ କର୍ମଚାରୀଙ୍କ ଉପରେ ମଧ୍ୟ କାମବୋଝ ବଢୁଛି। ବିଗତ ଦିନରେ ଜଙ୍ଗଲ ସୁରକ୍ଷା ଓ ପୁନରୁଦ୍ଧାର କାର୍ଯ୍ୟପ୍ରତି ବିଭାଗୀୟ କର୍ମଚାରୀଙ୍କୁ ଅଧିକାଂଶ ସମୟ ନିୟୋଜିତ କରାଯାଉଥିଲା। ବର୍ତ୍ତମାନ ଭିତ୍ତିଭୂମି, ପରିବେଶ, ପର୍ଯ୍ୟଟନ ସହ ଅନ୍ୟାନ୍ୟ କାର୍ଯ୍ୟରେ କର୍ମଚାରୀଙ୍କୁ ନିୟୋଜିତ କରାଯାଉଛି। ଏହିଭଳି ପରିସ୍ଥିତିରେ ଆଞ୍ଚଳିକ ମୁଖ୍ୟ ବନ ସଂରକ୍ଷକ ଶନିବାର ଉତ୍ତର ଘୁମୁସର ବନଖଣ୍ଡ ଗସ୍ତରେ ଆସି ବିଭାଗରେ ଚାଲିଥିବା ବିଭିନ୍ନ କାର୍ଯ୍ୟର ସମୀକ୍ଷା କରିବେ। ଏନେଇ ଡ଼ିଏଫ୍ଓ ଅଭୟ କୁମାର ଦଳେଇଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ବନ୍ୟଜନ୍ତୁ ସହ ଲୋକଙ୍କ ଧନଜୀବନ କିଭଳି ସୁରକ୍ଷିତ ରହିବ ସେନେଇ ପଦକ୍ଷେପ ନିଆଯାଉଛି।