ବଇଣ୍ଡା,୭।୧(ଡି.ଏନ.ଏ.)
ଅନୁଗୋଳ ଜିଲା କିଶୋରନଗର ଥାନା ଚୁଡାଖାଇ ଗ୍ରାମର ଏକ ଦଳିତ ପରିବାରକୁ ବାସନ୍ଦ ଅଭିଯୋଗରେ ପୋଲିସ ସୋମବାର ୫ ଜଣଙ୍କୁ କୋର୍ଟଚାଲାଣ କରିଛି। ସେମାନେ ହେଲେ ଗ୍ରାମ ସଭାପତି ଉପେନ୍ଦ୍ର ସାହୁ, ସମ୍ପାଦକ ସୁରେଶ କୁମାର ପ୍ରଧାନ, କୋଷାଧ୍ୟକ୍ଷ କରୁଣାକର ପ୍ରଧାନ, ଲବକିଶୋର ସାହୁ, ଶ୍ରୀନିବାସ ପ୍ରଧାନ। ପୋଲିସ କହିଛି, ଚୁଡାଖାଇ ଗ୍ରାମର ପ୍ରତିମା ମିର୍ଦ୍ଧାଙ୍କୁ ଗ୍ରାମବାସୀ ବାସନ୍ଦ କରିବା ସହ ମାନସିକ ନିର୍ଯାତନା ଦେଉଥିବା ନେଇ ଶନିବାର ପ୍ରତିମା ଥାନାରେ ଅଭିଯୋଗ କରିଥିଲେ। ପୋଲିସ ନଂ. ୨/୨୦ରେ ଏକ ମାମଲା ରୁଜୁ କରି ରବିବାର ରାତିରେ ଅଭିଯୁକ୍ତଙ୍କୁ ଗିରଫ କରିଥିଲା।
ପ୍ରତିମା ତାଙ୍କ ଅଭିଯୋଗପତ୍ରରେ ଦର୍ଶାଇଛନ୍ତି, ଗ୍ରାମବାସୀ ସେହି ଗ୍ରାମର ସୁଶାନ୍ତ କୁମାର ଦାସଙ୍କ ପରିବାରକୁ କିଛିମାସ ତଳେ ବାସନ୍ଦ କରିଥିଲେ। ତାଙ୍କୁ ରାସ୍ତା, ପୋଖରୀ ଆଦି ମନା କରାଯିବା ସହ କେହି ନ ମିଶିବା ପାଇଁ ଡାକବାଜି ମାଧ୍ୟରେ ଜଣାଇ ଦିଆଯାଇଥିଲା। ହେଲେ ପ୍ରତିମାଙ୍କ ଘର ସୁଶାନ୍ତଙ୍କ ଘର ନିକଟରେ ହୋଇଥିବାରୁ ସେ ତାଙ୍କ ପରିବାର ଲୋକଙ୍କ ସହ କଥାବାର୍ତ୍ତା ହେଉଥିଲେ। ଏ ସମ୍ପର୍କରେ କେତେଜଣ ବ୍ୟକ୍ତି ଜାଣି ସୁଶାନ୍ତଙ୍କ ସହ କଥା ନ ହେବା ପାଇଁ ପରାମର୍ଶ ଦେଇଥିଲେ। ହେଲେ ପ୍ରତିମା ଏହା ନ ମାନିବାରୁ ଏକ ସପ୍ତାହ ତଳେ ତାଙ୍କୁ ମଧ୍ୟ ଗାଁରୁ ବାସନ୍ଦ କରାଯିବା ସହ ତାଙ୍କୁ ନଳକୂଅ, ପୋଖରୀ, ରାସ୍ତା ଆଦି ବାରଣ କରାଯାଇଛି। ଶନିବାର ଗ୍ରାମଦେବୀଙ୍କ ବାର୍ଷିକ ପୂଜା ହେଉଥିବା ଯୋଗୁ ସେ ତାଙ୍କ ଚାନ୍ଦା ଗ୍ରାମ ସଭାପତିଙ୍କୁ ଦେଇଥିଲେ ମଧ୍ୟ ତାହା ଗ୍ରହଣ କରା ନ ଯିବା ସହ ଗାଳିଗୁଲଜ କରାଯାଇଥିବା ଅଭିଯୋଗପତ୍ରରେ ଦର୍ଶାଯାଇଛି। ଅନୁଗୋଳ ଜିଲା ଏସ୍ପିଙ୍କ ନିର୍ଦ୍ଦେଶକ୍ରମେ ଆଠମଲ୍ଲିକ ଏସ୍ଡିପିଓ ଭବାନୀ ଶଙ୍କର ଉଦଗାତା, କିଶୋରନଗର ଆଇଆଇସି ପ୍ରତିଭା ମାଝି, କିଆକଟା ଆଇଆଇସି ଓନାମ ଲାକରା, ଆଠମଲ୍ଲିକ ଆଇଆଇସି ପ୍ରିୟବ୍ରତ ଦାସଙ୍କ ସହ ଏକ ଟିମ ରବିବାର ରାତିରେ ଚୁଡାଖାଇ ଗ୍ରାମରେ ଚଢାଉ କରି ସମ୍ପୃକ୍ତ ୫ଜଣଙ୍କୁ ଗିରଫ କରିଥିଲେ।