ସମ୍ବଲପୁର, ୨୭।୫ (ବ୍ୟୁରୋ): ଗଙ୍ଗାଧର ମେହେର ଜୁନିୟର କଲେଜକୁ ଅନ୍ୟତ୍ର ସ୍ଥାନାନ୍ତର ଓ ବିଭାଜନକୁ ବିରୋଧ କରାଯାଇଛି । ସୋମବାର ଏ ନେଇ କଲେଜ ଛାତ୍ରୀଛାତ୍ର ଜିଲାପାଳ ଅଫିସ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି । ରାଜ୍ୟ ସରକାରଙ୍କ ଉଦ୍ଦେଶ୍ୟରେ ସେମାନେ ୫ଦଫା ସମ୍ବଳିତ ଏକ ସ୍ମାରକପତ୍ର ସମ୍ବଲପୁର ଅତିରିକ୍ତ ଜିଲାପାଳ ଅଜୟ କୁମାର ଜେନାଙ୍କୁ ପ୍ରଦାନ କରିଛନ୍ତି। ସ୍ଥାନାନ୍ତର କି ବିଭାଗଜନ କଲେ ଆନ୍ଦୋଳନ ଭୟାବହ ହେବ ବୋଲି ଏମାନେ ଚେତାବନୀ ଦେଇଛନ୍ତି । ସତ୍ୟବ୍ରତ ପ୍ରଧାନ, ମେହେନ୍ଦି କୁମ୍ଭାର, ଦୀପ୍ତିଶିଖା କୁଲୁ, ଅଲେଖ ପ୍ରସାଦ ପାତ୍ର, ସଙ୍ଗୀତା ମେହେର, ରୋଶନ କୁମାର, ଶ୍ୱାତୀ ହୋତା, ନିତୁ ପ୍ରଧାନ, ବିଜୟଲକ୍ଷ୍ମୀ ସାହୁ, ସ୍ବେତପଦ୍ମା ସାମଲ ପ୍ରମୁଖ ସକାଳ ୮ଟାରେ ଗଙ୍ଗାଧର ମେହେର କଲେଜ ଛକରୁ ଜିଲାପାଳଙ୍କ କାର୍ଯ୍ୟାଳୟ ଅଭିମୁଖେ ଶୋଭାଯାତ୍ରାରେ ବାହାରିଥିଲେ। ହସ୍ପିଟାଲ ରୋଡ, ମୁଦିପଡା ଛକ, କୁଞ୍ଜେଲପଡା ଛକ, ବଡସଡକ, ମ୍ୟୁନିସିପାଲଟି ଛକ ଦେଇ ଏମାନେ ଜିଲାପାଳଙ୍କ ଅଫିସ ସମ୍ମୁଖରେ ପହଞ୍ଚତ୍ଥିଲେ । ସେଠାରେ ଗଙ୍ଗାଧର ମେହେର ଜୁନିୟର କଲେଜକୁ ଅନ୍ୟତ୍ର ସ୍ଥାନାନ୍ତର ଓ ବିଭାଜନକୁ ବିରୋଧ କରି ସ୍ଲୋଗାନ ଦେଇଥିଲେ । ପୁରାତନ ଛାତ୍ର ସଂଘ ସଭ୍ୟମାନେ ମଧ୍ୟ ଏଥିରେ ସାମିଲ ଥିଲେ । ତେବେ ଏ ନେଇ କଲେଜ ଦ୍ୱିତୀୟ ବର୍ଷ ଛାତ୍ରୀ ସଙ୍ଗୀତା ମେହେର କହିଛନ୍ତି ଯେ, ସ୍ବଭାବ କବି ଗଙ୍ଗାଧର ମେହେରଙ୍କ ନାମରେ କଲେଜ ନାମିତ ହୋଇଛି । ଏହା ପଶ୍ଚିମ ଓଡିଶାବାସୀଙ୍କ ପାଇଁ ଗର୍ବ ଓ ଗୌରବ। ତେଣୁ ଏହାର ସ୍ଥାନାନ୍ତର ପ୍ରଶ୍ନ ଉଠୁନାହିଁ । ସମ୍ବଲପୁର ସହରର କେନ୍ଦ୍ର ସ୍ଥଳରେ କଲେଜ ରହିଛି । ଏଠାରୁ ରେଳ ଷ୍ଟେଶନ ଓ ବସ ଷ୍ଟାଣ୍ଡ ପାଖ। ତେଣୁ ହୀରାକୁଦ, ବୁର୍ଲା, ରେଙ୍ଗାଲି, ମାନେଶ୍ୱର, ଧମା, ଗୋଶାଳା ପ୍ରଭୃତି ଅଞ୍ଚଳର ଛାତ୍ରୀଛାତ୍ର ସୁବିଧାରେ କଲେଜ ଆସିଥାନ୍ତି । ଏଥିସହ ପଶ୍ଚିମ ଓଡିଶା ସମେତ ରାଜ୍ୟର ବିଭିନ୍ନ ଅଞ୍ଚଳରୁ ଆସି ପାଠ ପଢ଼ୁଥିବା ଛାତ୍ରୀଛାତ୍ରଙ୍କ ପାଇଁ ଏହି ସ୍ଥାନ ସୁବିଧାଜନକ ହୋଇଥାଏ। ସେହିପରି କଲେଜ ଛାତ୍ର ହେମାନନ୍ଦ ରୋହିଦାସ କହନ୍ତି ଯେ, କଲେଜର ଅବସ୍ଥିତି ଛାତ୍ରୀଛାତ୍ର ଓ ଅଭିଭାବକ, ଅଧ୍ୟାପିକା, ଅଧ୍ୟାପକମାନଙ୍କୁ ସୁହାଉଛି । ଅପରପକ୍ଷେ ହଷ୍ଟେଲରେ ରହୁଥିବା ଛାତ୍ରୀଛାତ୍ର ସୁବିଧାରେ ଦୈନଦିନ ସାମଗ୍ରୀ ଓ ପାଠ୍ୟ ଉପକରଣ କିଣିବାକୁ କଲେଜ ସମ୍ମୁଖ ଦୋକାନ ଗୁଡିକ ଯିବା ଆସିବା କରିଥାନ୍ତି। ତେଣୁ ଏହାକୁ ସ୍ଥାନାନ୍ତର କଲେ ଛାତ୍ରୀଛାତ୍ର ଅସୁବିଧାର ସମ୍ମୁଖୀନ ହେବେ। ଏଣୁ ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଏହି କଲେଜକୁ ସ୍ଥାନାନ୍ତର କରିବା ନିଷ୍ପତ୍ତିରୁ ନିବୃତ୍ତ ରୁହନ୍ତୁ। ନ ହେଲେ ବିରାଟ ଛାତ୍ର ଆନ୍ଦୋଳନ ମୁଣ୍ଡ ଟେକିବ। ଫଳରେ ପରବର୍ତ୍ତୀ ସମୟରେ ସରକାର ହେଉ କି ଜିଲା ପ୍ରଶାସନ ଏହାକୁ ସମ୍ଭାଳିକା କଷ୍ଟକର ହୋଇ ପଡିବ। ଏଣୁ ବେଳ ଥାଉ ଥାଉ ଏଥିପ୍ରତି ଜିଲାପ୍ରଶାସନ, ଶିକ୍ଷା ବିଭାଗ ଓ ରାଜ୍ୟ ସରକାର ଦୃଷ୍ଟି ଦିଅନ୍ତୁ।