ଗଙ୍ଗାରେ ବାପାଙ୍କ ଅସ୍ଥି ବିସର୍ଜନ ବେଳେ ଭାବୁକ ହେଲେ ରୋହନ
ହରିଦ୍ୱାର,୨୬।୮: ଉତ୍ତରାଖଣ୍ଡ ହରିଦ୍ୱାରର ହରକି ପୋଡି ସ୍ଥିତ ବ୍ରହ୍ମାକୁଣ୍ଡରେ ପୂର୍ବତନ ଅର୍ଥମନ୍ତ୍ରୀ ତଥା ଭାଜପାର ବରିଷ୍ଠ ନେତା ଅରୁଣ ଜେଟଲୀଙ୍କ ଅସ୍ଥି ବିସର୍ଜନ କରାଯାଇଛି। ସ୍ବର୍ଗତ ଅରୁଣ ଜେଟଲୀଙ୍କ ପୁଅ ରୋହନ ଜେଟଲୀ ଓ ପରିବାରର ଅନ୍ୟ ସଦସ୍ୟ ସୋମବାର ଅପରାହ୍ନରେ ଅସ୍ଥି କଳଶ ନେଇ ହରିଦ୍ୱାରରେ ପହଞ୍ଚିଥିଲେ। ଏହାପରେ ରୀତିନୀତିରେ ପୂଜାର୍ଚ୍ଚନା କରାଯାଇ ଗଙ୍ଗାରେ ପୁଅ ରୋହନ ଅସ୍ଥି ବିସର୍ଜନ କରିଥିଲେ। ସେହି ସମୟରେ ସେ ଭାବୁକ ହୋଇପଡ଼ିଥିବା ଦେଖିବାକୁ ମିଳିଛି। ଏହି ଅବସରରେ କେନ୍ଦ୍ରୀୟ ମାନବ ସମ୍ବଳ ଓ ବିକାଶ ମନ୍ତ୍ରୀ ରମେଶ ପୋଖରିଆଲ ନିଶଙ୍କ, ମୁଖ୍ୟମନ୍ତ୍ରୀ ତ୍ରିବେନ୍ଦ୍ର ସିଂହ ରାଓ୍ବତ, ଏମ୍ପି ଅଜୟ ଭଟ୍ଟ, କ୍ୟାବିନେଟ ମନ୍ତ୍ରୀ ମଦନ କୌଶିକ, ଧନ ସିଂହ ରାଓ୍ବତ, ହରକ ସିଂହ ରାଓ୍ବତ ଓ ଅରବିନ୍ଦ ପାଣ୍ଡେ ସମେତ ବହୁ ଭାଜପା ନେତା ସାମିଲ ହୋଇଥିଲେ। ଏଥିସହ ବାବା ରାମଦେବ ଓ ବରିଷ୍ଠ ସାମ୍ବାଦିକ ରଜତ ଶର୍ମା ମଧ୍ୟ ସ୍ବର୍ଗତ ଅରୁଣ ଜେଟଲୀଙ୍କୁ ଶେଷ ଶ୍ରଦ୍ଧାଞ୍ଜଳି ଦେବା ପାଇଁ ହରିଦ୍ୱାରରେ ପହଞ୍ଚିଥିଲେ। ହରିକି ପୋଡିରେ ପହଞ୍ଚିବା ପରେ ସମସ୍ତେ ସ୍ବର୍ଗତ ଅରୁଣ ଜେଟଲୀଙ୍କ ଫଟୋରେ ପୁଷ୍ପମାଲ୍ୟ ଚଢ଼ାଇ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।