ଜଳେଶ୍ୱର, ୧୦।୭(ଡି.ଏନ.ଏ.)-ଜଳେଶ୍ୱର ବ୍ଲକ ଆରୁହା ପଞ୍ଚାୟତର ଆରୁହା ଗ୍ରାମସ୍ଥିତ ହରପ୍ରସାଦ ଏକାଡ଼େମୀ ହାଇସ୍କୁଲରେ ମଙ୍ଗଳବାର ଗଛକଟା ଯାଉଥିବା ବେଳେ ଅସାବଧାନତା ବଶତଃ ୱାଚ୍ମ୍ୟାନ୍ କୁରେନ୍ଦ୍ର ପାତ୍ର(୪୮)ଙ୍କ ଉପରେ ପଡିଯିବାରୁ ତାଙ୍କର ମୃତ୍ୟୁ ଘଟିଛି। ଏହାର ପ୍ରତିବାଦ କରି ସ୍କୁଲ ପରିସରରେ ଶତାଧିକ ଗ୍ରାମବାସୀ ଏକଜୁଟ୍ ହୋଇ ମୃତ କୁରେନ୍ଦ୍ରଙ୍କ ପରିବାରର ଜଣଙ୍କୁ ଉକ୍ତ ସ୍କୁଲରେ ଚାକିରି ତଥା କ୍ଷତିପୂରଣ ଦାବି କରି ଧାରଣାରେ ବସିଥିଲେ। ପରିସ୍ଥିତି ଉତ୍ତେଜନାପୂର୍ଣ୍ଣ ହେବାରୁ ଖବରପାଇ ସ୍ଥାନୀୟ ବିଇଓ ବିଜୟ କୁମାର ନାଥ, ସିଆର୍ସିସି ପଙ୍କଜ କୁମାର ଜେନା, ଶିକ୍ଷକ ନେତା ମନୋରଞ୍ଜନ ଦାସ ପ୍ରମୁଖ ଧାରଣାସ୍ଥଳରେ ପହଞ୍ଚତ୍ ଦାବି ପୂରଣ ଲାଗି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ଏଥିସହିତ ମୃତକଙ୍କ ପରିବାରକୁ ବାଲେଶ୍ୱର ଜିଲା ଶିକ୍ଷାଧିକାରୀଙ୍କ ତରଫରୁ ୫ ହଜାର ଓ ଓଷ୍ଟା ସଂଘ ତରଫରୁ ୫ହଜାର ଟଙ୍କାର ସହାୟତା ରାଶି ପ୍ରଦାନ କରାଯାଇଛି। ପୋଲିସ ଏନେଇ ଏକ ଅପମୃତ୍ୟୁ ମାମଲା (ନଂ.୧୭/୧୯) ରୁଜୁ କରି ୱାଚ୍ମ୍ୟାନ୍ଙ୍କ ମୃତଦେହ ବ୍ୟବଚ୍ଛେଦ କରାଇଛି। ଧାରଣାରେ ସରପଞ୍ଚ ହରିଶ ଭୂୟଁା, ପୂର୍ବତନ ସରପଞ୍ଚ ମଧୁସୂଦନ ଦତ୍ତ, ଗ୍ରାମମୁଖ୍ୟ କାର୍ତ୍ତିକ ଚନ୍ଦ୍ର ଭୂୟଁା, ଦେବ କୁମାର ନନ୍ଦୀ, ଗୌରୀଶଙ୍କର ଗିରି, ଜନ୍ମେଜୟ ପ୍ରଧାନ, ଲମ୍ବୁଧର ପାଳ, ମନୋଜ କୁମାର ଭୂୟଁା ପ୍ରମୁଖ ଗ୍ରାମବାସୀ ବସିଥିଲେ।