ପାଲଲହଡା,୧୬।୯(ଡି.ଏନ.ଏ.)-ପାଲଲହଡାର ପ୍ରସିଦ୍ଧ ଗଣପର୍ବ ଗଜଲକ୍ଷ୍ମୀ ପୂଜା ଆସନ୍ତା ୧୩ରେ ଅନୁଷ୍ଠିତ ହେବ। ଏ ନେଇ ସୋମବାର ଉପଖଣ୍ଡ ପ୍ରଶାସନ ପକ୍ଷରୁ ସ୍ଥାନୀୟ ପଞ୍ଚାୟତ ସମିତି ସଭାଗୃହଠାରେ ଏକ ପ୍ରସ୍ତୁତି ବୈଠକ ବସିଥିଲା। ଉପଜିଲାପାଳ ଅଜିତ କୁମାର ପ୍ରଧାନଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ମୁଖ୍ୟଅତିଥି ଭାବେ ପାଲଲହଡା ବିଧାୟକ ମୁକେଶ କୁମାର ପାଲ ଯୋଗ ଦେଇଥିଲେ। ପୂଜା କମିଟି ଗୁଡିକ ପୂର୍ତ୍ତବିଭାଗ ଏବଂ ଅଗ୍ନିଶମ ବିଭାଗର ଅନୁମତି ନେଇ ସହର ମଧ୍ୟରେ ସୁଉଚ୍ଚ ତୋରଣ ନିର୍ମାଣ କରିବେ। ଚଳିତ ବର୍ଷ ୧୦ ଦିନ ଧରି ମା’ଙ୍କ ପୂଜା ଆୟୋଜନ ହେବ। ଶାନ୍ତିଶୃଙ୍ଖଳା ପାଇଁ ପାଲଲହଡା ପୋଲିସକୁ ମୁତୟନ କରାଯିବ ବୋଲି ବୈଠକରେ ଆଲୋଚନା ହୋଇଥିଲା। ସେହିପରି ପୂଜା ସମୟରେ ହୋଟେଲରେ ବାସି ଖାଦ୍ୟ ବିକ୍ରି କରା ନ ଯାଏ ସେଥିପ୍ରତି ଯତ୍ନବାନ ରହିବା ପାଇଁ ଜିଲାପାଳ ସ୍ବାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଥିଲେ। ପିଇବା ପାଣିର ବ୍ୟବସ୍ଥା ଏବଂ ପରିମଳ ବ୍ୟବସ୍ଥାକୁ ସୁଦୃଢ କରିବା ପାଇଁ ପାଲଲହଡା ବିଡିଓ ଏବଂ ନିଜିଗ ପଞ୍ଚାୟତ ସରପଞ୍ଚଙ୍କୁ ଦାୟିତ୍ୱ ଦିଆଯାଇଥିଲା।
ସେହିପରି ଚଳିତ ବର୍ଷ ମା’ଙ୍କ ଭସାଣି ଏବଂ ମେଳଣ ଉତ୍ସବ ଅକ୍ଟୋବର ୨୩ରେ ଅନୁଷ୍ଠିତ ହେବ। ସମସ୍ତ ମେଢ଼ ଗୁଡ଼ିକ ପୂର୍ବାହ୍ନ ୧୧ଟା ସୁଦ୍ଧା ସ୍ଥାନୀୟ ଷ୍ଟାଡିୟମରେ ଏକାଠି ହେବେ ଏବଂ ଅପରାହ୍ନ ୨ଟାରୁ ଭସାଣି ଶୋଭାଯାତ୍ରା ଆରମ୍ଭ ହୋଇ ରାତି ୧୦ଟା ମଧ୍ୟରେ ଶେଷ କରିବାକୁ ନିଷ୍ପତି ହୋଇଥିଲା। ଚଳିତ ବର୍ଷ ଭସାଣିରେ ପ୍ରଶାସନ ପକ୍ଷରୁ ଡି.ଜେ ସାଉଣ୍ଡ ଉପରେ ସମ୍ପୂର୍ଣ୍ଣ କଟକଣା ଲାଗୁ କରାଯାଇଛି। ଯଦି କୌଣସି ପୂଜା କମିଟି ଡିଜେ ସାଉଣ୍ଡ ବ୍ୟବହାର କରନ୍ତି ତେବେ କମିଟି କର୍ମକର୍ତ୍ତା ଏବଂ ଡିଜେ ସାଉଣ୍ଡ ମାଲିକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିଷ୍ପତି ନିଆଯାଇଛି। ଅନ୍ୟମାନଙ୍କ ମଧ୍ୟରେ ବ୍ଲକ ଅଧ୍ୟକ୍ଷ ନବକିଶୋର ନାୟକ, ବିଡିଓ ତ୍ରିବିକ୍ରମ କୁମୁରା, ଉପଖଣ୍ଡ ସ୍ବାସ୍ଥ୍ୟ ଅଧିକାରୀ, ପାଲଲହଡା ଥାନା ଅଧିକାରୀ କନକ ମାଝୀ, କେନ୍ଦ୍ରୀୟ ଗଜ ଲକ୍ଷ୍ମୀ ପୂଜା କମିଟି ସଭାପତି ଲିଙ୍ଗରାଜ ଦାସ, ସମ୍ପାଦକ ସୁଶିଲ କୁମାର ସାମଲଙ୍କ ସହ ୯ ଗୋଟି ପୂଜା କମିଟିର କର୍ମକର୍ତ୍ତା, ଉପଖଣ୍ଡର ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ। (ଫଟୋ-)