ଛତ୍ରପୁର, ୩।୫(ଡି.ଏନ୍.ଏ.)- ଗଞ୍ଜାମ ଜିଲା ଛତ୍ରପୁର ବ୍ଲକକୁ ସୁରଟରୁ ୨ଟି ବସ୍ରେ ୧୩୫ ଜଣ ପ୍ରବାସୀ ଆସି ପହଞ୍ଚିଛନ୍ତି। ଛତ୍ରପୁର ବ୍ଲକ ବଡମାଧପୁରରେ ଶନିବାର ବିଳମ୍ବିତ ରାତିରେ ସୁରତରୁ ୬୩ ଜଣ ପ୍ରବାସୀ ଓଡିଆ ଆସିଛନ୍ତି। ଏମାନଙ୍କୁ ବ୍ଲକର ବଡ଼ମାଧପୁର ପଞ୍ଚାୟତ ଅଧିନ ଧୀରେଶ୍ୱର ବିଦ୍ୟାପୀଠ ସ୍କୁଲରେ କରାଯାଇଥିବା ଅସ୍ଥାୟୀ କ୍ବାରାଣ୍ଟାଇନ କେନ୍ଦ୍ରରେ ରଖାଯାଇଛି । ଏହି ୬୩ ଜଣଙ୍କ ମଧ୍ୟରୁ ୪୦ ଜଣ କେବଳ ଛତ୍ରପୁର ବ୍ଲକ ବଡମାଧପୁର ପଞ୍ଚାୟତର ହୋଇଥିବା ବେଳେ ୨୩ ଜଣ ଅନ୍ୟ ବ୍ଲକର ବୋଲି ଜଣାପଡିଛି । ଏମାନଙ୍କୁ ପ୍ରଥମେ ଅସ୍ଥାୟୀ କ୍ବାରାଣ୍ଟାଇନ କେନ୍ଦ୍ରକୁ ପୁଲିସ ଏସ୍କର୍ଟ ମାଧ୍ୟମରେ ଅଣାଯାଇଥିଲା। ଏହାପରେ ଜନସ୍ବାସ୍ଥ୍ୟ ଅଧିକାରୀ ବରୁଣ ପାଣିଗ୍ରାହୀଙ୍କ ନେତୃତ୍ୱରେ ସେମାନଙ୍କ ସ୍ବାସ୍ଥ୍ୟବସ୍ଥା ଯାଞ୍ଚ କରାଯାଇଥିଲା । ସେମାନଙ୍କ ମଧ୍ୟରୁ ୬ଜଣଙ୍କୁ ସାମାନ୍ୟ ଜ୍ବର ରହିଥିବା ମେଡିକାଲ ଟିମ୍ ପକ୍ଷରୁ ସୂଚନା ଦିଆଯାଇଛି । ସେମାନଙ୍କ ସ୍ବାବ ବ୍ରହ୍ମପୁରକୁ ଟେଷ୍ଟ ପାଇଁ ପଠାଯାଇଛି । ଏହି ସୁରତ ଫେରନ୍ତା ପ୍ରବାସୀମାନେ ୩୦ ତାରିଖରେ ସୁରତର ଡାଇମଣ୍ଡ ଅଞ୍ଚଳରୁ ଆସିଛନ୍ତି । ସେହିପରି ରବିବାର ଭୋର ୪ଟା ବେଳେ ସୁରଟରୁ ଆଉ ଏକ ବସ୍ରେ ୭୨ ଜଣ ଛତ୍ରପୁର ଆସି ପହଞ୍ଚିଛନ୍ତି। ଏମାନଙ୍କୁ ଚିକଲଖଣ୍ଡି ପଞ୍ଚାୟତର ଜିଲା ପଞ୍ଚାୟତ ସାଧନ କେନ୍ଦ୍ର କ୍ୱାରାଣ୍ଟାଇନ ସେଣ୍ଟରରେ ରଖାଯାଇଛି। ଏହି କେନ୍ଦ୍ରରେ ଏମାନେ ୧୪ ଦିନ ରହିବେ। ଏମାନଙ୍କ ପ୍ରତ୍ୟେକ ଦିନ ହାଜିରା ନିଆଯିବା ସହ ଦିନକୁ ଦୁଇଥର ସ୍ବାସ୍ଥ୍ୟ ପରୀକ୍ଷା କରାଯିବ ବୋଲି ସୂଚନା ମିଳିଛି।
