ଛତ୍ରପୁର,୧୦।୪(ଡି.ଏନ୍.ଏ.)- କରୋନା ସନ୍ଦିଗ୍ଧଙ୍କୁ ଘରୁ ହସ୍ପିଟାଲକୁ ନେବା ପାଇଁ ଗଞ୍ଜାମ ଜିଲା ପ୍ରଶାସନ ପକ୍ଷରୁ ସାଧାରଣ ଗାଡିକୁ ସ୍ବତନ୍ତ୍ର କୋଭିଡ ଆମ୍ବୁଲାନ୍ସରେ ପରିଣତ କରାଯାଇଛି। ବର୍ତମାନ ଜ଼ିଲାରେ ୪୪ଟି କୋଭିଡ୍ ଆମ୍ବୁଲାନ୍ସ ବୁଲୁଛ। ଖବର ପାଇ ଘରୁ କରୋନା ସଂଦିଗ୍ଧଙ୍କୁ ଉକ୍ତ ଆମ୍ବୁଲାନ୍ସ ଯୋଗେ ହସ୍ପିଟାଲକୁ ନିଆଯାଉଛି । ଏଥିସହ ଉକ୍ତ କୋଭିଡ୍ ଆମ୍ବୁଲାନ୍ସର ଚାଳକଙ୍କୁ ପିପିଇ(ବ୍ୟକ୍ତିଗତ ସୁରକ୍ଷା ଇକ୍ୟୁପ୍ମେଣ୍ଟ) କିଟ୍ ପ୍ରଶାସନ ପକ୍ଷରୁ ପ୍ରଦାନ କରାଯାଇଛି ।
କରୋନା ସଂକ୍ରମଣ ରୋକିବା ଲାଗି ଗଞ୍ଜାମ ଜିଲା ପ୍ରଶାସନ ପକ୍ଷରୁ ଉଦ୍ୟମ ଜାରି ରହିଛି। ସନ୍ଦିଗ୍ଧଙ୍କୁ ଚିହ୍ନଟଠାରୁ ଆରମ୍ଭ କରି ମେଡିକାଲ ଓ ଆଇସୋଲଶନ୍ ସେଣ୍ଟର ନେବା କାର୍ଯ୍ୟରେ ନିୟୋଜିତ ଆମ୍ବୁଲାନ୍ସ ଚାଳକ କିଭଳି ସଂକ୍ରମଣରୁ ରକ୍ଷା ପାଇପାରିବେ ତାହା ଅତ୍ୟଧିକ ଗୁରୁତ୍ୱ ବହନ କରୁଛି। ଏଥିପାଇଁ ପ୍ରଶାସନ ଏମାନଙ୍କୁ ପିପିଇ କିଟ୍ ପ୍ରଦାନ କରାଯାଇଥିବା ସୂଚନା ଦିଆଯାଇଛି। ତେବେ ମିଶନ ଶକ୍ତି ଅଧୀନ ମହିଳା ସଙ୍ଘର ସଦସ୍ୟାମାନେ ସେଫ୍ଟି ଗାଉନ୍ ସିଲେଇ କରୁଛନ୍ତି। ଉକ୍ତ କିଟ୍ରେ ମାସ୍କ, ହେଲମେଟ୍, ଗ୍ଲୋବ୍ସ, ସକ୍ସ ଓ ଗାଉନ ରହିଛି। ବର୍ତମାନ ସୁଦ୍ଧା ଏପରି ୧୫୦୦ କିଟ ପ୍ରସ୍ତୁତ ହୋଇସାରିଲାଣି ବୋଲି ସୂଚନା ମିଳିଛି।