ଗଞ୍ଜାମ,୧୭।୪(ଡି.ଏନ୍.ଏ.): କରୋନା ଭୂତାଣୁ ସାରା ବିଶ୍ୱରେ କାୟା ବିସ୍ତାର କରିଚାଲିଛି । ଦିନକୁ ଦିନ କରୋନା ଭୂତାଣୁ ସଂକ୍ରମିତଙ୍କ ସଂଖ୍ୟା ବଢୁବାରେ ଲାଗିଛି। ଏଥିପାଇଁ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି । ଏହି କ୍ରମରେ ଲକ୍ଡାଉନ ଅବଧିକୁ ଆସନ୍ତା ମେ’ ୩ ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି। ଗଞ୍ଜାମ ଜିଲାରେ ଏହାକୁ କଡ଼ାକଡି କରାଯାଇଛି । ମେ’ ୩ ପରେ ବାହାର ରାଜ୍ୟରୁ ଆସିବାକୁ ଥିବା ଲୋକଙ୍କୁ ନିଜ ନିଜ ଗ୍ରାମକୁ ନ ପଠାଇ ସେମାନଙ୍କୁ କ୍ୱାରାଣ୍ଟାଇନରେ ରଖିବାକୁ ଜିଲା ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଛି। ଏଥିପାଇଁ ଗଞ୍ଜାମ ବ୍ଲକ ଅଧୀନରେ ଥିବା ସ୍କୁଲ ଓ କଲେଜକୁ କ୍ୱାରାଣ୍ଟଇନ ହଲ କରାଯିବ। ଏ ନେଇ ଆବଶ୍ୟକ ସାନିଟାଇଜର ଗ୍ରାସୀମ କମ୍ପାନୀ ପକ୍ଷରୁ ଯୋଗାଇ ଦିଆଯିବ ବୋଲି କମ୍ପାନୀ ଡିଜିଏମ୍ ରବୀନ୍ଦ୍ର କୁମାର ମହାନ୍ତି କହିଛନ୍ତି।
ଏ ନେଇ ବିଡିଓ ଜ୍ୟୋତି ଶଙ୍କର ରାୟ କୁହନ୍ତି, ବ୍ଲକ ଅଞ୍ଚଳର କେତେ ଲୋକ ବାହାରେ ଅଛନ୍ତି ସେ ନେଇ ଏକ ତାଲିକା ପ୍ରସ୍ତୁତ କରାଯାଇ ଜିଲା ପ୍ରଶାସନକୁ ଅବଗତ କରାଯିବ। ସେମାନେ ଆସିବା ପରେ ବିଭିନ୍ନ ସ୍କୁଲରେ ରଖାଯାଇ ଖାଇବାକୁ ମଧ୍ୟ ଦିଆଯିବ। ଏଥିସହିତ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ୧୫ ଦିନ ସେଠାରେ ରଖାଯିବ ବୋଲି ବିଡିଓ ରାୟ କହିଛନ୍ତି ।
