ବ୍ରହ୍ମପୁର ଅଫିସ୍,୧୩ା୬-ଗଞ୍ଜାମ ଜିଲାରେ ଟିଟାନାସ୍ ଏବଂ ଆଡଲଟ୍ ଡିପ୍ଥେରିଆ (ଟିଡି) ଟିକାର ବ୍ୟବହାର ଆରମ୍ଭ ହୋଇଛି। ବ୍ରହ୍ମପୁର ସିଟି ହସ୍ପିଟାଲ୍ ପରିସରସ୍ଥ ପୋଷ୍ଟପାର୍ଟମ ଏବଂ ଟିକାକରଣ କେନ୍ଦ୍ରରେ ବୁଧବାର ସକାଳେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ଜିଲା ମୁଖ୍ୟ ଜନ ସ୍ବାସ୍ଥ୍ୟ ଅଧିକାରୀ ତଥା ଜିଲା ମୁଖ୍ୟ ଚିକିତ୍ସାଧିକାରୀ ଡା. ବିଜୟ କୁମାର ପାଣିଗ୍ରାହୀ ଏହାକୁ ଆରମ୍ଭ କରିଥିଲେ। ପୂର୍ବରୁ ଗର୍ଭବତୀ ଏବଂ ଶିଶୁମାନଙ୍କୁ ଟିଟାନସ୍ ଟକ୍ସାଇଡ୍(ଟିଟି) ଟିକା ଦିଆଯାଉଥିଲା। କିନ୍ତୁ ଭାରତ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ନ୍ୟାଶନାଲ୍ ଟେକ୍ନିକାଲ୍ ଆଡଭାଇଜରି ଗ୍ରୁପ୍ ଅନ୍ ଇମ୍ୟୁନାଇଜେଶନ୍(ଏନ୍ଟିଏଜିଆଇ) ତରଫରୁ ଟିଟି ବଦଳରେ ଟିଡି ଟିକାର ବ୍ୟବହାର ପାଇଁ ନିର୍ଦ୍ଦେଶ ଦିଆଯାଇଛି। ପୂର୍ବରୁ ୧୩୩ ଦେଶ ଏହାକୁ ଲାଗୁ କରିସାରିଲେଣି। ଶିଶୁଙ୍କୁ ଟିଟି ଟିକା ଦିଆଯାଉଥିଲେ ମଧ୍ୟ ଡିପ୍ଥେରିଆ ରୋଗ ଦେଖିବାକୁ ମିଳିଥିଲା । କ୍ରମାଗତ ଭାବେ ଡିପ୍ଥେରିଆ ରୋଗୀର ଶିଶୁମାନେ ଅଧିକରୁ ଅଧିକ ଆକ୍ରାନ୍ତ ହେବାରେ ଲାଗିଲେ। ତେଣୁ ଚଳିତ ବର୍ଷଠାରୁ ଟିଟି ବଦଳରେ ଟିଡି ଟିକା ଦେବାକୁ ନିଷ୍ପତ୍ତିି ହୋଇଛି । ଗର୍ଭବତୀଙ୍କୁ ୩ଟି ପର୍ଯ୍ୟାୟରେ ଯଥା ଗର୍ଭାବସ୍ଥାର ପ୍ରାଥମିକ ଅବସ୍ଥା, ଏହାର ୪ ସପ୍ତାହ ପରେ ଏବଂ ଯଦି ପୂର୍ବ ଗର୍ଭଧାରଣର ତିନି ବର୍ଷ ପରେ ପୁଣି ଗର୍ଭଧାରଣ କରନ୍ତି, ତେବେ ପୁଣି ଥରେ ଟିଡି ଟିକା ଦିଆଯିବ। ସେହିପରି ୧୦ବର୍ଷ ଏବଂ ୧୬ ବର୍ଷରେ ପିଲାମାନଙ୍କୁ ମଧ୍ୟ ଏହି ଟିକା ଦିଆଯିବ । ଗଞ୍ଜାମ ଜିଲାରେ ପ୍ରାୟ ୫୯,୩୬୮ଜଣ ଗର୍ଭବତୀ, ୫୮,୩୪୨ଜଣ ୧୦ବର୍ଷୀୟ ଶିଶୁ ଏବଂ ୫୯,୫୦୩ଜଣ ୧୬ବର୍ଷ ବୟସ୍କ ଏପରି ଭାବେ ମୋଟ ୧ ଲକ୍ଷ ୭୭ହଜାର ୨୧୩ଜଣଙ୍କୁ ଟିକା ପ୍ରଦାନ କରିବାକୁ ଲକ୍ଷ୍ୟ ରଖାଯାଇଥିବା ଜିଲା ମୁଖ୍ୟ ଚିକିତ୍ସାଧିକାରୀ ଡା. ପାଣିଗ୍ରାହୀ ପ୍ରକାଶ କରିଛନ୍ତି । ଏଏନ୍ଏମ୍, ସ୍ବାସ୍ଥ୍ୟ କର୍ମୀ ଏବଂ ମେଡ଼ିକାଲ୍ ଅଫିସର୍ଙ୍କୁ ଏ ସମ୍ପର୍କରେ ତାଲିମ୍ ପ୍ରଦାନ କରାଯାଇଛି। ପର୍ଯ୍ୟାୟକ୍ରମେ ଜିଲାବ୍ୟାପୀ ଟିକାକରଣ କରାଯିବ ବୋଲି ଡା. ପାଣିଗ୍ରାହୀ ସୂଚନା ଦେଇଛନ୍ତି । କାର୍ଯ୍ୟକ୍ରମରେ ଏଡିପିଏଚ୍ଓ(ପରିବାର କଲ୍ୟାଣ) ଡା. ଭି.ସରୋଜିନୀ ଦେବୀ, ସିଟି ହସ୍ପିଟାଲ୍ର ସୁପରିଣ୍ଟେଣ୍ଡେଣ୍ଟ ଡା. ପି. କୁର୍ମେୟା, ପ୍ରଫେସର(କମ୍ୟୁନିଟି ମେଡ଼ିସିନ୍) ଡା. ଦୁର୍ଗା ପ୍ରସାଦ ଶତପଥୀ, ପୋଷ୍ଟପାର୍ଟମ ଏବଂ ଟିକାକରଣ କେନ୍ଦ୍ରର ମୁଖ୍ୟ ଡା. ସୀତାଂଶୁ ଶତପଥୀ, ପ୍ରଜନନ ଏବଂ ଶିଶୁ ସ୍ବାସ୍ଥ୍ୟ ପ୍ରବନ୍ଧକ ଶକ୍ତି କୁମାର ଦିଗାଲ୍ଙ୍କ ସମେତ ସ୍ବାସ୍ଥ୍ୟ ବିଭାଗର ଅଧିକାରୀମାନେ ଉପସ୍ଥିତ ଥିଲେ ।