ବ୍ରହ୍ମପୁର ଅଫିସ,୧୭ା୭: ଏକ ଗଞ୍ଜେଇ ଚୋରା ଚାଲାଣ ମାମଲାର ଶୁଣାଣି କରି ଅତିରିକ୍ତ ଜିଲା ଦୌରାଜଜ (ଏଡିଜେ)-୧ ସଞ୍ଜୟ କୁମାର ସାହୁ ୨ ଅଭିଯୁକ୍ତଙ୍କୁ ୧୫ ବର୍ଷ ଲେଖାଏ ଜେଲଦଣ୍ଡରେ ଦଣ୍ଡିତ କରିଛନ୍ତି। ପ୍ରତ୍ୟେକଙ୍କୁ ଦେଢ଼ଲକ୍ଷ ଟଙ୍କା ଲେଖାଏ ଜରିମାନା ଦେବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟେ ଉଭୟ ଅଭିଯୁକ୍ତଙ୍କୁ ଅଧିକ ୨ ବର୍ଷ ଜେଲ ଦଣ୍ଡ ପାଇଁ ନିର୍ଦ୍ଦେଶ ହୋଇଛି ବୋଲି ଅତିରିକ୍ତ ପିପି ଅନିଲ କୁମାର ସାହୁ ସୂଚନା ଦେଇଛନ୍ତି।
ପ୍ରକାଶ ଯେ, ୨୦୧୭ ଅକ୍ଟୋବର ୨୮ ଭୋର ୫ଟା ବେଳେ ଦିଗପହଣ୍ଡି ନିକଟ ପୁଞ୍ଜିକୟା ଛକରେ ଅବକାରୀ ପୋଲିସ ଚଢାଉ କରି ଏକ ଅଟୋ ଯାଞ୍ଚ କରିଥିଲା। ସେଥିରେ ୬ଟି ଜରି ବ୍ୟାଗରେ ୧୭୧ କେଜି ଗଞ୍ଜେଇ ଥିବା ଜଣାପଡିଥିଲା। ଗଜପତି ଜିଲା ମୋହନା ଥାନା ଅନ୍ତର୍ଗତ ପାନଗୁଡା ଗ୍ରାମର ଦିଲୀପ ଅଧିକାରୀ ଓ ଡେଙ୍ଗାସରଙ୍ଗ ଗ୍ରାମର ମାଥ୍ୟୁସ ନାୟକଙ୍କୁ ଅବକାରୀ ପୋଲିସ ଗିରଫ କରିଥିଲା। ଜେରା ବେଳେ ମୋହନା ଅଞ୍ଚଳରୁ ଗଞ୍ଜେଇ ବ୍ରହ୍ମପୁରକୁ ଚୋରା ଚାଲାଣ ହେଉଥିବା ଜଣାପଡିଥିଲା। ଉପରୋକ୍ତ ଅଭିଯୁକ୍ତଙ୍କୁ ମାମଲା ନଂ.୧୭/୧୭ରେ ଅବକାରୀ ପୋଲିସ କୋର୍ଟ ଚାଲାଣ କରିଥିଲା। ସେମାନେ ଆଜିଯାଏ ମଣ୍ଡଳ କାରାଗାରରେ ବିଚାରାଧୀନ ବନ୍ଦୀ ଭାବେ ଥିଲେ। ମଙ୍ଗଳବାର ଏନ୍ଡିପିଏସ୍ ମାମଲା ନଂ. ୨ ଏସିସି ୧୨/୧୭ର ବିଚାର ବେଳେ ଏଡିଜେ-୨ ସଞ୍ଜୟ କୁମାର ସାହୁ ୩ ଜଣ ସାକ୍ଷୀଙ୍କ ବୟାନକୁ ଆଧାର କରି ଉଭୟ ଅଭିଯୁକ୍ତଙ୍କୁ ଉପରୋକ୍ତ ଦଣ୍ଡାଦେଶ ଶୁଣାଇଛନ୍ତି। ସରକାରଙ୍କ ପକ୍ଷରୁ ଅତିରିକ୍ତ ପିପି ଅନିଲ ସାହୁ ଓ ମୁଦଲାଙ୍କ ପକ୍ଷରୁ ଆଇନଜୀବୀ ସୁଧାଂଶୁ ପଣ୍ଡା ମକଦ୍ଦମା ପରିଚାଳନା କରିଥିଲେ।
