ଭୁବନେଶ୍ୱର,୨୮।୨(ବ୍ୟୁରୋ): ରାଜ୍ୟରେ ଗଞ୍ଜେଇ ବେପାରୀମାନେ ଏବେ ବେଶ୍ ସକ୍ରୀୟ। ଦିନକୁ ଦିନ ଅଭିନବ ଉପାୟ ଅବଲମ୍ବନ କରି କୋଟିକୋଟି ଟଙ୍କାର ଗଞ୍ଜେଇ ଚାଲାଣ କରୁଛନ୍ତି। କେତେବେଳେ କାର୍ ଡିକିରେ ତ’ ଆଉ କେତେବେଳେ କାର୍ର ସିଟ୍ ତଳେ ରଖି ଗୋଟେ ସ୍ଥାନରୁ ଅନ୍ୟତ୍ର ଚାଲାଣ କରୁଛନ୍ତି। ବୁଧବାର ଆନ୍ଧ୍ରପ୍ରଦେଶରୁ ଭୁବନେଶ୍ୱରକୁ ଏକ କଦଳୀ ବୋଝେଇ ଟ୍ରକ୍ରେ ଗଞ୍ଜେଇ ଚାଲାଣ ହେଉଥିବାବେଳେ ଧରାପଡ଼ିଛି। ହାଇଦ୍ରାବାଦ୍ ଜୋନାଲ ୟୁନିଟର ରାଜସ୍ବ ବିଭାଗର ଅଧିକାରୀମାନେ ଉକ୍ତ ଟ୍ରକ୍ରୁ ପ୍ରାୟ ୧୬୩୮ କେଜି ଗଞ୍ଜେଇ ଜବତ କରିବା ସହ ଟ୍ରକ୍(ଓଡି ୦୨-ବିଡି-୪୧୫୫) ଜବତ କରିଛନ୍ତି। ଜବତ ଗଞ୍ଜେଇର ମୂଲ୍ୟ ପ୍ରାୟ ୨କୋଟି ୪୫ଲକ୍ଷ ଟଙ୍କା ହେବ ବୋଲି ବିଭାଗ ପକ୍ଷରୁ କୁହାଯାଇଛି। ଉକ୍ତ ଟ୍ରକକୁ ସୁରକ୍ଷା ଦେଉଥିବା ଏକ ଇଣ୍ଡିଗୋ କାର (ଓଡି୦୨-ୟୁ- ୭୧୨୩)କୁ ମଧ୍ୟ ଜବତ କରାଯିବାସହ ଏହି କାରବାର ସମ୍ପୃକ୍ତ ୪ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି।
ମିଳିଥିବା ସୂଚନା ମୁତାବକ ଆନ୍ଧ୍ରପ୍ରଦେଶର ନରସିଂପାଟଣା ଅଞ୍ଚଳରେ ଏକ କଦଳୀ ବୋଝେଇ ଟ୍ରକ୍ରେ ବହୁମାତ୍ରାରେ ଗଞ୍ଜେଇ ଚାଲାଣ ହେଉଥିବା ଏବଂ ଏହାକୁ ଏକ ଏକ କାର୍ ସୁରକ୍ଷା ଦେଉଥିବା ସମ୍ପର୍କରେ ରାଜସ୍ବ ଗୋଇନ୍ଦା ବିଭାଗକୁ ସୂଚନା ମିଳିଥିଲା। ଉକ୍ତ ସୂଚନାକୁ ଆଧାର କରି ରାଜସ୍ବ ଗୋଇନ୍ଦା ଅଧିକାରୀମାନେ ବିଶାଖାପାଟଣା ଏନ୍ଏଡି ଜଙ୍କ୍ସନରେ ଉକ୍ତ ଟ୍ରକକୁ ଅଟକାଇ ଯାଞ୍ଚ କରିଥିଲେ। ଟ୍ରକରେ କଦଳୀ ଲଦା ହୋଇଥିବାବେଳ ତଳେ ଗଞ୍ଜେଇ ଥିବା ପ୍ରାଥମିକ ତଦନ୍ତରୁ ଜଣାପଡ଼ିଥିଲା। ଅଧିକାରୀମାନେ ଉକ୍ତ ୨ଟି ଗାଡିକୁ ଜବତ କରିବା ସହ ୪ ଜଣଙ୍କୁ ଗିରଫ କରିଥିଲେ। ଟ୍ରକ୍ରୁ କଦଳୀ ବାହାର କରାଯିବା ପରେ ସେଥିରେ ୪୦ଟି ବସ୍ତାରେ ଥିବା ୮୦୦ ପ୍ୟାକେଟ ଗଞ୍ଜେଇକୁ ଜବତ କରାଯାଇଥିଲା। ଗିରଫ ଟ୍ରକ୍ ଡ୍ରାଇଭରଙ୍କୁ ପଚରାଉଚରା ପରେ ସେମାନେ ଅନେକ ତଥ୍ୟ ପ୍ରଦାନ କରିଛନ୍ତି। ତେବେ ଏହି କାରବାରରେ ଓଡ଼ିଶାର କାହାର ସମ୍ପୃକ୍ତି ଅଛି, ଏତେ ପରିମାଣର ଗଞ୍ଜେଇ କାହାକୁ ଦିଆଯାଇଥାନ୍ତା, ଏହି କାରବାରର ନେଟୱାର୍କ କେତେ ପର୍ଯ୍ୟନ୍ତ ଲମ୍ବିଛି ସେନେଇ ରାଜସ୍ବ ଗୁଇନ୍ଦା ବିଭାଗ ତଦନ୍ତ ଚଳାଇଛି।