ଆସିକା,୧୮ା୬(ଡି.ଏନ୍.ଏ.)- ଗଞ୍ଜାମ ଜିଲା ଆସିକା ଥାନା କଲେଜ ଛକ ରାସ୍ତାରେ ସୋମବାର ଅପରାହ୍ନରେ ଗୋଟିଏ ବାଇକ୍ ଓ ଏକ ପିକଅପ୍ ଭ୍ୟାନ୍ରୁ ୨ ବସ୍ତା ଗଞ୍ଜେଇ ଜବତ କରିଛି ପୋଲିସ। ଗାଡି ଦୁଇଟିକୁ ଜବତ କରିବା ସହ ସେଥିରେ ଥିବା ୩ଜଣଙ୍କୁ ଗିରଫ କରିଛି। ସେମାନେ ହେଲେ ବାଇକ୍ ଚାଳକ କନ୍ଧମାଳ ଜିଲ୍ଲା ସାରଙ୍ଗଗଡ ଥାନା ମାଗୁଡିଙ୍ଗିଆ ଗ୍ରାମର କଣ୍ଠେଶ୍ୱର ଦିଗାଲ୍ ଓ ପିକ୍ଅପରେ ଥିବା ଭଞ୍ଜନଗର ଥାନା ରତଙ୍ଗ ଗ୍ରାମର କବି ସ୍ବାଇଁ ଓ ମନୋଜ କୁମାର ନାୟକ। ଅନ୍ୟଜଣେ ଅଭିଯୁକ୍ତ ଘଟଣାସ୍ଥଳରୁ ଚମ୍ପଟ ମାରିଥିଲେ। ଜବତ ଗଞ୍ଜେଇର ପରିମାଣ ପ୍ରାୟ ୪୫ କେଜି ହେବ। ଏହା କନ୍ଧମାଳ ଜିଲା କଳିଙ୍ଗା ଜଙ୍ଗସନରୁ କୋଦଳାକୁ ଚାଲାଣ ହେଉଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ନଂ.୩୪୧/୨୦ରେ ମାମଲା ରୁଜୁକରି ବୁଧବାର ସକାଳେ ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ପ୍ରଶାନ୍ତ କୁମାର ସାହୁ ସୂଚନା ଦେଇଛନ୍ତି।