ବଇଣ୍ଡା, ୮ା୬(ଡି.ଏନ.ଏ.) ବଞ୍ଚିବା ପାଇଁ ବାଛିଥିବା ବାଟରୁ ରୋଜଗାର ମିଳୁନି। କରୋନା କଟକଣା ଯୋଗୁ ବୃତ୍ତିରେ ତାଲା ପଡିଛି। ଏବେ ସଂକ୍ରମଣ ଭୟଠାରୁ ବଳିଯାଇଛି ପେଟପାଟଣା ଚିନ୍ତା। ଅନ୍ୟ ପନ୍ଥାରେ ଜୀବିକା ନିର୍ବାହ ପାଇଁ ରାସ୍ତା ଦେଖାଯାଉ ନ ଥିବାରୁ ଦୁର୍ଦ୍ଦଶାରେ ଦିନ ବିତାଉଛନ୍ତି ଗାଡ଼ି ଚାଳକଙ୍କ ପରିବାର। କେବେ କରୋନା ଭୟ ଦୂର ହେବ ଆଉ ଗାଡ଼ି ସହ ଜୀବନ ଗଡ଼ିବ ସେ ଚିନ୍ତାରେ ପଡିଛନ୍ତି ଅନୁଗୋଳ ଜିଲା ଆଠମଲ୍ଲିକ ବ୍ଲକ ପାଇକସାହି ପଞ୍ଚାୟତର ୨୨୦ ଗାଡ଼ି ଡ୍ରାଇଭର।
ପାଇକସାହି ଗାଡ଼ି ଚାଳକ ସଂଘ ସଭାପତି ଭୁବନ କୁମାର ଜେନାଙ୍କ କହିବା ମୁତାବକ, ବିଭିନ୍ନ ଗାଡ଼ି ଚଳାଇ ଘର ଚଳାଉଥିବା ଚାଳକମାନେ କରୋନା କଟକଣା ଯୋଗୁ ଦୀର୍ଘ ୨ ମାସ ହେବ ଘରେ ହାତ ବାନ୍ଧି ବସିଛନ୍ତି। ରୋଜଗାର ହେଉ ନ ଥିବାରୁ ସେମାନଙ୍କ ଆର୍ଥିକ ସ୍ଥିତି ଦୋହଲିଯାଇଛି। ପାଇକସାହିର ୨୨୦ ଚାଳକ ପରିବାର ପ୍ରତିପୋଷଣ ପାଇଁ ଡ୍ରାଇଭର ବୃତ୍ତିକୁ ବାଛି ନେଇଛନ୍ତି। ସେମାନଙ୍କ ମଧ୍ୟରୁ କେତେଜଣ ଅନ୍ତଃରାଜ୍ୟ ଟ୍ରକ୍ ଡ୍ରାଇଭର ଅଛନ୍ତି। ଅନ୍ୟମାନେ ରାଜ୍ୟ ତଥା ବିଭିନ୍ନ ଅଞ୍ଚଳକୁ ଘରୋଇ ବସ୍ ଚଳାଇଥାନ୍ତି। ଅନ୍ୟ କେତେଜଣ ଘରୋଇ କାର୍ ଚଳାଇ ମଧ୍ୟ ଦୁଇ ପଇସା ରୋଜଗାର କରୁଥିଲେ। ହେଲେ ମାର୍ଚ୍ଚରେ କରୋନା କଟକଣା ଜାରିହେବା ପରେ ସେମାନେ ଘରେ ବସି ରହିଛନ୍ତି। ଅନେକଙ୍କୁ ସେମାନଙ୍କ ପୂର୍ବମାସର ଦରମା ମଧ୍ୟ ମିଳିନାହିଁ। କିଛି ଚାଳକ ବାଧ୍ୟ ହୋଇ ମଜୁରି ଲାଗୁଛନ୍ତି। ସେହିପରି ସେମାନଙ୍କ ପାଇଁ କୌଣସି ବୀମା ଯୋଜନା ନ ଥିବାରୁ ଭୟରେ ଅନେକେ ଗାଡ଼ି ଚଳାଇବାକୁ ମଧ୍ୟ ମଙ୍ଗୁନାହାନ୍ତି। ତେଣୁ ପରିବହନରେ ନିୟୋଜିତ ସମସ୍ତ ଗାଡ଼ିଚାଳକଙ୍କ ପାଇଁ ୧୫ ଲକ୍ଷ ଟଙ୍କାର ବୀମା କରାଯିବା ସହ ଅନ୍ୟାନ୍ୟ ସରକାରୀ ସହାୟତା ପ୍ରଦାନ ପାଇଁ ସଂଘ ସମ୍ପାଦକ ଅନ୍ତର୍ଯ୍ୟାମୀ ସାହୁ, କୋଷାଧ୍ୟକ୍ଷ ପବନା ପ୍ରଧାନ ଦାବି କରିଛନ୍ତି। ଏଥିସହ ସଂଘ ପକ୍ଷରୁ ଏ ନେଇ ଜିଲାପାଳ, ଆଠମଲ୍ଲିକ ଉପଜିଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି। ଚାଳକଙ୍କ ସମସ୍ୟା ବାବଦରେ ସରକାରଙ୍କୁ ଅବଗତ କରାଯିବ ବୋଲି ଆଠମଲ୍ଲିକ ଉପଜିଲାପାଳ ଡ. ରଜନୀକାନ୍ତ ବିଶ୍ୱାଳ କହିଛନ୍ତି।