ଭୁବନେଶ୍ୱର,୧୯।୫(ବ୍ୟୁରୋ): ଦକ୍ଷିଣ ପୂର୍ବ ବଙ୍ଗୋପସାଗର ଏବଂ ଏହାର ଆଖପାଖରେ ସୃଷ୍ଟି ହୋଇଥିବା ବାତ୍ୟା ‘ଅମ୍ଫନ୍’ ପ୍ରଥମେ ମହାବାତ୍ୟା ଏବଂ ଏବେ ଅତିଭୀଷଣ ବାତ୍ୟାରେ ପରିଣତ ହୋଇସାରିଲାଣି। ଏବେ ଏହା ପାରାଦୀପଠାରୁ ୩୫୦ କିମି ଏବଂ ଦୀଘାରୁ ୫୧୦ କିମି ଦୂରରେ ରହିଛି। ଗତ ୬ ଘଣ୍ଟା ମଧ୍ୟରେ ବାତ୍ୟା ‘ଅମ୍ଫନ୍’ ଗତି ବଢ଼ାଇଛି। ଏବେ ଏହା ଘଣ୍ଟାକୁ ୧୮ କିଲୋମିଟର ବେଗରେ ଗତି କରୁଛି। ଏହା ପରେ ବାତ୍ୟା ଦକ୍ଷିଣ, ଦକ୍ଷିଣ-ପୂର୍ବକୁ ଗତି କରି ଉତ୍ତର-ପଶ୍ଚିମ ବଙ୍ଗୋପସାଗର ଅଞ୍ଚଳଦେଇ ସୁନ୍ଦରବନ ନିକଟରେ ସ୍ଥଳଭାଗ ଛୁଇଁବାର ଆକଳନ କରାଯାଉଛି। ୨୦ ତାରିଖ ଅପରାହ୍ନ-ସନ୍ଧ୍ୟା ମଧ୍ୟରେ ସ୍ଥଳଭାଗ ଛୁଇଁବା ସମୟରେ ପବନର ବେଗ ୧୫୫-୧୬୫ କିମି ରହିବ। ଏହା ୧୮୫ କିମି ପର୍ଯ୍ୟନ୍ତ ବଢ଼ିପାରେ। ଗୋପାଳପୁର-ପାରାଦୀପଠାରେ ଏହାର ଗତିବିଧି ଉପରେ ନଜର ରଖାଯାଇଛି।
ଭାରତୀୟ ପାଣିପାଗ କେନ୍ଦ୍ର ପକ୍ଷରୁ ଦିଆଯାଉଥିବା ସୂଚନା ଅନୁଯାୟୀ, ସକାଳ ୮.୩୦ ପରଠାରୁ ଏହାର ଗତିପଥ ସମାନ ରହିଛି। ଆଜି ସନ୍ଧ୍ୟାରୁ ରାତି ଭିତରେ ଓଡ଼ିଶା ଉପକୂଳରେ ବର୍ଷା ଓ ପବନ ହେବ। ପ୍ରାୟତଃ ୫୦-୬୫, ୭୦-୭୫ କିମି ରହିବ। ବୁଧବାର ସକାଳୁ ପବନର ବେଗ ବଢ଼ିବ। ଉତ୍ତର ଓଡ଼ିଶାର କିଛି ସ୍ଥାନରେ ଏହାର ପ୍ରଭାବ ଅଧିକ ରହିବ। ସେଠାରେ ୧୦୦-୧୧୦ କିମି ପର୍ଯ୍ୟନ୍ତ ରହି ୧୨୫ କିମି ପର୍ଯ୍ୟନ୍ତ କଷ୍ଟିଂ ସ୍ପିଡ୍ ରହିବ ବୋଲି ଏସ୍ଆର୍ସି ପ୍ରଦୀପ ଜେନା ସୂଚନା ଦେଇଛନ୍ତି।