ବୈପାରୀଗୁଡା,୧୦ା୬ (ଡି.ଏନ୍.ଏ.)-କୋରାପୁଟ ଜିଲା ବୈପାରୀଗୁଡା ଥାନା ଅନ୍ତର୍ଗତ ଗୁପ୍ତେଶ୍ୱର ପଞ୍ଚାୟତ ଅନ୍ତର୍ଗତ କେନ୍ଦୁଗୁଡା ନିକଟସ୍ଥ ଜଙ୍ଗଲରୁ ପୋଲିସ ବ୍ୟାପକ ପରିମାଣର ମାଓବାଦୀ ସାମଗ୍ରୀ ଜବତ କରିଛି। ଏ ନେଇ ବୁଧବାର ଥାନା ପରିସରରେ ଜୟପୁର ଏସଡିପିଓ ବରୁନ ଗୁଣ୍ଠପାଲି ଆୟୋଜିତ ଖବରଦାତା ସମ୍ମିଳନୀରେ ଏହା ପ୍ରକାଶ କରିଛନ୍ତି। ପୂର୍ବ ସୂଚନାକୁ ଆଧାର କରି ବୁଧବାର ଭୋର ୫ଟାରେ ଡିଷ୍ଟ୍ରିକ୍ଟ ଭଲ୍ୟୁଣ୍ଟାରି ଫୋର୍ସ ଓ ବିଏସ୍ଏଫ-୧୫୧ ବାଟାଲିୟନ ପକ୍ଷରୁ କୋମ୍ବିଂ ଅପରେଶନ କରାଯାଇଥିଲା। ଏହି ସମୟରେ ଜଙ୍ଗଲର ଏକ ପଥର ଖୋଲ ମଧ୍ୟରେ ଗୋଟିଏ ପ୍ଲାଷ୍ଲିକ୍ ଡ୍ରମ ରଖାଯାଇଥିବା ପୋଲିସ ନଜରକୁ ଆସିଥିଲା। ତାହାକୁ ଆଣି ଯ।ଞ୍ଚ କରିବାରୁ ମାଓବାଦୀଙ୍କ ବିଭିନ୍ନ ସାମଗ୍ରୀ ମିଳିଥିଲା। ଏହାକୁ ଜବତ କରାଯାଇଛି। ଜବତ ସାମଗ୍ରୀ ମଧ୍ୟରେ ଗୋଟିଏ ୧୨ ବୋର୍ ରାଇଫଲ୍ ,୨ଟି କ୍ଲମର ମାଇନ୍ ବାର୍ ,୨୦ ମିଟର ତାର,୮ଟି ବ୍ୟାଟେରି,୧ କିଲୋ ଗନ୍ ପାଉଡର, ଲୁହା ଖଣ୍ଡ ୫ କିଲୋ, ୱାକି ଟକି ଗୋଟିଏ, ୟନିଫର୍ମ ବେଲ୍ଟ ୨ଟି, ବବି ଟ୍ରାପ୍ ୫ଟି, ବମ୍ ସଇଜ୍ ୨ଟି, ଜିଲୋଟିନ୍ ଷ୍ଟିକ୍ ୪୯ଟି, ଡେଟୋନେଟର ୪ଟି ,ପ୍ଲାଷ୍ଟିକ୍ ଡ୍ରମ ଗୋଟିଏ ଏବଂ ମାଓବାଦୀ ପୁସ୍ତିକା, ଲେଟ୍ର ପ୍ୟାଡ୍ ଆଦି ରହିଛି। ପୁସ୍ତିକାଗୁଡିକ ତେଲୁଗୁ ଭାଷାର ବୋଲି ଜଣାପଡିଛି। ୪ ବର୍ଷ ତଳେ ଏଠାରେ କ୍ୟାମ୍ପ କରିଥିବା ତେଲୁଗୁ ମାଓବାଦୀଙ୍କର ଏହି ସାମଗ୍ରୀ ହୋଇଥାଏ ପାରେ ବୋଲି ଅନୁମାନ କରାଯାଉଛି ା ଉକ୍ତ ସମ୍ମିଳନୀରେ ବିଏସ୍ଏଫ୍ କମାଣ୍ଡାଣ୍ଟ ଅଜୟ କମାର, କମାଣ୍ଡାଣ୍ଟ ତରୁଣ ପ୍ରଧାନ ଏବଂ ବୈପାରୀଗୁଡା ଥାନା ଅଧିକାରୀ ଅଂଶୁମାନ ଦ୍ବିବେଦୀ ଉପସ୍ଥିତ ଥିଲେ। ସୂଚନାଯୋଗ୍ୟ କିଛି ବର୍ଷ ତଳେ ଦଣ୍ଡାବାଡି ଓ ରାମଗରି ଅଞ୍ଚଳ ତେଲୁଗୁ ମାଓବାଦୀ କ୍ୟାଡରଙ୍କ କବ୍ଜାରେ ଥିଲା। ରାମଗିରି ଓ ଦଣ୍ଡାବାଡିଠାରେ ବିଏସ୍ଏଫ୍ କ୍ୟାମ୍ପ ପ୍ରତିଷ୍ଠା ହେବା ପରେ ଏହି ଅଞ୍ଚଳ ମାଓବାଦୀଙ୍କ କବଳରୁ ମୁକ୍ତ ହୋଇଥିଲା। ଏବେ ପୁଣି ଛତିଶଗଡ ରାଜ୍ୟର ହାର୍ଡକୋର ମାଓବାଦୀମାନେ କାୟା ବିସ୍ତାର କରୁଛନ୍ତି। ନିକଟରେ ସେମାନଙ୍କ ଦ୍ବାରା ଆୟୋଜିତ ଏକ ଗୁପ୍ତ ବୈଠକରେ ରାସ୍ତା କାମ ନେଇଥିବା କେତେକ ଠିକାଦାର ଯୋଗ ଦେଇଥିଲେ।