କଲମପୁର,୩୧। ୭ (ଡି.ଏନ୍.ଏ.): କେନ୍ଦ୍ର ଆର ରାଏଜ୍ ସରକାର ଗଁାଗଁଲିନୁ ସହର ତକ୍ ଗମନାଗମନ ସୁବିଧା ଲାଗି କୋଟି କୋଟି ଟଁକା ଖରଚ୍ କରୁଛନ୍। ହେଲେ ଆଏଜ୍ ବି ଅନେକ ଗଁାଗଁଡ଼ାକେ ଫିଦିନଅଁା ରାସ୍ତା ଖଁଡ଼େ ନଁାଇଁନ। ଆରକେତେ ଗଁାରେ ଥିବାର ରାସ୍ତାଘାଟ ମରାମତି ଅଭାବୁ ଲୁକ୍କର ଲାଗି ମରନ୍ଯଁତା ପାଲଟୁଛେ। ଏନ୍ତା ଗୁଟେ ଅବହେଲିତ ରାସ୍ତା ଦେଖ୍ବାକେ ମିଲିଛେ କଳାହାଣ୍ଡି ଜିଲା କଲମପୁର ବ୍ଲକ ମିନଗୁର ପଁଚେତ୍ରେ।
ସୂଚନା ଅନ୍ସାରେ ମିନଗୁର ପଁଚେତ୍ ଭଇଁରିଠାନୁ ଧନପୁର ହାଇସ୍କୁଲ ତକ୍ ଯାଇଥିବାର ରାସ୍ତାର ଅବସ୍ତା ବହୁତ ଖରାପ ଅଛେ। ରାସ୍ତାଟା ଅଂଚଲର ଗୁଟେ ମୁଖିଆ ରାସ୍ତା ଆଏ। ଫିଦିନ ଇ ରାସ୍ତା ଦେଇ ଭଇଁରି, ମାନପଡ଼ା, ଭିରକାପଡ଼ା, ମିନଗୁର, ସର୍ଗିପଡ଼ା, ସିସୋପଡ଼ା, ଧନପୁର, ଭେଲାଗଁାର ଶତାଧିକ୍ ଛାତ୍ରୀଛାତ୍ର ସ୍କୁଲକେ ଯାଆସ କରୁଛନ୍। ହେଲେ ମରାମତି, ଦେଖ୍ଭାଲ ଅଭାବୁ ଇ ରାସ୍ତାଟା ଏହେଦେ କାଦୋ ସରସର ହେଇଯାଇଛେ। ଫିଦିନ ଶହ ଶହ ଲୋକ୍ ଇ କାଦୋ ପଚ୍ପଚ୍ ରାସ୍ତାରେ ଗଲାଆଏଲା ବେଲେ ବଡ଼ଭାରି ସମସିଆର ସାମନା କରୁଛନ୍। ସେନ୍ତା ଶିଶୋପଡ଼ାର ଆରଡି ରାସ୍ତା, ଭଇଁରିନୁ ମାନପଡ଼ା ରାସ୍ତା ଆର ଭଇଁରିନୁ ଗୁନଗୁନିଆ ରାସ୍ତାର ଅବସ୍ତା ବି ନିହାତି ଖରାପ ଅବସ୍ତାରେ ରହିଛେ। ଇ ରାସ୍ତାରେ ବଡ଼ ବଡ଼ ଖାଲ ରହିଥିଲାବେଲେ ଖାଲମାନକେ ବରଷା ପାଏନ୍ ଭରି ରାସ୍ତାଟା ସମାନ ଦିଶୁଛେ। ହେଲେ ଲୋକ୍ ଗାଡ଼ିମଟର, ସାଇକେଲରେ ଗଲାଆଏଲା ବେଲେ ହିଟିହାବଡ଼ି ପଡ଼ି ଖଁଡ଼ିଆଡଁଡ଼ିଆ ହେଉଛନ୍। ଇ ଭଇଁରିନୁ ଗୁନଗୁନିଆ ରାସ୍ତାଟା ମୋଟେର ଜୟପାଟଣାର ମୁଖିଆ ରାସ୍ତା ସଂଗେ ଯୁଡ଼ି ହେଇଛେ। ହେଲେ ମରାମତି ଅଭାବୁ ବହୁତ୍ ଦିନ ହେଲା ଇ ରାସ୍ତା ଲୁକ୍କର ଲାଗି ମରନ୍ଯଁତା ପାଲଟିଛେ। ଇ ରାସ୍ତା ଦେଇ ଅଂଲବାସୀ କଲମପୁର ବ୍ଲକ, ଡାକ୍ତରଖାନା, ତହସିଲ, ବ୍ୟାଙ୍କ ଆର ଉନିଆ ସରକାରୀ ଦପ୍ତରମାନକୁ ଯିବାର ଆଏବାର କରୁଛନ୍। ସେନ୍ତା ଇ ସବୁ ରାସ୍ତା କଲମପୁର ଆର ଜୟପାଟଣା ବ୍ଲକକେ ସଂଯୋଗ କରୁଛେ। ସେନ୍ଥିରଲାଗି ଅଂଚଲବାସୀ ଇ ରାସ୍ତାକେ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ସାମିଲ କରବାକେ ଦାବି କରିଛନ୍। ଇ ବାବ୍ଦେ ମିନଗୁର ସରପଁଚ୍ ହରିପ୍ରିୟା ରଣାକୁଁ ପଚରାଲାରୁ ଆମେ ୨୦୧୮-୧୯ ଏକ୍ସନପ୍ଲାନରେ ଇ ସବୁ ରାସ୍ତାର ମରାମତି ଲାଗି ପଁଚେତ୍ ସମିତିକେ ଜନେଇ ଦେଇଛୁଁ ବଲି ସେ କହିଥିଲେ। ସେନ୍ତା ଇ ବାବ୍ଦେ କଲମପୁର ବିଡିଓ ହେମସାଗର ଭୋଇକୁଁ ପଚରାଲାରୁ ଇ ରାସ୍ତାମାନ ବୁଲି ଦେଖ୍ଲା ଉତାରୁ ଯେତେ ଜଲଦି ହେବା ମରାମତି ଦିଗେ ପଦକ୍ଷେପ ନିଆଯିବା ବଲି ସେ କହିଥିଲେ।
